“Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай” УИХ-ын тогтоолын төсөлд хэвлэл мэдээллийн хэрэгслүүдийг устгахыг санаархсан хэд хэдэн заалт тусгагдаад байсан билээ. Тодруулбал, авлигатай тэмцэх соён гэгээрүүлэх ажлыг хэвлэлүүд үнэ төлбөргүй нийтэд түгээх, иргэд, аж ахуй нэгжүүдийн хэвлэл мэдээллийн хэрэгслүүдтэй байгуулсан гэрээг ил болгох, “Хэвлэл мэдээллийн салбарт хөрөнгө оруулагч, өмчлөгч-эзнийг нээлттэй зарлаж, нэг хөрөнгө оруулагч болон нэгдмэл сонирхолтой этгээдийн оруулах хөрөнгө оруулалтын хэмжээ нь тухайн хэвлэл мэдээллийн байгууллагад хяналт тогтоох боломж бүрдүүлэхгүй байхаар тогтоох” гэсэн ноцтой гурван заалт орсон байлаа.
Өнгөрсөн долоо хоногт Хууль зүйн байнгын хороо уг асуудлыг хэлэлцэхдээ хэвлэлд харшилсан дээрх заалтуудыг огт хөндөөгүй юм. Авлигатай тэмцэх нэрийдлээр дунд нь хэвлэлийн эрх чөлөөг боомилох гэсэн зальжин арга бүтсэнгүй. Учир нь Байнгын хороо уг асуудлыг хэлэлцээд дэмжээгүй. Ингээд өнгөрсөн долоо хоногийн баасан гаригийн чуулганы хуралдаанаар хэлэлцэх эсэхийг нь эхлүүлээд, өнөө маргаашийн аль нэгэнд нь хэлэлцэхээр товлоод байсан билээ. Тэгвэл өнөөдрийн чуулганы хамгийн эхэнд уг тогтоолын төслийг хэлэлцэхээр оруулж ирсэн байв. Байнгын хорооны саналын томъёоллоор санал хураалгахад “Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай” УИХ-ын тогтоолын төсөл ийн унаж, төсөл санаачлагчид нь буцаасан байна.