АСЕМ-ийн өдөр ирэх сарын 1-нд болох юм
байна. Энэ өдрийг тохиолдуулан “Монцамэ” агентлагийн байранд АСЕМ-ийн
“Мэдээллийн төв”-ийг албан ёсоор нээх аж. Монгол Улсын Ерөнхийлөгчийн
олон нийтийн харилцааны зөвлөх А.Ганбаатараар ахлуулсан АСЕМ-ийн Дээд
төвшний 11 дэх удаагийн уулзалтын Хэвлэл мэдээлэл, сурталчилгаа
хариуцсан ажлын хэсэг хуралдаж, “АСЕМ-ийн Мэдээллийн төв”-ийг нээх
өдрийг ийнхүү товлосон байна.
Тус ажлын хэсгийн хурлаар дээд төвшний
уулзалтын үеэр гадаадын сэтгүүлчдэд зориулсан “Хэвлэлийн төв”-ийг
“Шангри Ла” цогцолборт нээхээр болжээ. Уг төвд шаардлагатай тоног
төхөөрөмжийн жагсаалтыг гаргаж, мэдээ мэдээлэл бэлтгэж дамжуулах
нөхцөлөөр хангах суваг, өндөр хурдны интернэтийн сүлжээ зэргийг дотоодын
компаниудын дэмжлэгтэйгээр шийдвэрлэхийг ажлын хэсгийн дарга холбогдох
хүмүүст үүрэг болгов. Түүнчлэн АСЕМ-ийн уулзалтыг угтаж аж ахуйн нэгж,
хөрөнгө оруулагчдын дунд хандивын үйл ажиллагаа зохиох тухай ярилцаж,
саналаа эцсийн байдлаар боловсруулан Үндэсний зөвлөлөөр хэлэлцүүлэхээр
шийдвэрлэжээ.