Японд өнгөрсөн ням гаригт “Хүүхдийн өдөр”-ийг тэмдэглэжээ. Энэ үеэр тус улсын Дотоод хэргийн яам тайлангаа танилцуулсан байна. Түүнд дурдсанаар Японд 15 ба түүнээс доош насны хүүхдийн тоо энэ онд буурсан үзүүлэлттэй гарсан. Өнгөрсөн дөрөвдүгээр сарын 1-ний байдлаар тус улсад 15 ба түүнээс доош насны хүүхдийн тоо 15.33 сая байгаа аж. Тодруулбал, 7.85 сая нь эрэгтэй, 7.48 сая нь эмэгтэй гэнэ. Өнгөрсөн оныхтой харьцуулахад энэ тоо 180 мянгаар буурсан нь хамгийн доод үзүүлэлт болжээ. Дээрх байгууллагын төлөөлөгчийн мэдээлснээр сүүлийн 38 жилийн хугацаанд Японд хүүхдийн тоо жил ирэх тусам буурсаар байгаа юм. Нийт хүн амын 12.1 хувийг 15 ба түүнээс доош насныхан эзэлдэг. Өссөн үзүүлэлттэй гарсан цор ганц хот нь Токио. Окинавад энэ үзүүлэлт хэвээр байгаа. Харин бусад мужуудад өнгөрсөн оныхтой харьцуулахад буурсан аж.