Month: June 2024

Үерээс урьдчилан сэргийлэх ажлын хүрээнд үерийн хамгаалалтын барилга байгууламжийн далан сувгийн лаг, хагшаасыг цэвэрлэж, ус чөлөөтэй урсах нөхцөлийг бүрдүүлэн ажиллаж байна.

Үерийн далан, суваг нь бидний амь нас, эд хөрөнгийг болзошгүй байгалийн гамшиг үерийн аюулаас хамгаалдаг. Иймд иргэд та бүхэн үерийн хамгаалалтын барилга байгууламжид хогоо хаяхгүй байхыг уриалж байна.

Засгийн газраас “Боомтын сэргэлт” бодлогоор Дорноговь аймгийн Замын-Үүд боомтыг эдийн засгийн чөлөөт бүс, хуурай боомт болгон хөгжүүлэхийг зорьж, ТЭЗҮ, зураг төслийг боловсруулж байна.

Монгол Улсад Замын-Үүд, Улаанбаатар хот, Хөшигийн хөндий, Алтанбулаг, Сайншанд, Бичигт, Чойбалсан, Ховд гэсэн 8 байршилд хуурай боомтыг хөгжүүлэхээр тодорхойлоод байгаа. Ингэхдээ төр, хувийн хэвшлийн түншлэлээр хуурай боомтуудад ачаа тээврийн ложистикийн терминал, төвүүдийг байгуулах юм. Замын-Үүд боомт нь эдийн засгийн төв коридорын зангилаа, гурван улсыг холбох төв гэдгээрээ онцлогтой. Уг боомтын хүчин чадлыг өргөтгөх шинэчлэлийг бүрэн дуусгаж, 9500 м2 талбай буюу шалган нэвтрүүлэх цогцолборыг 8 дахин томруулж, зорчигч тээврийн 30, ачаа тээврийн 28 барилга, дэд бүтцийг өргөтгөөд байна.

“Замын-Үүд нь дэлхийн том зах зээл болох БНХАУ-д ойр, стратегийн хамгийн ашигтай байршилтай Тяньжин боомтоос ачаа хүлээн авах боломжтой учир төмөр зам, автотээврийн хоршил сайтай гэдгээрээ бусад боомтоос давуу талтай. Харин чингэлэг овоолгын талбай, гаалийн баталгаат агуулах хүрэлцээгүйгээс сүүлийн жилүүдэд Тяньжин боомтоос чингэлэг татах, тээвэрлэлтийн ачаалал ихэссэнээр тээврийн өртөг нэмэгдэх, ачаа татах нь удааширсан. Энэ нь ачаа буулгах техник, дэд бүтэц, логистикийн нөхцөл, хүчин чадал сул байгаатай холбоотой. Хуурай боомтоо хөгжүүлснээр үүнийг шийдэх боломжтой”-г Боомтын Сэргэлтийн Үндэсний Хороо мэдээллээ.

Өнгөрсөн онд нийслэлийн хэмжээнд 14 иргэн гол, усанд осолдож амиа алдсан. Үүнээс том хүн 9, гурван хүүхэд байна. Алба хаагчид 36 иргэнийг /12 хүүхэд, 24 том хүн/ гол, усны ослоос авран хамгаалж ажилласан.

Иргэдийн Туул, Тэрэлж, Хэрлэн гол дагуу иргэдийн зорчих хөдөлгөөн нэмэгдэж, аялал зугаалгын үе эхэлсэнтэй холбогдуулан дараах зөвлөмжийг хүргэж байна.

Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнийгээ бүртгэдэг байх,

Хүүхдийг гол горхи, нуур, цөөрмийн ойр тоглуулахгүй байх

Согтууруулах ундаа хэрэглэсэн үедээ гол усанд орохгүй байх

Булчин, шөрмөс татсан үед гол усанд орохоос татгалзах

Хийлдэг гудас, завьтай голд орохгүй байх

Гол горхи, нуурын ус гатлахдаа зориулалтын баталгаат зам гүүрээр зорчих

Голын эрэг дагуу байрласан сануулга, самбаруудыг анхаарч аюулгүй байдлаа хангаж, гол, усны ослоос сэргийлэхийг нийслэлийн Онцгой байдлын газраас анхааруулж байна.

Энэ сарын 1-ний өдрөөс эхлэн хот, нийтийн аж ахуйн ажилчдын цалин 1000 ам.доллар буюу 3.5 сая төгрөг болж буй. Үүнтэй холбоотойгоор нийслэлийн удирдах ажилтнуудын шуурхай зөвлөгөөний үеэр хотын дарга Х.Нямбаатар ирэх долдугаар сарын 1-ний өдрөөс эхлэн тохижилт үйлчилгээний компаниудын тендерийг дахин зарлана гэдгийг хэллээ.

Тэрбээр “Өнөөдрийн байдлаар ТҮК-иудын 70 хувь нь хот тохижилт, ЗАА, дүүргийн удирдлагад ажиллаж байсан хүмүүсийн хувийн компани байдаг. Хот зардлыг нь нэмсэн ч гуйлгаж ажил хийдэг. Одоо ийм асуудал байхгүй, бизнесийн зарчмаар явна. Мөн ирэх жилээс тоног төхөөрөмжийн зээл олгож эхэлнэ. Тиймээс ажил хийе гэдэг сэтгэлтэй компаниуд нь ажлаа хийгээд явна. Тендерт одоо ажиллаж байгаа компаниуд оролцох боломжтой” гэлээ.

Дотоодын цэргийн 05-р ангийн алба хаагч машинд дайруулж амиа алдсан харамсалтай хэрэг бүртгэгджээ.

Энэ талаар цагдаагийн байгууллагаас “Энэ сарын 30-нд 21:40 цагт дотоодын цэргийн 05-р ангийн албан хаагч нас барсан гэх дуудлага мэдээлэл цагдаагийн байгууллагад бүртгэгдсэн. Шалгалтын ажиллагаа үргэлжилж байна” гэв.