Month: September 2023

Categories
мэдээ нийгэм цаг-үе

Говь-Алтай аймагт цасанд боогдсон есөн иргэнийг аварчээ DNN.mn

Сүүлийн өдрүүдэд зарим нутгаар цас орж эхэлсэн учир зам даваанд халтиргаа гулгаа үүсэж, автомашин цасанд боогдож болзошгүйг Онцгой Байдлын Ерөнхий Газар (ОБЕГ)-аас анхаарууллаа.

Тухайлбал Говь-Алтай аймгийн Есөнбулаг сумын нутаг дэвсгэрт “Баарангийн даваа” гэх газар хоёр автомашин цасанд суусан тухай дуудлага, мэдээлэл өнгөрсөн шөнийн 00:50 цагт бүртгэгдсэн байна.

Дуудлагын дагуу онцгой байдлын газрын эрэн хайх, аврах салбарын алба хаагчид 10 километр замыг туулан 01:35 цагт очиход Ховд аймгийн Жаргалант сумаас Улаанбаатар хотын чиглэлд зорчиж явсан зургаан зорчигчтой “Тоёота раум” загварын суудлын машин, гурван зорчигчтой “VOLVO FH440” загварын ачааны автомашин цасанд суусан байжээ.

Улмаар цасанд суусан машиныг хоёр цаг ажиллаж, татан гаргасныг ОБЕГ-аас мэдээллээ. 

Иймд цаг агаарын мэдээг тухай бүр хүлээн авч, цасан шуургатай үед холын замд гарахгүй байхыг нийт иргэд, олон нийтэд онцгойлон сэрэмжлүүлж байна.
Categories
мэдээ нийгэм

Монгол Улсын нийт хүн амын 8.6 хувийг ахмадууд эзэлж байна DNN.mn

Үндэсний Статистикийн Хорооны судалгаагаар 2020 онд Монгол Улсын нийт хүн амын 9.8 хувийг ахмадууд эзэлж байсан бол 2023 оны 9-р сарын 26-ны байдлаар 8.6 хувийг эзэлж байна. Энэ тоо хүн амын хэтийн тооцооллоор 2050 онд 19 хувьд хүрэх төлөвтэй байгаа юм. Нийт ахмадуудын 40.4 хувийг эрэгтэйчүүд, 59.6 хувийг эмэгтэйчүүд эзэлж буй.

Улсын хэмжээнд 100-аас дээш настай 109 иргэн байгаагаас хамгийн өндөр настан 121 настай байна.

Ахмадуудын хөдөлмөр эрхлэлтийн үзүүлэлтийг харвал 20.7 хувь нь ажил, хөдөлмөр эрхэлж байна.

Categories
мэдээ нийгэм

УЕПГ: 118 гомдол, хүсэлт гаргагчийн эрх, хууль ёсны ашиг сонирхлыг хамгаалах арга хэмжээ авлаа DNN.mn

Прокурорын байгууллага 2023 оны 9 дүгээр сарын 18-наас 22-ны өдрүүдэд хэрэг хянан шийдвэрлэх ажиллагаанд оролцогч иргэн, хуулийн этгээд болон өмгөөлөгчөөс гаргасан 209 гомдол, 124 хүсэлтийг шинээр хүлээн авч, нийт 948 гомдол, хүсэлтийг хянав.

Үүнээс 44 гомдлыг хүлээн авч, мөрдөгч, прокурорын үндэслэлгүй шийдвэр, ажиллагааг хүчингүй болгох, өөрчлөх шийдвэр гаргасан бол 74 хүсэлтийг хэсэгчлэн болон бүрэн хангаж, нийт 118 гомдол, хүсэлт гаргагчийн эрх, хууль ёсны ашиг сонирхлыг хамгаалах арга хэмжээ авлаа.

Мөн дээрх хугацаанд Нийслэлийн Дүнжингарав, Мишээл төвүүдэд ажиллаж байгаа “Прокурорын байгууллагын нэг цонхны үйлчилгээ үзүүлэх төв”-үүд нийт 8 иргэний өргөдөл, гомдлыг хүлээн авч харьяа прокурорын газарт нь шилжүүлж, 19 иргэнд прокурорын байгууллагын чиг үүрэг, үйл ажиллагаатай холбоотой зөвлөгөө мэдээллийг өгч ажилласан байна.

