Улсын Дээд шүүхийн хяналтын шатны эрүүгийн хэргийн шүүх хуралдаанаар өчигдөр төрсөн хоёр хүүхдээ машинд түгжин шатааж, амь насыг нь хохироосон З.Ёндонд холбогдох хэргийг хянан хэлэлцжээ. Шүүхээс анхан болон давж заалдах шатны шүүхээс түүнд оногдуулсан 25 жилийн хорих ялыг хэвээр үлдээв.
Хэргийг сануулахад, З.Ёндон нь 2014 оны 5 дугаар сарын 15-ны өглөө 7 цаг 30 минутын үед “10-08” ОРА улсын дугаартай “Бонго пронтер” маркийн ачааны автомашинд 10 сар, 5 настай хоёр хүүхдээ суулгаж, машины кабин руу бензин цацаж, хохирогч нарыг биеэ хамгаалж чадахгүй гэдгийг мэдсээр байж, нийтэд аюултай, онц харгис хэрцгий аргаар санаатай галдан шатааж амь насыг нь хохироосон гэмт хэргийг үйлджээ. Мөн 2014 оны 5 дугаар сарын 14-ний орой 23 цагийн орчим согтууруулах ундаа хэрэглэсэн үедээ Орхон сумын 1 дүгээр багийн нутаг “Хөшөөт” гэх газар гэрийнхээ гадаа эхнэр А-г зодож биед нь хөнгөн гэмтэл учруулсан аж.