ЮНЕСКО-гийн Ерөнхий бага хурлын 26 дугаар чуулганаас гаргасан Зөвлөмжийн дагуу 1993 онд НҮБ-ын Ерөнхий Ассемблейгаас жил бүрийн тавдугаар сарын 3-ны өдрийг “Дэлхийн хэвлэлийн эрх чөлөөний өдөр” хэмээн тунхагласан.
Энэ өдрийг тохиолдуулан RSF буюу “Хил хязгааргүй сэтгүүлчид” байгууллагаас жил бүр дэлхийн хэвлэлийн эрх чөлөөний индексийг зарладаг. 2023 онд манай улс 180 орноос 88 дугаарт бичигдэж байсан бол 2024 онд дахин ухарч 90 дүгээр байрт оржээ. Нөгөөтэйгүүр, сэтгүүлчид ажлаа хийснийхээ төлөө заналхийлэл, дарамтад өртөж буй тохиолдол, жишээ олон. Тиймээс улс орон бүр өөр өөрийн уриан дор тэмдэглэдэг бол энэ удаа МСНЭ-ийн зүгээс өнөөдөр Сүхбаатарын талбайд 10:30 цагт “Хэвлэлийн эрх чөлөө боогдлоо” жагсаал зохион байгуулж байна. Энд хэвлэл мэдээллийн салбарынхан цугларч асуудлаа ярьж зөвшилцөлд хүрэх юм.
Монгол Улсад 2023 оны байдлаар 486 хэвлэл мэдээллийн хэрэгсэл тогтмол ажиллаж байгаагаас сонин 64, сэтгүүл 46, радио 50, телевиз 135, мэдээллийн сайт 191 байна.