Ардчилсан намынхан намын дүрмээ өөрчлөхгүй бол ирэх оны Ерөнхийлөгчийн сонгуульд ялалт байгуулж чадахгүй гэж олон хүмүүс үзэж байна. Намын гишүүдийн дунд ч үүнийгээ ил хэлдэг болсон. Дүрмийн гажуудаад байгаа нэг зүйл нь орон нутагт байгаа намын нөхдөөс авахуулаад төрийн өндөр алба эрхэлж байгаа бүх хүмүүсээсээ санал асуулга авалгүй бүх үйл ажиллагаагаа шийдэж байгаа явдал юм. Тэгвэл Ерөнхийлөгчийн сонгуульд нэр дэвшүүлэх хүнээ одоогийнх шиг Үндэсний Зөвлөлдөх хорооны хурлаар шийдэх бус бүх нийтээр дэмжих ёстой хэмээн ихэнх гишүүд нь үзэж байгаа аж.
Өчигдөрхөн Н.Алтанхуяг “Манай Засгийн газраас хойш явагдаж байгаа үйл ажиллагааг хараад зүгээр сууж чадахгүй боллоо. Улс орны нөхцөл байдал, дураараа авирлаж буй үйл ажиллагаа, хууль ёсыг гажуудуулдаг, бизнесийг дарамталдаг боллоо. Үүнийг зүгээр хараад сууж чадахгүй учир Ерөнхийлөгчийн сонгуульд нэрээ дэвшүүлэхээ мэдэгдлээ” гэсэн юм.
Гэхдээ энэ бол хувийнх нь шийдвэр юм. Хуулиараа бол Ерөнхийлөгчийн сонгуульд намаасаа нэр дэвших учиртай. Тиймээс түүнийг намаас нь дэмжих үү гэдэг эргэлзээтэй. Тамгын газрын даргаар ажиллаж байсан П.Цагаан ч тус намаас нэр дэвших яриа нисч буй.
Тэд энэ сарын 16-нд Үндэсний зөвлөлдөх хороогоо хуралдуулж, үндсэн дүрмээ шинэчлэх ажлын хэсгийг байгуулж намынхаа Их хуралд бэлдэх гэнэ. Ингэснээр ирэх сарын 6-нд намын Их хурлаа хуралдуулж үндсэн дүрмээ шинэчлэх юм байна. Үүгээр хэн нь Ерөнхийлөгчийн сонгуульд намаасаа нэр дэвших нь тодрох буй за.
О.ӨНӨР