Month: May 2023

Хэнтий аймгийн Батширээт сумын харьяат иргэн Б энэ оны дөрөвдүгээр сарын эхээр тус сумын нутаг дэвсгэрээс нас бие гүйцсэн хүрэн баавгай 1 /эм/, 2 бамбарууш агнажээ. Улмаар Улаанбаатар хот руу оруулан бусдад худалдахаар Баянзүрх дүүргийн 27 дугаар хорооны нутаг дэвсгэрт хадгалж, байсныг Экологийн цагдаагийн албанаас илрүүлэн шалгалтын ажиллагаа явуулж байна.

Шалгалтаар иргэн Б нь нас бие гүйцсэн эх баавгайг хууль бусаар галт зэвсгээр буудаж, төрөөд 1 сар ч болоогүй 2 бамбаруушийг хатуу эд зүйлээр цохиж хороосон нь урьдчилсан байдлаар тогтоогдсон. Эрүүгийн хэрэг хянан шийдвэрлэх тухай хуульд заасан хойшлуулшгүй ажиллагааны хүрээнд хүрэн баавгайн 3 ширхэг нойтон арьс, доньд зэргийг эд мөрийн баримтаар хураан авав.

Ан амьтны экологи-эдийн засгийн үнэлгээг баталсан Монгол Улсын Засгийн газрын 2011 оны 23 дугаар тогтоолын нэгдүгээр хавсралтад зааснаар Хүрэн баавгайг эр, эмээс нь хамаарч 6.5-7.5 сая төгрөгөөр үнэлсэн.

Монгол Улсын Амьтны тухай хуулийн 49 дүгээр зүйлийн 49.4.2 дахь хэсэгт амьтны аймагт учирсан хохирлыг тухайн амьтны экологи-эдийн засгийн үнэлгээг 2 дахин нэмэгдүүлсэн хэмжээгээр нөхөн төлүүлнэ гэж заасны дагуу 42 сая орчим төгрөгийн нөхөн төлбөр тавигдана.

Эх сурвалж: ЦЕГ

Нийслэлийн ногоон бүс, зуслангийн чиглэлд шар өвсний гал түймэр, ой, хээрийн түймрээс урьдчилан сэргийлэх зорилгоор нийслэлийн Онцгой байдлын газар, Цагдаагийн удирдах газар, Байгаль орчны газрын хамтарсан эргүүл хяналтын бүрэлдэхүүн, Гал түймэр унтраах, аврах ангиудын бэлтгэл ээлжийн алба хаагчид өдөр бүр хөдөлгөөнт эргүүлийн үүрэг гүйцэтгэж байна.

Өнгөрсөн долоо хоногт хөдөлгөөнт эргүүлийн бүрэлдэхүүн ногоон бүсэд үүрэг гүйцэтгэж байхдаа 17 шар өвсний гал түймрийг бүрэн унтрааж, хашааныхаа шар өвсийг шатаасан, гагнуур хийсэн 6 зөрчлийг илрүүлж, газар дээр нь арилгууллаа.

Мөн ногоон бүсэд зорчсон 161 автомашин, 567 иргэнд ой, хээрийн болон өнжмөл өвсний гал түймрээс урьдчилан сэргийлэх сэрэмжлүүлэг хүргэн, гал түймэр гарч болзошгүй 12 зөрчлийг арилгуулж, урьдчилан сэргийлэх сэрэмжлүүлгийг чанга яригчаар иргэд, олон нийтэд хүргэж, 150 ширхэг зурагт хуудас тарааж ажиллалаа гэж нийслэлийн Онцгой байдлын газраас мэдээллээ.

“Шүүр” ажиллагааны хүрээнд гаалийн байгууллагын хэрэгжилт, хүний нөөцтэй холбоотой цаг үеийн асуудлаар Гаалийн Ерөнхий Газрын ЗУГ-ын дарга Б.Хосбаяр мэдээлэл өглөө.

Тэрбээр “Шүүр ажиллагааны хүрээнд 1,445 гаалийн улсын байцаагч, төрийн үйлчилгээний 465 гаалийн ажилтнуудын албан хэргийн хөтлөлтийн материалыг шалгалаа. Ингэхэд төрийн албаны ерөнхий шалгалт өгөөгүй 61, тусгай шалгалт өгөөгүй 88 албан хаагч байна.

Төрийн албаны ерөнхий шалгалт өгөөгүй 61 албан хаагчийг өнөөдрөөс эхлэн ажлаас нь чөлөөлөх шийдвэр гаргасан. Эдгээр иргэн төрийн албаны ерөнхий шалгалт өгөөд тэнцвэл эргээд гаалийн байгууллагад ажиллаж болно. Харин тусгай шалгалт өгөөгүй 88 албан хаагчаас бид төрийн тусгай шалгалт авах бололцоотой.

