УИХ-ын нэгдсэн чуулганаар Монгол Улсыг 2021-2025 онд хөгжүүлэх таван жилийн үндсэн чиглэлийн тухайн жилийн гүйцэтгэлийн явц болон Монгол Улсын Засгийн газрын 2020-2024 оны үйл ажиллагааны хөтөлбөрийн 2021 оны хэрэгжилтийг хэлэлцэж байна. Хэлэлцэж буй асуудалтай холбогдуулан гишүүд асуулт асууж, хариулт авлаа.
Сангийн сайд Б.Жавхлан “Монголбанк мөнгөний бодлогоо чангалсан учир төсвийн бодлогод нөлөөлнө. Ялангуяа, төсвийн хөрөнгө оруулалт дээр. Төсвийн бодлогод төсвийн урсгал зардлыг тусад нь харж, 100 хувь санхүүжүүлэх үүрэгтэй. Төсвийн хөрөнгө оруулалтын тухайд гэвэл хил гааль, үнэ, ложистикийн асуудлаас болж тендерт оролцогчдын тоо эрс багасч байна. Одоогоор төсвийн тодотгол хийнэ, хөрөнгө оруулалтаа царцаана гэж хэлэхэд эрт байгаа. Гэхдээ тодорхой байгаа зүйл нь ямар ч байсан хөрөнгө оруулалтыг хэмнэхээс өөр аргагүй. Аль болох хөрөнгө оруулалтын тоо ширхгийг хэвээр хадгална гэж тооцоолж байна” гэлээ.