Жалханз хутагт Дамдинбазар сангийн тэргүүн Ц.Эрдэнэбат
Бид 1990 онд ардчилал гэж орилж үймж байхдаа улмаар өмч хувьчлаад олон арван үйлдвэрийг байхгүй болгосноор өнөөдөр ажилгүйчүүдийн эгнээ өсч, хямралд өртөж байна. Хэрэв 1990-ээд оноос өмнөх шиг Шевретийн үйлдвэр нь арьс ширээ боловсруулж байсан бол энэ жилийнх шиг арьс ширний үнэ унахгүй. Гутлын болон савхин жижиг эдлэлийн үйлдвэрээр дамжаад бүтээгдэхүүн болж, бүр ашигтай байх байлаа. Үйлдвэрийн олон мянган ажилчин ажилгүй болж, Монгол Улсыг эдийн засгийн талаар бусдаас хараат болгоход дэмжлэг үзүүлчихээд, эцэст нь улс орон хөгжлийн гарцгүй суухад хүрлээ.
Хүн болгон уул уурхайд л найдвар тавьдаг болжээ. Газрын баялаг бол дахин нөхөгддөггүй, шинээр бий болдоггүй тул ухаад л хоосон шороо үлддэг. Дээр нь ус, бэлчээр сүйтгэж, орхидог ч ард түмэнд юу ч нялздаггүй. Тийм учраас баялгийн хараал гэсэн үг гараа биз ээ. Ашигт малтмал хөгжлийг авчрахгүй. Яагаад гэхээр манайд боловсруулах үйлдвэр байхгүй.
Улс орнуудыг ажиглаад байхад өөрийн хийж чаддаг нэг зүйлээрээ дэлхийд тэргүүлж чадсанаар амжилтад хүрч байх юм. Герман гэхэд Бенз машин, техникийн үйлдвэрлэл, Япон гэхэд электроник, Орос гэхэд цэргийн техник зэвсэг, сүүлийн үед Энэтхэг компьютерийн салбарт толгойлж байх жишээтэй. Харин Монголд дэлхийд танигдсан брэнд байна уу гэхээр хариулахад хэцүү.
Эрх баригчдын амин хувиа бодсон, буруу бодлого эдийн засгийг сөхрүүлэхэд хамгийн их нөлөөлж ирэв. Би Хөвсгөл аймгийн хүн. Манай аймгаас УИХ-д бие даан нэр дэвшигч гишүүн 2014 онд Монгол Улсын хоёр дахь Ерөнхий сайд Жалханз хутагт Дамдинбазарын 140 жилийн ойгоор 120 сая төгрөгийг хөшөө босгуулах талбай засуулахад зарцуулж байгаа юм. Гэтэл Жалханз хутагтын хөшөө Цагаан-Уул сумын нутагт орших өөрийн хийдийн туурин дээр байдаг. Тэгээд ч зогсохгүй хөшөөгөө Мөрөнгийн төвд нээчихээд, хэд хоноод буулгачихсан. Яасан бэ гэхээр “Хөшөөний дээл сольж байгаа гэнэ” гэсэн яриа сонсогдсон. Энэ мэтээр төсвийн хөрөнгийг үргүй зарах нь хэрээс хэтэрсэн тул Монгол Улс хөгжихгүй байгаа юм. Хувийн эрх ашгаа улсынхаас дээгүүр тавьдаг, хуйвалдсан талцсан улстөрчдийг ахин төрөөр тоглуулмааргүй байна.
Хэлэх эрхийн индэрт оролцон үзэл бодлоо илэрхийлэхийг хүсвэл 95260351 дугаарын утсаар холбоо барина уу.