ОБЕГ-аас өгсөн мэдээллээр өчигдөр буюу гуравдугаар сарын 1-нд гал түймрийн 8 дуудлага ирсэний хоёр нь нийслэлд бол 6 нь орон нутагт бүртгэгдсэн байна. Үүнээс гурав нь машин шатсан дуудлага байжээ. Эдгээрийг дурдвал:
- Дундговь аймгийн Сайнцагаан сумын Нарлаг багт автомашин шатаж байна гэсэн дуудлагыг 03.01-ний өдрийн 18:45 цагт хүлээн авч 18:49 цагт очиход нэр бүхий иргэний жолоодож явсан “УАЗ Фургон” автомашины хөдөлгүүрийн хэсэг, бүхээг шатаж байсныг 10 минут ажиллаж
- Хэнтий аймгийн Бор-Өндөр сумн Хүйх багийн “Баргилт” гэдэг газар нэр бүхий иргэний “Норд Бенз” загварын том оврын ачааны автомашины 4 дугуй шатаж байсныг 18 минут ажиллаж
- Өвөрхангай аймгийн Арвайхээр сумын Бурхи багийн “Морин толгой” гэдэг газар Гучин-Ус сумаас Арвайхээр сумын чиглэлд нэр бүхий иргэний жолоодож явсан “Тоёота Приус 20” загварын суудлын автомашин шатаж байсныг 10 минут ажиллаж тус, тус унтраажээ.
Мөн дулаан дамжуулах шугамын худагт хүн нас барсан осол гарсан байна.
Энэ талаар ОБЕГ “Нийслэлийн Сүхбаатар дүүргийн 7 дугаар хороо, дулаан дамжуулах шугамын худагт хүн нас барсан байна, цогцсыг гаргуулах хүсэлтийг тус дүүргийн Цагдаагийн 1 дүгээр хэлтсээс 03.01-ний 15:05 цагт хүлээн авсан. Аврах анги-105-ын алба хаагчид 8 км замыг туулан 15:18 цагт очиж, 3 метрийн гүнтэй дулаан дамжуулах шугамын 663 дугаар худгаас нийслэлийн Баянзүрх дүүргийн харьяат 63 настай, эрэгтэйн цогцсыг гаргаж, тус дүүргийн Цагдаагийн 1 дүгээр хэлтэст шилжүүлж өгсөн” тухай хоногийн мэдээндээ бүртгэсэн байна.