Өнгөрсөн арав хоногийн хугацаанд 2473 төгрөг байсан ам.долларын ханш өнөөдөр буюу гуравдгаар сарын 02-ны өдрийн байдлаар 13 төгрөгөөр буурчээ.
Тодруулбал, “Найман шарга” валютын арилжааны төвд нэг ам.долларыг 2460 төгрөгөөр авч, 2474 төгрөгөөр худалдаалж байна.
Харин арилжааны банкууд нэг ам.долларыг 2460 төгрөгөөр авч, 2476 төгрөгөөр худалдаалж байна.
Монголбанкнаас тогтоосон хамгийн сүүлийн буюу гуравдугаар сарын 1-ны байдлаар нэг ам.долларыг 2470 төгрөгөөр худалдах, худалдан авахаар тогтоожээ.
Өнгөрсөн онд өсөлттэй байсан ам.долларын ханш тогтвортой, цаашид буурах хандлагатай байгаа гэдгийг эдийн засагчид онцолж байгаа юм. Учир нь Монгол Улсын Засгийн газар эдийн засгаа тогтворжуулах, сэргээхийн тулд ОУВС-ийн Өргөтгөсөн санхүүжилтийн хөтөлбөрт хамрагдах эхний алхмаа хийсэн. Хэлэлцээрийн хүрээнд эхний ээлжид 440 сая ам.доллар орж ирнэ гэсэн тооцоо байгаа учраас ам.долларын ханш суларч магадгүй гэдгийг хэлж буй. Гэвч ОУВС-ийн хөтөлбөрт хамрагдах хэлэлцээрийн эцсийн шийдвэр гараагүй ч ам.доллар буурч эхэлж байгаа нь эдийн засагт эерэг үзүүлэлт гэдгийг зарим эдийн засагчид онцолж байна.