Categories
мэдээ нийгэм

371 км дулааны шугам засварлалаа DNN.mn

“Улаанбаатар дулааны сүлжээ” ТӨХК-ийн хувьд нэг, хоёрдугаар сард тендерийн материал бэлтгэж, дөрөвдүгээр сард холбогдох байгууллагуудтай засварын ажлын графикийн төлөвлөгөөгөө батлуулан, тавдугаар сарын 1-нээс засварын ажлуудаа хийж эхэлжээ.

Өнөөдрийн байдлаар их засвар, хөрөнгө оруулалтын нийт 17 төрлийн 2300 гаруй ажил 98 хувийн гүйцэтгэлтэй хэрэгжиж байна. Мөн тус байгууллагын зүгээс энэ жил нийт 15 төв магистралын 371 км дулааны шугам засварлажээ.

“Улаанбаатар цахилгаан түгээх сүлжээ” ТӨХК 2023 оны өвөлжилтийн бэлтгэл ажлын хүрээнд хөрөнгө оруулалт, техник зохион байгуулалтын арга хэмжээгээр нийт 110 нэр төрлийн 176 багц, 289 цахилгаан дамжуулах агаарын шугам, 2928 тоноглолд урсгал засварын ажил хийхээр төлөвлөсөн. 2023 оны урсгал засварын ажлыг гуравдугаар сарын 13-наас есдүгээр сарын 15-ны хооронд хийсэн. Харин их засвар, техник зохион байгуулалтын арга хэмжээ, хөрөнгө оруулалтын ажлыг тавдугаар сарын 1-нээс эхлүүлж, аравдугаар сарын 15-нд дуусгахаар ажиллаж байна. Одоогоор их засвар, техник зохион байгуулалтын ажлын гүйцэтгэл 87.1 хувь, урсгал засварын ажлын гүйцэтгэл 99.8 хувь, дунджаар 93.5 хувийн гүйцэтгэлтэй байна.

Categories
мэдээ үндэсний-бөx

М.Бадарч: Допингийн шинжилгээний явц хуулийн дагуу байсан эсэхэд эргэлзэж, гомдолтой байна DNN.mn

