Хэрлэн гол нь Бурхан Халдуны баруун хойдох уулын амнаас эх авч Багануур, Төв аймгийн Мөнгөнморьт сум, Хэнтий, Дорнодын нутгаар урсан хил давдаг. Сүүлийн өдрүүдэд Дорнод аймгийн нутгаар урсдаг хэсэгт ногоон замаг ихэсч, усны түвшин эрс багасчээ.
Үүнийг дагаад загас үхэж эхэлсэн байна. Дорнод аймгийн нутгаар урсан өнгөрдөг хэсэгт энэ оны 4-р сард хэмжилт хийхэд усны түвшин олон жилийн дунджаас доогуур байсан бол 5-р сараас эхлэн 14-37 см-ээр багассан аж. Усны түвшин багасмагц замаг ургах орчин бүрдэж, замаг ихээр ургаснаар эрдэсжилт, хатуулаг ихэсч, ууссан хүчилтөрөгчийн хэмжээ багасдаг байна.
Хан Хэнтийн цогцолбор газарт 21 хоногийн турш ойн түймэр ассан. Хэрлэн голын эх дээр 14 жижиг гол горхи бий. Түймрийн нөлөөнөөс эдгээрийн зарим нь ширгэсэн байх магадлалтай хэмээн албаныхан үзэж байна. Түүнчлэн энэ зуны аагим халуунд малчид олноороо Хэрлэн голыг бараадан бууж, бод мал нь голд орж зогсдог, өтгөн шингэн нь голын усанд холилдсоноор азот нитритийн хэмжээг ихэсч голын ус бохирдож, ийнхүү татрах болсон хэмээн үзэж байгаа аж.