НҮБ-ын мандат дор хилийн чинадад үүрэг гүйцэтгэж буй манай цэнхэр дуулгатнууд есдүгээр сарын 5-нд буюу ирэх ням гаригт эх орондоо ирэх юм байна. Афганистан улсад есөн сарын турш эх орныхоо өмнө хүлээсэн үүргээ нэр төртэйгээр гүйцэтгээд ирж буй энхийг сахиулагчид уг нь наймдугаар сарын 20-нд Улаанбаатарт газардах ёстой байсан. Гэвч БНХАУ Чөлөөлөх дайны 70 жилийн ойн арга хэмжээний улмаас нислэг хойшлогдсон байна. Тодруулбал Хятад улс 17 улсын цэрэг дайчид нэг дор цугларсан эл өдрүүдэд агаарынхаа хилээр байлдааны онгоц нэвтрүүлэх хүсэлгүй байсантай холбоотой гэдгийг албан бус эх сурвалж мэдээлж байгаа юм.