Дэлхийн эмч нарын албан ёсны өдөр бол өнөөдөр. Манай улсын хувьд өчигдрөөс маргааш хүртэлх амралтын өдрүүдэд ёслон тэмдэглэж байна.
Маргааш Эмч, эмнэлгийн Үйлдвэрчний холбоо, ЭМЯ хамтран “Алтан чагнуур- 2019” шилдэг эмч нараа шалгаруулан шагнах удамжлалт ёслол нь болно. Ингэснээр Монголын эмч нарын 10 дахь удаагийн “Дэлхийн эмч нарын өдөр”-ийн баяр ёслолууд өндөрлөх юм.
Дэлхийн эмч нарын өдрийг анх 1933 оны 3 дугаар сарын 30-ны өдөр Америкийн Нэгдсэн Улсад тэмдэглэж эхэлсэн түүхтэй. АНУ-ын Ерөнхийлөгч Ж.Буш 1990 оны 3 дугаар сарын 30-ны өдрийг “Үндэсний эмч нарын өдөр“ болгон тэмдэглэх болсноос хойш Дэлхийн эмч нарын холбооноос энэ баярыг жил бүр дэлхий даяар албан ёсоор тэмдэглэх өдөр болгон зарлажээ.
Өчигдөр энэ өдрийг угтан ажилдаа өндөр амжилт гарган ажиллаж байгаа эмч, сувилагч, эрүүлийг хамгаалах салбарын ажилтнуудыг ЭМ-ийн сайд Д.Сарангэрэл хүлээн авч шагналыг нь гардуулсан. “Хөдөлмөрийн гавьяаны улаан тугийн одон”-гоор Г.Ганчимэг, Н.Бадам нарын гурван хүнийг, “Алтан гадас” одонгоор Х.Алтайсайхан, Д.Баасанжаргал нарын 12 эмч, сувилагчийг, “Хөдөлмөрийн хүндэт” медалиар А.Алтанзориг, Ч.Энхцэцэг нарын эмч, сувилагч, үйлчилгээний 5 хүнийг, ЭХТА цол тэмдгээр 7 хүнийг тус тус шагнасан байна.
Нийслэлийн дүүргийн эрүүл мэндийн төв, Улсын нэг, хоёр, гуравдугаар эмнэлгийн хамт олон тэргүүний сайчуудаа шагнаж урамшуулан эмч нарын өдөрлөг зохион байгуулжээ.