Монголбанкны Хяналтын зөвлөлийн ээлжит хурлаар тус банкны эрсдлийн удирдлагын байдал, авч хэрэгжүүлж буй ажлын үр дүнг хэлэлцжээ.
Хурлын эхэнд зөвлөлийн гишүүн Я.Эрхэмбаярын сонсголыг хэлэлцэж Олон Улсын төлбөр тооцооны банкнаас гаргасан зөвлөмжийн дагуу зохистой засаглал, дотоод аудит, эрсдлийн удирдлага, нийцлийн чиг үүргийг багтаасан Монголбанкны дотоод хяналтын чиг үүргийг бүрдүүлэх, эрсдлийн удирдлагын албаны үйл ажиллагааны хамрах хүрээг өргөтгөх боломжийг судлан холбогдох арга хэмжээ авахыг даалгасан байна.
Мөн “Мөнгөн тэмдэгтийн хүчин төгөлдөр эсэхийг тодорхойлох, гэмтэж муудсныг солих, устгах ажлыг зохион байгуулж буй ажлын талаар” Мөнгөн тэмдэгт, үнэт зүйлсийн газрын захирал П.Сүхбаатарын сонсголыг хэлэлцээд мөнгөн тэмдэгтийг захиалж хэвлүүлэх, хуучин муудсаныг гүйлгээнээс татах , устгах үйл ажиллагааг эрсдэлд суурилсан зарчмаар зохион байгуулахаар тогтжээ.
Улмаар тогтолцоонд шилжүүлэх боломжийг судалж хэрэгжүүлэх, мөнгөн тэмдэгтийг зориулалтын дагуу гамтай хэрэглэх соёлд иргэдийг сургах чиглэлээр сурталчилгааны ажил явуулахаар болсон байна.
Мөн үеэр Завхан аймаг Дахь Монголбанкны салбарын ажилтай танилцсан тухай Хяналтын Зөвлөлийн гишүүн Х.Ганбаатарын мэдээллийг сонсон төрийн хяналтад байх объектийн жагсаалтад Монголбанкны салбарыг хамруулах арга хэмжээ авч ажиллахыг Монголбанкны Ерөнхийлөгчид зөвлөжээ.