Нийслэлийн Засаг дарга бөгөөд Улаанбаатар хотын Захирагч С.Амарсайхан өнөөдрөөс ажилдаа орлоо. Ерөнхий сайд У.Хүрэлсүх хотын шинэ даргыг батламжилснаар Нийслэлийн Засаг даргын тамга тэмдгээ албан ёсоор авлаа. Ерөнхий сайдын захирамжийг Засгийн газрын хэрэг эрхлэх газрын дарга Л.Оюун-Эрдэнэ Хотын дарга С.Амарсайханд гардуулж өгөв.
Ажлаа хүлээн авсныхаа дараа тэрээр сэтгүүлчдэд мэдээлэл хийлээ. “Нийслэлийн ажлыг холоос хайхгүй. Замын түгжрэлийг багасгах, хог хаягдлыг цэгцлэх ажлуудаас эхлээд явна. Бидэнд хийх ажил их байна. Мэдээж хамгийн түрүүнд хариуцлагын асуудал дээр анхаарч ажиллана. Хариуцлагаас бүх зүйлийг эхэлнэ. Хамгийн зөв зохион байгууллалттайгаар ажиллах болно. Шийдвэртэй алхмууд хийхийн тулд бүтэц зохион байгуулалтын ажлыг хийнэ. Хүн бүхэн сайхан амьдрах ёстой. Надтай холбоотой шударга бус асуудал гарахгүй гэж бодож байна” гэв.