Монголын үндэсний бөхийн холбооноос өнөөдөр хэвлэлийн бага хурал зарлаж, үндэсний их баяр наадмаар зүүний магнайд Г.Өсөхбаяр, А.Сүхбат аваргын хэн нь гарах вэ гэдэг дээр байр сууриа илэрхийллээ. Өнгөрсөн жил амжилтаараа Г.Өсөхбаяр аварга зүүнийг манлайлах шийдвэр гаргасан юм. Гэтэл А.Сүхбат аварга зүтгэсээр зүүний магнайд гарч байв. Г.Өсөхбаяр аваргын хувьд тухайн үед ард түмнээ хүндлээд баруун жигүүрт гарсан аж. Харин энэ жил хууль дүрэм, ёс журмынхаа дагуу явна гэж Үндэсний бөхийн холбооноос мэдээлэв. Тэгэхээр энэ жил зүүний магнайг Г.Өсөхбаяр манлайлах нь тодорхой болжээ. Үндэсний их баяр наадмын үндэсний бөхийн барилдааны дүрмийн 3.6.1-д “ Ижил цолтой бөхчүүдээс тухайн цолны болзлоо олон биелүүлснийг, энэхүү нөхцөл ижил байвал доод давааг олон давсныг эхэнд нь… эрэмбэлнэ” гэж заажээ. Энэ заалтаар бол Г.Өсөхбаяр даян аварга цолтой байхдаа Г.Сүхбатын өмнө эрэмбэлэгдэх ёстой юм байна. “Г.Өсөхбаяр амжилтын хувьд гурван удаа найм давсан нь Г.Сүхбатын өмнө эрэмбэлэгдэх нь тодорхой” гэж тус холбооноос мэдээлсэн юм.