Бага ангийн сурагчид тулгуур эрхтний хөгжил муутай, бөгтөр болж байгаа тухай сүүлийн үед эмч нар их ярих боллоо. Эцэг, эхчүүд дэмий л эмзэглэхээс цаашгүй байх юм. Хүүхдийн өсөлт хөгжил, эрүүл мэндэд сөргөөр нөлөөлж байгаа гол асуудал нь цүнхэнд байдаг. Бул чулуу үүрчихсэн юм шиг л цүнхээ дааж ядан алхах жаалуудыг харахаар өмнөөс нь ядрах шиг л болдог шүү дээ. Тэгвэл монгол хүүхдүүд олон улсын стандартнаас хэт давсан хүнд жинтэй дэвтэр ном үүрч явдаг юм байна. Америкийн хүүхдийн эмч нарын академиас сурагчийн үүргэвч ямар жинтэй байх ёстойг тогтоожээ.
Нэгдүгээр ангийн хүүхэд 1.2 кг жинтэй цүнх үүрвэл биед нь ачаалал өгдөггүй байна. Хоёрдугаар ангийн сурагч 1.6 кг, гуравдугаар ангийнх 2.3 кг, дөрөвдүгээр ангидаа дөнгөж 2.6 кг цүнх, номтой байвал хэвийн гэж үзжээ. Энэ мэтчилэн анги ахих тусам хүүхдийн цүнх 200-300 граммаар нэмэгдэх ёстой аж. Ахлах ангийн сурагчдын цүнх дөрвөн кг-аас хэтрүүлэхгүй байх стандартыг америк эрдэмтэд хэлж байна.
Харин манай сурагчид хэдэн кг цүнх үүрч явдаг гээч. “Хэрэглэгчийн сэтгэл ханамжийн судалгаа” төрийн бус байгууллагын судалгаанаас харахад бага ангийн сурагчдын цүнх дангаараа 800 граммаас 1.2 кг жин татдаг байна. Дэвтэр номтой болохоороо дунджаар таван кг нэмэгддэг аж. Судалгаанд оролцогчдын дийлэнх нь бага ангийн сурагчдын номны хэмжээг дэндүү том байна гэж шүүмжилжээ. Иймд өдөр бүр хүүхдийн цүнхэнд явдаг математик, монгол хэл гэх мэт овор хэмжээтэй том номыг гэрт болон ангид ашиглахаар тус тусдаа байхыг дэмжээ. Хичээл дээр хэрэглэх номыг багш өөртөө хадгалж, харин гэрийн даалгаврын номыг эцэг, эх нь хариуцан үлдээж байх саналууд олноор гарсан байна. Тэртэй тэргүй манай улс сурах бичигт асар их мөнгө зарцуулдгаас хойш гэрэлт ирээдүй болсон хүүхдүүдийнхээ эрүүл мэндийг бодоод номны зохион байгуулалтад зардал гаргахад яахав дээ.