Үндэсний их баяр наадмын барилдаанд түрүүлж, Улсын арслан цол хүртсэн М.Бадарч энэ сарын 4-ний өдөр допингийн “Б” сорьцын шинжилгээ өгөх хүсэлтээ албан ёсоор гаргасан. Гэвч түүний эхний сорьцын хариу баталгаажиж, допингийн төрлийн бодис илэрсэн билээ.
Тэрбээр өөрийн цахим хуудастаа байр сууриа илэрхийлжээ.
“Монголын ард түмэн ,бөх сонирхогч та бүхэндээ энэ өдрийн мэнд хүргэе. Миний бие сүүлийн үед үүсээд байгаа надаас сэргээшийн төрлийн бодис илэрсэнтэй холбоотой асуудлаар өөрийн байр сууриа албан ёсоор 2 дахь удаагаа илэрхийлж байгаа нь энэ юм. Би монгол үндэсний бөхөөр барилдаж сонирхож хичээллээд 12 жилийг ардаа үджээ. Хүүхэд байхаасаа бусдын адилаар дээлийн ханцуйгаа ханзартал барилдаж бөх хэмээх энэ спортод эргэлт буцалтгүй сонирхон орсоноор миний амьдралын хамгийн чухал ажлын маань нэг болсоноор миний бие энэ спортод сэтгэл зүрх цаг заваа бүрэн дайчилаж өдий зэрэгт хүрсэн билээ.Энэ хугацаанд шантрах асуудлууд гарч байсан ч монголын маань өв соёл болсон үндэсний бөхөөр барилдаж өв соёлоо тээж явна гэдэг нь миний хувьд маш үнэ цэнэтэй нэр төрийн хэрэг билээ. Миний бие 2009 онд сумын начин, 2012 онд аймгийн арслан, 2017 онд улсын харцага ,2020 онд улсын гарьд 2023 онд төрийнхөө наадамд түрүүлж улсын арслан хэмээх цол авч төр, ард түмнийхээ хайр хүндэтгэлийг хүлээхийн хамтаар өөрийн олон жилийн хичээл зүтгэлийн үр дүнд олж авсандаа баярлаж талархаж явдагаа хэлэх нь зүйн хэрэг билээ.Төрийн наадамд түрүүлнэ гэдэг бол бөх хүн болгонд олдоод байдаггүй ховорхон хувь тавилан билээ харин энэ зүйлийг минь дагаад сэргээш гэх зүйл дагаж гарч ирсэнд туйлын их харамсаж байна. Би барилдах хугацаандаа улсын наадамд болон , заал танхимын барилдаанд явцын шинжилгээ байнга өгсөөр ирсэн билээ. Мэдээж спорт гэдэг бол шударга өрсөлдөх зарчим дээр тулгуурладаг учир шинжилгээ авах асуудал дээр санал нэг байдаг билээ, харин шинжилгээ авах явц хууль журмын дагуу авсануу гэдэг дээр миний бие одоог хүртэл итгэл үнэмшил бага гомдолтой байгаа билээ. Мөн олон зүйл нурших илүүц биз ,тэртэй тэргүй нийгэмд дээрх асуудлууд одоог хүртэл эргэлзээ тээнэгэлзээ дагуулсаар байгааг та бүхэн минь надаар хэлүүлэхгүй мэдэж байгаа билээ. Иймийн тулд миний бие олон жилийн хүч хөдөлмөрөө хамгаалж, хардах эрхийнхээ хүрээнд дээрх асуудалд цаашдаа нухацтай хандах болно гэдгээ албан ёсоор мэдэгдэж байна. Мөн өдийг хүртэл цаг хугацаанд намайг дэмжиж байсан багш, гэр бүл, нутаг нугынхан, бөх сонирхогч ард түмнээсээ, мөн намайг дэмжиж туслаж байсан бүх хүмүүстээ баярлалаа гэж хэлэхийн хажуугаар уучлалт хүсэж байгааг минь хүлээн авнауу. Монгол төрийн маань алтан соёмбо сэвгүй тунгалаг байж, монгол наадам, монгол бөхийн маань ногоон дэнж сэвгүй ариун байх болтугай. Та бүхнээ хүндэтгэсэн Монгол улсын арслан М.Бадарч” гэлээ. 
Categories
мэдээ нийгэм

Т.Аюурсайхан, Б.Ганхуяг нарын 11 хүнд холбогдох хэргийг шүүх хурал өнөөдөр болно DNN.mn

Нүүрсний хулгайн хэрэгт холбогдож, яллагдагчаар татагдсан УИХ-ын гишүүн асан Т.Аюурсайхан, “Эрдэнэс тавантолгой” ХК-ийн Гүйцэтгэх захирал асан Б.Ганхуяг нарын 11 хүнд холбогдох хэргийн гэм буруугийн шүүх хурал өнөөдөр /2023.09.28/ 14:00 цагаас Чингэлтэй дүүргийн Эрүүгийн хэргийн анхан шатны шүүхэд болно.

Сануулахад, Нийслэлийн Прокурорын газраас Эрүүгийн хуулийн тусгай ангийн 22.1 дүгээр зүйлийн 1, 2 дахь хэсэг /Эрх мэдэл, албан тушаалын байдлаа урвуулан ашиглах/, 22.4 дүгээр зүйлийн 2, 4 дэх хэсэг /Нийтийн албан тушаалтан хахууль авах/, 21.2 дугаар зүйлийн 1 дэх хэсэг /Худал мэдүүлэх/, 20.3 дугаар зүйлийн 1, 3 дахь хэсэг /Зохион байгуулалттай гэмт бүлэг байгуулах, түүнд элсэх/, 22.10 дугаар зүйлийн 1, 2 дахь хэсэг /Үндэслэлгүйгээр хөрөнгөжих/, 22.5 дугаар зүйлийн 1 дэх хэсэг /Хахууль өгөх/, 18.6 дугаар зүйлийн 1 дэх хэсэгт /Мөнгө угаах/ тус тус заасан гэмт хэрэгт холбогдуулан Т.Аюурсайхан, Б.Ганхуяг, Т.Түвшинбаатар, Х.Батхишиг, О.Данзанлувсантүдэв, Б.Отгонжаргал, Г.Гантөмөр, О.Дагвадорж, И.Дагвадорж, П.Бадамханд, Б.Эрдэнэбаяр нарт яллах дүгнэлт үйлдэж шүүхэд ирүүлсэн юм.

