2017-2018 оны хичээлийн шинэ жил болж буйтай холбоотойгоор Улсын Их Хурлын гишүүн Баагаагийн Баттөмөр өнөөдөр /2017.08.31/ тойргийнхоо буюу Дархан сумын 4-9, өргөө багийн нийт 50 гаруй бага ангийн сурагчдад хичээлийн хэрэгсэл, цүнхийг бэлэглэлээ.
Эдийн засгийн хүндрэлтэй энэ үед зорилтод бүлгийн өрхүүдэд дэмжлэг үзүүлж, хүүхэд багачуудад сурч боловсрох, эрдэм боловсрол эзэмших чин хүслийг төрүүлсэн энэ ажлыг Улсын Их хурлын гишүүн маань 2 дахь жилдээ зохион байгуулж байгаад эцэг эхчүүд болон сурагчдын зүгээс талархан хүлээн авч байна.
Энэ үеэр Улсын Их Хурлын гишүүн Б.Баттөмөр:- “Аймгийн хэмжээнд Ерөнхий боловсролын сургууль, цэцэрлэгийн хүртээмж, орчин нөхцлийг сайжруулахын тулд Улсын Их Хурлын гишүүд, аймаг орон нутгийн удирдлагууд хамтран ажиллаж байгаа бөгөөд ирэх жилүүдэд цэцэрлэг, сургуулийг шинээр нэмж байгуулахаар хэлэлцэж байгаа.” гэлээ.
Өнгөрсөн хичээлийн жилд Дархан хотод 25 цэцэрлэгийн шинээр ашиглалтад оруулсан юм. Харин энэ хичээлийн жилд Шарын гол сумын 2 дугаар цэцэрлэгийг өргөтгөх, сургуулийн дутуур байрыг засварлах зэрэг боловсролын салбарт хэд хэдэн бүтээн байгуулалтын ажлыг төлөвлөжээ.
