УИХ-ын гишүүн, Аж үйлдвэрийн сайд
Д.Эрдэнэбат, УИХ-ын гишүүн Н.Батбаяр, Хөгжлийн банкны гүйцэтгэх захирал
Н.Мөнхбат тэргүүтэй төлөөлөл энэ сарын 16-нд Хөгжлийн банкны бондын
санхүүжилтээр Дархан-Уул аймагт хэрэгжиж буй төсөл, хөтөлбөрүүдийн
явцтай танилцсан юм. “Дархан нэхий” компани жилд 500 мянган ширхэг нэхий
болон савхин хувцас үйлдвэрлэж байна. Харъяа гутлын үйлдвэр нь жилд 500
мянган хос гутал зах зээлд нийлүүлжээ. Мөн “Адуу мал” брэндийг бий
болгосон байна.
Тус компани Евро стандартын шаардлага
хангасан бүтээгдэхүүн үйлдвэрлэж, эцсийн бүтээгдэхүүнийхээ 60 гаруй
хувийг гадаад зах зээлд экспортлож буй юм байна. “Дархан нэхий” компани
“Чингис бонд”-ын санхүүжилтийн эх үүсвэрээс 4 хувийн хүүтэй, 5 жилийн
хугацаатай 14 тэрбум төгрөгийн зээл авч, хүүгийн төлбөр нь 2015 оны
хоёрдугаар сараас төлөгдөж эхэлжээ. Тус үйлдвэр нь Итали, Испани,
Тайланд улс руу хагас боловсруулсан шир, ОХУ руу арьсан бүтээгдэхүүн
экспортлож байгаагийн зэрэгцээ Европын хэд хэдэн улстай бүтээгдэхүүнээ
экспортлох гэрээ байгуулжээ. Түүнчлэн цахим худалдааны томоохон сүлжээ
болох www.alibaba.com сайтаар олон улсын хэрэглэгчдээс онлайн захиалга
авч эхэлсэн байна.