Лхагва гаригт Замын цагдаагийн албанд нийт 390 дуудлага, мэдээ мэдээлэл иржээ. Зам тээврийн ослын 283 дуудлага бүртгэгдсэн бөгөөд осол, хэргийн улмаас нийт зургаан хүн гэмтэж, орон нутагт гурван хүний амь нас хохирсон байна.
Нийт гэмтэж бэртсэн хүний хоёр нь 11-18 насны хүүхэд ба явган зорчигч хэлбэрээр замын хөдөлгөөнд оролцож байх үедээ зам тээврийн осолд өртсөн байна.
Цагдаагийн байгууллагаас гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 38 жолоочийг илрүүлэн саатуулж, хуулийн дагуу хариуцлага тооцжээ.
Мөн “Suzuki swift” маркийн автомашиныг иргэн И хулгайлан замын хөдөлгөөнд оролцож байх үед нь Хан-Уул дүүргийн Замын цагдаагийн хэлтсийн алба хаагч илрүүлэн саатуулсан байна.
Бүртгэгдсэн осол, хэргийг хэлбэрээр нь авч үзвэл явган зорчигч мөргөсөн зургаа, мөргөлдөх хэлбэрээр хоёр осол тус тус бүртгэгдсэнийг Замын цагдаагийн алба шалгаж байна.