Монгол Улсын Ерөнхийлөгч асан Ц.Элбэгдоржийн 1989 оны Ардчилсан хувьсгалыг удирдсан үеэсээ эхлэн хөтөлсөн өдрийн тэмдэглэлүүдийг “Өдрийн сонин” онцгой эрхтэйгээр удахгүй олон мянган уншигчдадаа хүргэх гэж байна. Тэртээх 29 жилийн өмнө Монголын нийгэмд улс төрийн ямар үйл явц өрнөж, нийгмийг огт өөр нийгмээр солих түүхэн хувьсгал хэрхэн өрнөсөн, түүнд хүмүүс хэрхэн оролцсон, тэдний үйл хөдлөл, үг хэл, байр суурь, эр зориг ямар байсныг түүний тэмдэглэлийн дэвтрээс уншаарай. Төв талбай дээр анх удаа 100 мянга гаруй хүн цугласан дуулиант жагсаалууд, анхны өлсгөлөн, тэр үеийн эрх баригчид болох Улс төрийн товчоо хэрхэн огцорсон… гэхчлэн өөр олон сонирхолтой мэдээлэл, түүхэн бодит үнэнүүд Ц.Элбэгдоржийн тэмдэглэлийн хар дэвтрүүдэд бий. Ийм гар бичмэлүүд өдөр, цаг минут, нэр устайгаа байгааг түүний оролцсон “Монгол тулгатны зуун эрхэм” нэвтрүүлгээс монголчууд анх мэдэж, бас тэр дэвтрүүдээ алдчихаад эрж хайж байгааг нь сонсоод харамссан билээ.
Азтай нь Элбэгээ энэ дэвтэрүүдээ олжээ. Монголын төрт ёсны 2000 жилийн түүхэнд нийгмийн хувьсгалууд цөөнгүй хийгдсэн. Харин 1990 оны Ардчилсан хувьсгал шиг манлайлан оролцсон хүнийх нь гар бичмэлүүд дэвтэр дэвтрээр хадгалагдан үлдсэн нь байхгүй билээ. Өчигдрийнх байтугай өнөөдрийн түүхийг маргааш нь гуйвуулдаг болсон энэ цаг үед ерэн оны Ардчилсан хувьсгалын түүхийг, гэрчүүд нь сэрүүн тунгалаг байгаа энэ цаг үед “Өдрийн сонин” ийнхүү цувралаар нийтлэх болсон нь Монголын нийгэмд гүйцэтгэж буй манай сонины бас нэг үүрэг хариуцлага билээ.
