Сүүлийн үед Хятад улсаас оруулж ирж байгаа мотоцикль чанарын шаардлага хангахгүй байна, хүмүүс осолдож амиа алдаж буй талаар мэдээлэл их цацагдах болсон. Үүнтэй холбогдуулан МХЕГ Зам тээврийн яам, Замын цагдаагийн газар, Гаалийн ерөнхий газар зэрэг байгууллагуудтай хамтран импортоор оруулж ирж байгаа мотоцикль болон иргэдийн гомдол энэ төрлийн тээврийн хэрэгслийн дугаар олголт, ашиглалтын талаар судалгаа хийжээ.
Замын цагдаагийн газраас ирүүлсэн мэдээллээр 2013 онд улсын хэмжээнд мотоцикльтой холбоотой осол, зөрчил 330 удаа гарсан байна. Эдгээр осол нь бүгд Хятад улсад үйлдвэрлэсэн мотоцикль ашигласнаас үүдэлтэй гэнэ. Үүний улмаас нийтдээ 112 хүн амиа алдаж, 191 хүн бэртэж, эд хөрөнгөөрөө хохирчээ. Ослын шалтгааныг тодруулахад дийлэнх нь ашиглалтын нөхцөлд тохироогүй уул хадтай, бартаа ихтэй газар, хурд тааруулж яваагүйгээс үүдэлтэй байсан аж. Мотоциклийн обуд хугарч, цуурах, тасарсны улмаас онхолдсон 170 осол гарсан нь нийт ослын 51.5 хувийг эзэлжээ. Мөн осолдсон хүмүүсийн дийлэнх нь ослоос хамгаалах хувцас хэрэгсэл өмсөөгүй, согтууруулах ундаа хэрэглэсэн, 72 хувь нь мотоциклио улсын бүртгэлд бүртгүүлээгүй байжээ. Манай улс өнгөрсөн онд 17 орноос 36.9 мянган мотоцикль импортолжээ. Энэ онд гэхэд 6.1 мянган мотоцикль оруулж ирнээс 97 хувь нь хятадынх гэнэ.
Э.Эрдэнэ