Монгол Улсад жишиг болохуйц спортын төрөлжсөн сургууль Архангай аймагт баригдаж байна. Одоогоор барилгын ажил 90 хувьтай явагдаж буй бөгөөд ирэх сард ашиглалтад орох аж. Уг сургуулийг улсын төсвийн 5.1 тэрбум төгрөгийн санхүүжилтээр Хера констракшн ХХК барьж буй. Сургууль нийт 320 хүүхдийн суудалтай бөгөөд бөхийн төрөлжсөн гурван стандарт заал, тус бүрдээ саун, халуун усны өрөөгөөр тоноглогдсон байхаас гадна бусад спортын төрлүүдийн зориулалтын өрөө тасалгаанууд зураг төслийн дагуу хийгджээ.
Спортын гүнзгийрүүлсэн сургууль нь аймгийн хэмжээнд үйл ажиллагаа явуулах учраас дэргэдээ 100 хүүхдийн ортой дотуур байрыг ашиглалтанд оруулах юм. Дотуур байр нь дэд бүтцэд холбогдсон, тохилог өрөө тасалгаа, зориулалтын хоолны заал, номын сантай байх аж. Мөн сургуулийн гадна 5 га газарт спортын зам талбайг иж бүрнээр нь тохижуулах юм байна.