ШӨХТГ-аас сүүлийн үед хийж буй хяналт, шалгалтын ажлуудынхаа талаар мэдээлэл хийлээ. Тухайлбал, банк, даатгал, нотариат, эмнэлэг, зорчигч тээврийн нэгтгэл, сонгуулийн зар сурталчилгааны хууль, нийтийн зориулалттай ашиглаж байгаа орон сууцны барилгад мансардны давхар төлөвлөн барих, тухайн барилга ашиглалтад орсны дараа өмчлөх эрхийн гэрчилгээ олгогдоогүй байгаа талаар мэдээлэв. Энэ үеэр ШӨХТГ-ын дарга Д.Мөнхтөр “Шударга өрсөлдөөн хэрэглэгчийн төлөө газраас 11 банк, 14 даатгал, найман тойргийн нотариатад шалгалт хийсэн. Шалгалтын явцад банкууд ипотек болон бусад төрлийн зээл олгохдоо зээл авч буй иргэнд өөрийн сонгосон даатгал нотариатаас үйлчилгээ авахыг тулгаж байсан зөрчил илэрсэн. Энэ 11 банкинд нэг сарын хугацаатай албан шаардлага хүргүүлсэн байгаа. Сарын хугацаанд зөрчлөө арилгаж, иргэний сонгох эрхийг нээж өгөхгүй бол хуулийн дагуу хатуу хариуцлага тооцно.
ШӨХТ-аас 2016-2017 оны хичээлийн жилд их, дээд сургуулиудыг сургалтын төлбөрөө нэмэх эсэхээ энэ хичээлийн дуусахаас өмнө мэдэгдэхийг шаардсан. Одоогоор манайд ямар ч сургуулиас мэдэгдэл ирээгүй байгаа. Их дээд сургуулиудын төлбөр 2016-2017 оны хичээлийн жилд нэмэгдэхгүй гэж ойлгож байгаа” гэв.