БНСУ-д хувиараа болон хөдөлмөрийн гэрээгээр ажиллаад эх орондоо ирсэн иргэдийг ажилд зуучлах “Хөдөлмөрийн яармаг” өдөрлөг саяхан МҮХАҮТ-д боллоо.
“Энэхүү ажиллагаа нь БНСУ-д Хөдөлмөрийн гэрээгээ дуусгаж, тус орны дэвшилтэт технологиос суралцан нутаг буцаж ирсэн иргэдийг ажилд зуучилж эх орондоо ажиллах нөхцөл боломжийг олгох зорилготой”-г МҮХАҮТ-ын орлогч дарга Б.Намжилсүрэн онцоллоо. Тэрээр, “Ийм иргэд ажил хөдөлмөрийн зохих туршлага суусан, дээр нь тухайн орныхоо ажлын арга барил, техник технологиос суралцсан учир дотоодын ААН-үүд ийм иргэдийг ажилд авах сонирхолтой байна. Үүнийгээ ч илэрхийлж байна” гэв.
“Хөдөлмөрийн яармаг”-т гадаад, дотоодын ажил олгогч 50 орчим компани оролцож, ажилд орох иргэдтэй ярилцлага хийж, ажлын анкет бөглөх, ажилд зуучлах, хөдөлмөр эрхлэлтийг дэмжих, зөвлөгөө мэдээллээр хангах зэргээр үйлчилж, 40 гаруй хүн ажилд орох саналаа өгчээ. Энэ үеэр мөн БНСУ-д Хөдөлмөрийн гэрээгээр ажилтан илгээх талаар Хан-Уул дүүргийн Хөдөлмөр, нийгмийн халамжийн үйлчилгээний хэлтсээс танилцууллаа.
“Хөдөлмөрийн яармаг”-ийн үеэр “Солонгос хүнс, хөдөө аж ахуйн бараа бүтээгдэхүүний үзэсгэлэн” гарсан юм.
