“Монголын зөгийчдийн нийгэмлэг”, “Аравт бизнес нэгдэл” ТББ хамтран “Монголын зөгийн аж ахуйн кластер” старт-ап бизнес уулзалтыг зохион байгуулах талаар өнөөдөр мэдээлэл хийлээ.
“Монголын зөгийчдийн нийгэмлэг”-ийн зөвлөх М.Нарантуяа “Өнгөрсөн есөн сард Дэлхийн зөгийчдийн нийгэмлэгээс зохион байгуулсан уулзалтад “Монголын зөгийчдийн нийгэмлэг”-ийн төлөөлөл оролцсон. Зөгийн балыг савлаад хадгалах явцад маш олон өөрчлөлтүүд явагдаж байдаг.Хэрэглэгчид энэ амралтын өдрөөр тус уулзалтад ирснээр зөгийн балтай холбоотой танин мэдэхүйн заавар зөвлөгөөг мэргэжлийн хүмүүсээс авах боломжтой.Зөгийн аж ахуй байгаль экологид ээлтэй. Энэ аж ахуйг төрийн зүгээс бодлогоор дэмжиж өгөөсэй гэж хүсэж байна” гэлээ.
“Монголын зөгийчдийн нийгэмлэг”-ийн зөвлөх Х.Отгонбилэг “Өнөө үед балт зөгийг үржүүлэх түүний бүтээгдэхүүнийг ашиглах талаар дэлхий даяар анхаарч байгаа.1959 оноос Монгол оронд орчин үеийн олон давхраат зөгийн аж ахуйг эрхлэх болсон.Сүүлийн үед зөгийн аж ахуй сэргэх шатандаа ороод байна.Увс, Ховд, Архангай зэрэг аймагт 50 орчим цэгт 16 мянган бүлэг зөгийг үржүүлж, 250-300 мянган тонн орчим зөгийн балыг бэлтгэж байна. Монгол орны балт ургамлууд эмийн өндөр ач холбогдолтой. Уулзалтын үеэр байгалийн гаралтай зөгийн балыг худалдаална. Түүнчлэн зөгийн аж ахуйд ажиллах сонирхолтой хүмүүсийг ажлын байранд зуучилна.Шингэрүүлсэн сироп хэлбэртэй хуурамч 3,000 мянган тонн зөгийн бал гадаадаас манай улсад хилээр орж ирж байна” гэв.
Дашрамд сонирхуулахад “Монголын зөгийн аж ахуйн кластер” старт-ап бизнес уулзалт гуравдугаар сарын 3, 4 буюу энэ амралтын өдрүүдэд ХУД, ажилчдын гудамж, “Star Window” ХХК-ийн / Дулааны III цахилгаан станцын зүүн талд “Гоё тараг” үйлдвэрийн хойд/ байранд 09:00-18:00 цаг хүртэл болно.