Засгийн газраас АСЕМ-ын Дээд түвшний 11 дүгээр уулзалт, АСЕМ-ын 20 жилийн ойн арга хэмжээг зохион байгуулах ажлын хүрээнд гуравдугаар сарын 1-нийг АСЕМ-ын өдөр болгон зарласан юм. Мөн энэ өдөр АСЕМ-ын Мэдээллийн төвийг МОНЦАМЭ агентлагийн байранд нээж, ГХ-ийн сайд Л.Пүрэвсүрэн мэдээлэл өгсөн.
Энэ үеэр тэрбээр сэтгүүлчдийн асуултад хариулахдаа “АСЕМ-ын уулзалтаар дотоодын аж ахуйн нэгжүүдээ дэмжиж ажиллах талаар анхаарал хандуулж байгаа. Өнгөрсөн оны сүүлчээр АСЕМ Экспо нэртэй дотоодын үйлдвэрлэгчдийн барааны үзэсгэлэнг гаргасан. Зочид буудлын өрөөнд тавигдах саван, шампуниас эхлээд бүх л зүйлийг Монголд үйлдвэрлэсэн барааг хэрэглэнэ. Мөн дээд хэмжээний уулзалтын үеэр нийслэлчүүдийг хотоос гарч хөдөө явахыг хотын захиргаа уриалсан гэдэг бол ташаа мэдээлэл юм. Наадмын дараа манайхны амралт эхэлдэг онцлогтой. Тийм учраас бид АСЕМ зохион байгуулах өдрийг сонгохдоо олон хүчин зүйлийг харж үзсэн. Энэ үеэр иргэд амраад хөдөө гарсан, аймаг, сумын наадам эхэлсэн байдаг. Бид хотоос гадуур урлаг соёлын арга хэмжээ зохион байгуулна. АСЕМ-ын арга хэмжээний үеэр иргэдээ хөөсөн үйл ажиллагаа явуулахгүй” хэмээсэн байна.