Month: September 2023

Экологийн цагдаагийн албанаас тарваган тахал, хүн малын гоц халдварт өвчнөөс урьдчилан сэргийлэх чиглэлээр хяналт шалгалтын ажлыг улсын хэмжээнд эрчимжүүлж ажилласнаар дараах зөрчлүүдийг илрүүлэн, цаашид үүсэх ноцтой үр дагавраас сэргийлж, холбогдох арга хэмжээг авлаа.

Орон нутаг дахь экологийн асуудал хариуцсан алба хаагчид чиг үүргийн байгууллагуудтай хамтарсан болон бие даасан эргүүл, хяналт шалгалт зохион байгуулж байна.

Тухайлбал, Завхан аймгийн Их-Уул сум 6 ш, Өвөрхангай аймгийн Уянга сум 2 ш, Баянхонгор Эрдэнэцогт сум 10 ш, Хөвсгөл аймгийн Бүрэнтогтох сум 38 ш, Ховд аймгийн Алтай сум 12 ш, Баян-Өлгий аймгийн Дэлүүн сум 16 ш, Булган аймаг 1 ш, тус аймгийн Хутаг-Өндөр суманд 2 ш, Улаанбаатар хотын Баруунтуруун шалган нэвтрүүлэх цэгээр 2 ш, Эмээлт дахь шалгах нэвтрүүлэх цэгээр 12 ш, /лаазалсан/ тарваганы мах 11 ш, нийт 112 ш тарвага хууль бусаар агнасан, тээвэрлэсэн зөрчлийг илрүүлэн шалгаж байна.

Ард иргэдэд тарвага агнах, тарваганы мах болон эд эрхтнийг бусдад худалдах, худалдан авах, тээвэрлэх гэх мэт хэнэггүй, хайхрамжгүй үйлдлээр өөрийгөө болон бусдыг эрсдэлд оруулахгүй байхыг Экологийн цагдаагийн албанаас анхааруулж байна.

“Хүүхдийг нь зодсон гэх шалтгаанаар аав нь багш нарыг зодож байна” гэх тайлбар бүхий бичлэг нийгмийн сүлжээнд өчигдөр цацагдсан. Тэгвэл тухайн бичлэг нь энэ оны наймдугаар сарын 29-ны өдөр Малайз улсад болсон гэдгийг цагдаагийн байгууллагаас мэдээллээ. Тодруулбал, уг бичлэг  Малайз улсын хүүхэд асрах төвд дөрвөн настай хүүг багш нь зодож байгаа дүрс бичлэг CCTV дэх камерт өртжээ. Асран хамгаалагч нь тус бичлэгийг үзэж, улмаар хүүхэд асрах төвийн хоёр багшийн биед халдсан байна.

Иргэдийг цахим сүлжээнд зураг, бичлэг нийтлэхдээ эх сурвалжийг дурдаж, олон нийтэд ташаа мэдээлэл түгээхгүй байхыг цагдаагийн байгууллагаас зөвлөж байна.

Нийслэлд 35 гаруй оршуулгын зөвшөөрөлтэй болон зөвшөөрөлгүй газрууд үйл ажиллагаа явуулж байна. Үүнтэй холбоотойгоор зөвшөөрөлгүй оршуулгын газруудыг нүүлгэн шилжүүлэх ажлыг жил бүр зохион байгуулдаг. Оршуулгын газруудад метан хийн ялгарал их байдаг учраас тэр хавьд оршин сууж буй хүмүүсийн эрүүл мэнд, аюулгүй байдалд сөргөөр нөлөөлөх магадлалтай. Иймд хотоос зайтай байлгах зайлшгүй шаардлага үүсдэг байна.

Энэ талаар Улаанбаатар хотын ерөнхий менежер бөгөөд Захирагчийн ажлын албаны дарга М.Баяраа “Одоогийн байдлаар манай улсад оршуулгын үйл ажиллагаа 2005, 2018 онд батлагдсан журмаар зохицуулагддаг аж. Нэг үгээр хэлбэл бие даасан хууль байдаггүй. Жишээ нь эмнэлгээс гаргасан шарилыг хаашаа шилжүүлэх вэ, дараа нь ямар зан үйл хийгдэх вэ гэдэг нь ойлгомжгүй байдаг. Талийгаачийг оршуулах нь бизнес байж болохгүйг хувийн байгууллагуудад хэлж, шаардлагаа тавьж байна. Амьжиргааны түвшнээс доогуур орлоготой өрхүүдэд нийгмийн даатгалаас 1000000-2000000 төгрөгийг оршуулгын зардалд олгох ажлыг зохион байгуулах шаардлагатай. Үүнийг хувийн байгууллагуудтайгаа ярилцаж, гэрээнд нь тусгаад явна гэж үзэж байгаа. Далан давхрын оршуулгын газрын тодорхой хэсэгт тохижилтын ажил хийж байна. Ар гэрийнхнээс нь зөвшөөрөл аваад тухайн цэцэрлэгт хүрээлэнд талийгаачдын чандрыг байрлуулах ажил хийгдэж буй. Уг ажил 80 хувьтай үргэлжилж байна. Түүнчлэн цагдаагийн байгууллагынхан болон бурхан болоочдод задлан хийх байгууллагууд тэр хавьд очиж байгаа” гэлээ.