“Хорт зуршилгүй залуу” архи, тамхины эсрэг аяны талаар Гэр бүл хүүхэд залуучуудын газраас мэдээллээ.
Архи хэтрүүлэн хэрэглэсний улмаас дэлхий дээр жилд 3 сая буюу минутад 6 хүн нас бардаг гэж ДЭМБ-аас мэдээлжээ. Эдгээр нас барагсдын 4 хүн тутмын 3 нь эрэгтэй байна.
Өнгөрсөн 2020 онд цагдаагийн байгууллагад 2,276,868 зөрчил бүртгэгдсэний 93,863 нь эрүүлжүүлэгдсэн, 4,121 нь согтуугаар тээврийн хэрэгсэл жолоодсон ба гэмт хэрэг зөрчлийн 50 орчим хувь, хүүхдийн эсрэг хүчирхийллийн 77 хувь нь согтуугаар үйлдэгдсэн байна. Согтууруулах ундааны хэрэглээ нь олон төрлийн өвчин эмгэг болон осол гэмтэл, хүчирхийлэл, гэмт хэрэг зэргийг өдөөх эрсдэлт хүчин зүйл болж, нийгэмд сөрөг нөлөөтэй гэдгийг дээрх тоо баримт мэдээллээс харж болох юм.
Харин Наркологийн эмнэлгийн эмчилгээ эрхэлсэн орлогч дарга Д.Чулуунболор “Энэ ажлын хүрээнд 100 залууг хорт зуршилгүй болгоно. Өнөөдрийн байдлаар 30 орчим залуу эмчлэгдсэн. Бид онлайнаар болон утсаар зөвлөгөө өгч байна. Манай эмнэлэгт жилд 2,000-2,200 гаруй хүн хэвтэн эмчлүүлдгээс 40-45 хувь нь 35 хүртэлх насны залуучууд байдаг. Үүнээс 98 хувь нь ямар нэг байдлаар архины хамааралтай, 100 хувь нь тамхи татдаг.
Эдгээр залуусын дунд тамхинаас татгалзах хөтөлбөрийг хэрэгжүүлж байна. Хоёр бүлгийн уулзалт сургалт, боловсролын үйлчилгээг давхар хэрэгжүүлж байгаа” гэсэн мэдээллийг өглөө
Хорт зуршлаас татгалзах тусламжийн утас 1800-1893 дугаарт холбогдох болон “Хорт зуршилгүй залуу” цахим хуудсаар зөвлөгөө, үйлчилгээ хүлээн авах, шаардлагатай тохиолдолд хэвтэн эмчлүүлэх бүрэн боломжтой болсон байна.