Манай орны зүүн аймгуудын нутгаар өнөөдрөөс эхлэн есдүгээр сарын 2-ныг дуустал бороо үргэлжлэн орж “тайфун” гэх байгалийн үзэгдэл болно хэмээн Ус цаг уур, орчны судалгаа мэдээллийн хүрээлэнгээс мэдээллээ.
Тодруулбал, Тайфун буюу шуурга нь эх газарт 100 жилд тохиолддог байгалийн ховор үзэгдэл юм байна. Тайфун гэдэг нь нэгэн төрлийн шуурга гэж ойлгож болно. Тайфуны эхний үе шатуудад мөндөр, усархаг бороо орж, маш хүчтэй салхилдаг. Улмаар аянга цахилгаан бууж газрын нуралт үүсэх зэрэг цаг агаарын олон гамшигт үзэгдэл болох тохиолдол ч байна. Энэ удаагийн тайфун нь Номхон далай, Японы арлуудын зүүн эрэг орчимд энэ сарын 23-нд үүссэн аж.
Энэхүү тайфун нь Японы арлыг дайран энэ сарын 31-нд буюу Владивосток орчмоор эх газар дээр гарч ирэн эрч нь сулраад байгаа юм байна. Манай орны зүүн талд тулж ирээд, аажмаар нутгийн зүүн өмнө тал руу шилжин есдүгээр сарын 3-ныг хүртэл байрлах гэнэ.
Гэхдээ арлын орнуудад нөлөөлдөг шиг хор хөнөөл нь манай оронд үзэгдэхгүй. Манайд цаг агаарын энэхүү үзэгдэл анх удаа ажиглагдаж байгаагаараа онцлог юм байна. Энэ үеэр зүүн аймгуудын нутгаар 2-3 хоног бороо үргэлжлэн орох төлөвтэй байна. Салхины хүч 5-10 м/сек, зарим тохиолдолд 16-18 м/сек хүрнэ. Иймд,ард иргэд энэ өдрүүдэд анхаарал болгоомжтой байх хэрэгтэй юм.