АТГ-аас ашиг сонирхлын зөрчлийг засаж залруулах шаардлага ирсэн. Энэ дагуу 20 орчим гаалийн улсын байцаагчид арга хэмжээ авч, албан тушаалаас нь чөлөөлөх арга хэмжээ авсан.

Гаалийн улсын байцаагчийг сэлгүүлэн ажиллуулах, хүний нөөцийг цаашид бүрдүүлэхээр богино, дунд, урт хугацааны хөтөлбөр гаргана. Урт хугацааны гэдэг нь 3-5 жилийн төлөвлөлт. Дунд хугацааных 2025 он хүртэлх төлөвлөлт.

Богино хугацааны төлөвлөлт гэдэг нь 400 орчим гаалийн байцаагчийн сул орон тоо байгаа учир энэ ондоо багтаан хийх ажил юм” гэсэн мэдээллийг өглөө.

Өнөөдөр буюу 2023 оны 5-р сарын 1-ний өдөр Увс аймгийн Сагил сумаас баруун урд зүгт 47 километрийн зайд 12:46:57 цагт газар хөдөллөө.

Газар хөдлөлтийн хүч 3,7 магнитуд байжээ.

Авлигатай тэмцэх газрын Мөрдөн шалгах хэлтэс 2023 оны 4 дүгээр сарын 24-30-ны өдрүүдэд гэмт хэргийн шинжтэй 158 гомдол, мэдээллийг шалгав. Үүнээс 14 гомдол, мэдээлэлд хэрэг бүртгэлтийн хэрэг нээж, 19 гомдол, мэдээлэлд хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бөгөөд одоогоор 125 гомдол, мэдээллийг хянан шалгаж байна.

Түүнчлэн эрүүгийн 854 хэрэгт мөрдөн байцаалтын ажиллагаа явуулснаас өнгөрсөн долоо хоногт 7 хэргийг шүүхэд шилжүүлэх, 14 хэргийг хаах, 1 хэргийг харьяаллын дагуу шилжүүлэх саналтай прокурорт хүргүүлж, 6 хэргийг нэгтгэн шалгаж байна. Мөрдөн шалгах ажиллагаанд одоогоор 824 хэрэг шалгагдаж байна. Гэмт хэрэг гарахад нөлөөлсөн шалтгаан, нөхцөлийг арилгуулахаар мөрдөгчийн 1 мэдэгдэл хүргүүлсэн бөгөөд хэрэг бүртгэлтийн 2 хэрэгт нийт 12 объектод нэгжлэгийн ажиллагаа явуулжээ.

Шүүхэд шилжүүлэх саналтайгаар прокурорын байгууллагад хүргүүлсэн хэргүүдийг дурдвал:

– “А” нь Зэвсэгт хүчний 167 дугаар ангийн удирдах албан тушаалтнаар ажиллаж байхдаа албан үүрэг, бүрэн эрх, албан тушаалын байдлаа урвуулан ашиглаж, хийх ёсгүй үйлдлийг хийж, бусдад давуу байдал бий болгосон гэх;

– Гадаадын иргэн, харьяатын газрын албан тушаалтан “М” нь удаа дараагийн үйлдлээр хахууль авсан гэх;

– Дундговь аймгийн Гурвансайхан сумын удирдах албан тушаалтан “Э” бусдад давуу байдал бий болгосон гэх;

– “Ц” нь Нийслэлийн соёл, урлагийн газрын удирдах албан тушаалтнаар ажиллаж байх хугацаандаа албан чиг үүрэг, бүрэн эрх, нөлөөг урвуулан ашиглаж мөнгө угаасан гэх;

– УБТЗ-ын албан тушаалтан “Ү” нь албан үүрэг, бүрэн эрхээ урвуулан ашиглаж өөртөө давуу байдал бий болгосон гэх;

– “О” нь улс төрд нөлөө бүхий этгээдээр ажиллаж байх хугацаандаа бусдаас хахууль авсан гэх;

– “Т” нь төрийн өмчит хуулийн этгээдийн удирдах албан тушаалд ажиллаж байхдаа өөртөө болон бусдад давуу байдал бий болгосон гэх.

Нийтийн мэдээллийн тухай хуульд заасан мэдээлэл нээлттэй, ил тод, үнэн зөв байх, бодитой мэдээллээр хангах үндсэн зарчмын дагуу авлигын гэмт хэргийн мөрдөн шалгах ажиллагааны талаарх мэдээллийг Монгол Улсын Үндсэн хуулийн 16 дугаар зүйлийн 14 дэх заалт, Эрүүгийн хэрэг хянан шийдвэрлэх тухай хуулийн 29.3 дугаар зүйлийн 5 дахь хэсэгт заасныг баримтлан товч байдлаар олон нийтэд мэдээлж байгаа болно.