Categories
мэдээ нийгэм

11 жилийн хорих ял авсан Б.Махбалыг хугацаанаас нь өмнө суллажээ DNN.mn

2018 онд ЗТХЯ-ны Төрийн захиргааны удирдлагын газрын дарга асан Б.Махбал нь тус яамны Хяналт-шинжилгээ, үнэлгээ, дотоод аудитын газрын дарга Т.Г-ийн аминд хүрсэн хэрэгт холбогдож, 11 жилийн хорих ял авсан.

Түүнийг Багануурын хорих ангиас өчигдөр магадлангаар сулласан байна. Ингэснээр оноосон ялын хугацаанаас өмнө суллагджээ.

Эрүүгийн хуулийн 50 дугаар зүйлийн 2, 4, 5, 6 дахь хэсэгт зааснаар шүүх ялтныг эдлээгүй үлдсэн ялаас хугацааны өмнө тэнсэн суллах буюу өөр хөнгөн ялаар солих журмыг зөвхөн өөрийн засарч хүмүүжсэнээ үлгэр жишээ зан төлөв, үнэнч шударга хөдөлмөрөөрөө харуулж чадсан бөгөөд шүүхээс оногдуулсан ялаас хуульд заасан хувийг нь гүйцэд эдэлсэн ялтанд хэрэглэдэг байна.

Б.Махбал хүний амь нас хөнөөсөн хэргээр ял эдэлж байхдаа “эрх мэдэл, албан тушаалын байдлаа урвуулан ашиглах” гэмт хэрэгт холбогдон Хөгжлийн Банкны шүүх хуралд яллагдагчаар татагдан оролцсон ч гэм буруугүйд тооцогдсон юм.

Categories
мэдээ нийгэм цаг-үе

“Парк шинэчлэл хийсэн тул энэ өвөл автобус хөлдөх, зогсох асуудал бага гарна” гэв DNN.mn

Нийслэлийн Нийтийн тээврийн газрын өвөлжилтийн бэлтгэл ажлыг тус газрын Тээвэр, төлөвлөлтийн хэлтсийн дарга Б.Тамир танилцуулав.

Тэрбээр “Салбарын хэмжээнд өвөлжилтийн бэлтгэл ажлын хэрэгжилт 76 хувьтай байна. Парк шинэчлэлийн буюу нөхөн хангалт төрийн хоёр аж ахуйн нэгж дээр 52 хувьтай байгаа. Есдүгээр сарын 26-ны байдлаар 80 дизель автобус шинээр орж ирсэн. Манай салбарын хувьд нийтийн тээврийн хувийн хэвшлийн баазууд бэлтгэл ажлаа хангачихсан.

Есдүгээр сарын 15-наас нийтийн тээвэр өвлийн хуваарьт шилжээд байна. Зуны цагтаа гаралтаа хасаад хэмнэлт хийсэн бөгөөд уг хэмнэсэн мөнгөө өвлийн цагтаа зарцуулна” гэлээ. Тэрбээр мөн парк шинэчлэл сайн хийж байгаа учраас өвөл автобус хөлдөх, зогсох асуудал бага гарна” гэв.

Categories
мэдээ спорт цаг-үе

Жүдочид холимог багийн төрөлд хүрэл медаль хүртлээ DNN.mn

“Ханжоу 2022” Азийн Наадмын жүдо бөхийн сүүлийн өдөр холимог багийн төрөлд хүрэл медалийн төлөө манай жүдочид БНСУ-ын багтай өрсөлдлөө.

