Ардчилсан эмэгтэйчүүдийн холбооны эмэгтэйчүүд охид,эмэгтэйчүүдийн эсрэг хүчирхийллийг эсэргүүцэж жагслаа.
Тэд “Хүчирхийллийн гэмт хэргийн хохирогч болсон хүүхэд, эмэгтэйчүүдийн тоо өдрөөс өдөрт нэмэгдэж буй бодит байдлыг засч залруулахын оронд, энэ төрлийн хэрэгт холбогдсон хүнийг эрх баригчид хамгаалж хаацайлж байна. Энэ нь хүчирхийллийн гэмт хэрэгт холбогдож УИХ-ын гишүүнээс чөлөөлөгдсөн Д.Гантулгыг хууль бусаар чөлөөлсөн байна гэх гомдлыг Үндсэн хуулийн цэцэд гаргасан байгаагаас харагдаж байна” гэж үзэж байгаа юм. Ардчилсан эмэгтэйчүүдийн холбооны тэргүүн дэд Ерөнхийлөгч Б.Жаргалан энэ тухай хэлэхдээ, “Охид эмэгтэйчүүдийг доромжилж, хүчирхийллийг өөгшүүлж буй эрх баригчдын энэ алхмыг эмэгтэйчүүд эсэргүүцэж, Үндсэн хуулийн цэцэд өргөх бичиг барьж байгаа” гэлээ. Монгол Улсад гурван эмэгтэй тутмын хоёр нь ямар нэгэн байдлаар хүчирхийлэлд өртсөн тухай Үндэсний статистикийн хорооноос гаргасан судалгаанд дурдсан байдаг. Энэ тоо баримтыг нотлох мэт хүчирхийлэлтэй холбоотой хэргүүд сүүлийн үед олон нийтэд ил болсоор байна. Энэ төрлийн хэрэгт олонд танигдсан нэр хүндтэй эрхмүүд, мөн улс төрчид ч холбогдсон. Тодруулбал, УИХ-ын гишүүн асан Д.Гантулга 2017 оны хавар хүчирхийллийн хэрэгт холбогдсон байдаг юм. Гэтэл хэрэгт холбогдсон гишүүн асныг хэрвээ хууль бусаар чөлөөлсөн тухай шийдвэрийг гаргавал УИХ болон Үндсэн хуулийн цэц хүчирхийллийг өөгшүүлж байна гэж үзэхээс аргагүй хэмээн тэд ярилаа.