Ази тивийн аварга шалгаруулах марафон гүйлтийн 15 дахь удаагийн тэмцээн энэ сарын 25-нд Хонконгт болсон байна. “Алдар” спорт хорооны тамирчин, ОУХМ Б.Мөнхзаяа энэ тэмцээнд 42 км 195 метрийн зайг 2.38.48 цагт туулж, IV байрт оржээ. Ингэснээр Рио де Жанейрогийн олимпод оролцох болзлыг хангажээ.
Дасгалжуулагч Б.Төрбатын удирдлага дор эрэгтэйчүүдийн 42 км 195 метрийн зай буюу марафоны төрөлд 11 улсын тамирчидтай өрсөлдсөнөөс ОБЕГ-ын “Аврагч” спорт хорооны тамирчин Ж.Олонбаяр 2.22.49 цагийн амжилтаар хүрэл медаль хүртсэн байна.
Харин олимпийн их наадмын марафоны эмэгтэйчүүдийн ангилалд 2 цаг 40 минутаас дотогш амжилтыг үзүүлсэн тамирчид оролцох эрхтэй гэсэн заалт ёсоор ОУХМ Б.Мөнхзаяа 2016 оны олимпод хурд сорих эрхтэй болжээ.