УИХ-ын намрын чуулган ирэх баасан гаригт хаалтаа хийхээр товлоод байна.
Энэ удаагийн намрын чуулганаар нэлээд олон хуулийн төсөл хэлэлцэн батлаад буй. Онцолбол, Сонгуулийн тухай хуулийг баталж, тойргийн маргааныг эцэслэн шийдвэрлэсэн юм. Үлдсэн хугацаанд хэд хэдэн чухал хуулийн төслийг намрын чуулганаар багтааж батлахын тулд яаравчилж эхэлжээ. Төрийн албаны тухай хуульд өөрчлөлт оруулах тухай хуулийн төсөл, Эрүүгийн хуулийн болон Зөрчлийн тухай шинэчилсэн найруулга, Үндсэн хуулийн цэцийн гишүүнийг эгүүлэн татах талаарх Улсын дээд шүүхийн санал, “Зарим газар нутгийг улсын тусгай хамгаалалтад авах тухай” УИХ-ын тогтоолын төсөл, “Гацууртын ордын төрийн эзэмшлийн хувь тогтоох тухай” УИХ-ын тогтоолын төслийг энэ долоо хоногт багтаан эцэслэж магадгүй байна.
Энэ удаагийн намрын чуулганыг завсарлуулаад, ахин нэг чуулган үлдэж байна. Тиймээс хэлэлцэх чухал асуудлаа сонгуулиас өмнө батлахын тулд ээлжит бус чуулган зарлан хуралдаж магадгүйг гишүүд хэлж буй юм.