О.Цэцэнцэнгэл, Л.Энхрийлэн, Ц.Цогтбаатар нар өрсөлдөгчөө ээлж дараалан ялснаар 3:0 харьцаагаар тэргүүлж эхэлсэн. Харин БНСУ-ын Хан Хэ Жү манай Б.Ням-Эрдэнийг иппоноор ялсан юм.

Шийдвэрлэх барилдааныг Г.Алтанбагана БНСУ-ын И Сүн Хотой хийж, цэвэр ялснаар эцсийн дүнд 4:1-ээр Монголын баг хүрэл медалийн эзэн боллоо.

Багийн төрөлд япончууд ганц ч жүдоч нь ялагдаагүй амжилтаар энэ удаагийн Азийн Наадмын багийн төрөлд итгэл төгс түрүүллээ. Мөнгөн медалийг Узбекистан, хүрлийг БНХАУ баг Казахстаны шигшээг 4:2 харьцаагаар илүүрхэж, шагналын тавцанд зогсох эрхтэй болсон юм.

Categories
мэдээ нийгэм цаг-үе

Үерийн хамгаалалтын 26.5 км сувгийг цэвэрлэлээ DNN.mn

Өвөлжилтийн бэлтгэлийн хүрээнд “Геодези, усны барилга, байгууламжийн газар” /ГУББГ/ ОНӨААТҮГ-аас шугам сүлжээний цэвэрлэгээ, худгийн засвар, нөхөн сэргээлт, шугам угсралт, үерийн хамгаалалтын барилга, байгууламжийн цэвэрлэгээ, хөргөлтийн насос станцын засвар арчлалт гэсэн таван чиглэлийн ажлыг гүйцэтгэж байна.

Нийт ажлын гүйцэтгэл 81 хувьтай үргэлжилж буй. Үерийн хамгаалалтын барилга, байгууламж, борооны ус зайлуулах шугам сүлжээний ажлын хүрээнд 117 байршилд 2835.12 шоо метр лаг, хагшаасыг цэвэрлэн, тээвэрлэжээ. Мөн 13 байршилд 874 метр шугам, хоолойг угааж, давхардсан тоогоор 59 байршлаас 26,691 шоо метр усыг соруулсан байна. Нийт 276 худагт засвар хийж, 133 сувгийн тагийг нөхөж тавьжээ.

ГУББГ-ын ерөнхий инженер С.Батсайхан “Энэ онд Нийслэл хүрээ өргөн чөлөө, Хан-Уул дүүргийн 21 дүгээр хорооны Архивчдын гудамж, “Алтай” хотхоны урд, Багшийн хөгжлийн ордны урд талын туслах зам гэсэн дөрвөн байршилд борооны ус зайлуулах шугам сүлжээ шинээр угсраад байна. Түүнчлэн, үерийн хамгаалалтын барилга, байгууламжийн цэвэрлэгээний хүрээнд 23 байршилд 26.5 км сувгийг цэвэрлэж, 19,304.6 шоо метр лаг хагшаасыг тээвэрлэсэн. Аравдугаар сарын 20 гэхэд өвөлжилтийн бэлтгэлийг бүрэн дуусгахаар ажиллаж байна” гэв.

Уулзалтын төгсгөлд Улаанбаатар хотын ерөнхий менежер бөгөөд Захирагчийн ажлын албаны дарга М.Баяраа “Инженерийн байгууламжийн нэг байгууллагын ажил доголдоход бусад ажилд саад учирна. Тиймээс өвөлжилтийн бэлтгэл ажлын уялдаа холбоог хангах зорилгоор энэ уулзалтыг хийж, тулгамдсан асуудлуудын талаарх мэдээллийг авч байна. Арга хэмжээ авах шаардлагатай байршлуудыг тодорхойлж, тухайн байршилд холбогдох албаныхны хамт ажиллан, тулгамдаж буй асуудлуудыг яаралтай шийдвэрлэхээр ажиллана” хэмээлээ.