Өмнөд Солонгосын ерөнхийлөгчийг огцруулах хэмжээнд хүрсэн авлигийн хэргийн гол зангилаа гэгдэж буй Чой Сун Шил гэгч эмэгтэйг шүүх хурал өнөөдөр эхэлж буй талаар тус улсын Ионхап агентлаг мэдээлжээ. Сөүл хотын дүүргийн шүүхэд болох шүүх хуралд ерөнхийлөгч Пак Гын Хэгийн дотны найз биеэр оролцох талаар түүний өмгөөлөгч хэлсэн байна. Түүний хамт хэрэгт холбогдсон Пакын хоёр туслах шүүх хуралд ирэх эсэх нь тодорхойгүй байгаа ажээ.
Тэднийг албан тушаалаа урвуулан ашиглаж дотоодын томоохон компаниудад дарамт үзүүлж, өөрсдийн тэргүүлдэг ашгийн бус санд мөнгө төвлөрүүлсэн, төрийн нууц задруулсан хэрэгт буруутгаж байгаа юм.