Монголын барилгын материал үйлдвэрлэгчдийн холбооноос арматур төмрийн эрэлт, нийлүүлэлтийн талаар мэдээлэл хийлээ.
2017 онд барилгын гол арматур төмрийг импортоор худалдан авахад 110 сая долларыг зарцуулсан аж. Арматур төмрийн үнэ өнгөрсөн оны мөн үеэс 35 хувиар өссөн байна.
Энэ онд барилгын бүтээн байгуулалтын ажил их хийгдэнэ. Тиймээс дотооддоо арматур үйлдвэрлэхэд Засгийн газраас анхаарах хэрэгтэйг мэргэжлийн хүмүүс хэлж байлаа. Манай улс зах зээлийн арматур хэрэглээний 30 орчим хувийг дотооддоо үйлдвэрлэдэг. Дотоодын үйлдвэрүүдийн арматур төмрийн үнэ импортын төмрөөс харьцангуй хямд байдаг байна. Зах зээл дээр нэг тонн арматурын үнэ сая 500 мянган төгрөг байхад, дотоодын үйлдвэрүүдэд сая орчим төгрөгийн үнэтэй байдаг аж.
Төр засгийн хэмжээнд ган төмрийн үйлдвэрлэлийг дэмжиж санхүүжилт, зээл тусламж үзүүлж үйлдвэрүүдийг томсгох тал дээр анхаарах хэрэгтэйг тэд онцлов. Арматур төмөр барилга барихад чухал нөлөөтэй бөгөөд барилга байгууламжийн 40 орчим хувийг бүрдүүлдэг байна.
Үндэсний аж үйлдвэрийн зөвлөлийн, Удирдах зөвлөлийн гишүүн Монгол Улсын зөвлөх инженер Р.Бямбадорж “2014 онд улс орны эдийн засаг тогтвортой байсан. Тус онд 333 мянган тонн барилгын арматур төмөр хэрэглэсэн. Үүний 270 гаруй тонныг импортоор авч 70 орчим тонныг дотооддоо үйлдвэрлэсэн. Энэ нь Монгол Улс зах зээлийн 30 хүрэхгүй хувийг дотооддоо үйлдвэрлэдэг гэсэн үг. Үлдсэн 60-70 хувийг импортоор авч байна. Сүүлийн дөрвөн жилийн хугацаанд барилгын арматур төмрийн хэрэгцээ, нийлүүлэлт багассан. Монголд арматур төмрийн 14 үйлдвэр ажилладаг. Энэхүү үйлдвэрүүд зах зээлийн хэрэгцээний 30 орчим хувийг эзэлж байна гэсэн үг юм.
2018 оноос эхлэн зах зээл дээр арматурын хомсдол үүссэн. Арматурын үнэ огцом өссөн. Барилгын гол материалын үнэ хэлбэлзэлтэй байгаа нь барилгын үнэ бага багаар буурч байгаа энэ үед сөрөг үр дагавар авч ирж байна” гэв