Month: March 2023

Арван нэгэн хүүхэд төрүүлж, өсгөсөн “Казахын сайхан ээж” өргөмжлөлт, өндөр настан С.Нурбике гуайтай уулзаж ярилцлаа. Өдгөө нас сүүдэр 73-ыг шүргэж яваа энэ буурал үр хүүхэд, ач, зээ нараа тойруулан Улаанбаатар хотод энх тунх аж төрж байгаа юм. -Танд “Наурыз”-ын баярын мэндийг хүргэе. Баяраа яаж тэмдэглэх гэж байна вэ? -Баярлалаа. Казах үндэсний баяр “Наурыз” айл бүрт аз жаргал, сайн сайхан бүхнийг авчрах болтугай. Баярын өдрөө ах дүү, төрөл төрөгсөд, үр хүүхэд, худ ураг гээд олон айлаар зочилно. Мэдээж ганц өдрийн дотор амжихгүй болохоор баяр маань нэлээд хэдэн хоног үргэлжлэх юм. Тэгээд ч одоо бүх зүйл орчин үеийн маягтай болчихсон санагддаг. Хуучин таньж, мэдэхгүй нь хамаагүй хүсвэл баярын өдөр айл бүрт орж идээ, цагаа амсч гардаг байлаа. Харин одоо уриагүй, урилгагүй л бол тэр бүр мэддэггүй айлд очоод байдагг үй болсон.

-Таныг хүүхэд байхад “Наурыз”-ын баярыг ямаршуухан тэмдэглэдэг байсан тухай сонирхуулахгүй юу. Тэр үед ч гэсэн одоогийнх шиг бэлэг сэлт гэдэггүй л байв уу?

-Намайг хүүхэд байхад ч “Наурыз”-ыг өргөн дэлгэр тэмдэглэдэг байсан. Ах дүүсээрээ ахмад настныдаа цуглаж, найрлан, дуулж хуурдаад л өнгөрүүлнэ. Архи, дарс хэрэглэхгүй. Хөгшин залуугүй энэ өдөр казах үндэсний хувцсаараа гоёж сайхан байж билээ. Одоогийн зарим нэг залуусыг эс тооцвол “Наурыз”- аар үндэсний хувцсаар гоёдог уламжлал хэвээр байгаа. Т Намайг хүүхэд байхад одоогийнх шиг гэрт ирэх хүн бүрийг угтаж, дайлж, хүлээгээд суудаггүй байсан. Айл бүр баярын идээ, цагаагаа бэлтгэж тавиад гэрээ цоожгүй үлдээгээд явчихдаг хэрэг л дээ.

Таних, танихгүй нь хамааг үй тухайн айлыг зорьж ирсэн л бол бэлдэж тавьсан зоогноос амсаад явна. Тэр үеийн хүмүүс одоогийн хэлээд байдаг шиг хулгай энэ тэр гэсэн юм бараг мэддэггүй байлаа шүү дээ. Үнэт эдлэл байсан газартаа байж л байна. Харин бэлэг гэж сүйд болоод байдаггүй. Нас өндөр болсон хүмүүст, аав, ээждээ хүүхдүүд нь бэлэг өгч болно л доо. Гэхдээ “Цагаан сар”- ын баяр шиг хүний тоогоор бэлэг өгдөггүй.

-Халх ёсонд Цагаан сарын өглөө, мөр гаргаж, золгодогтой адил казахууд “Наурыз”-ын өглөө ямар зан заншлыг үйлддэг тухай ярьж өгөхгүй юу?

-Өдөр шөнийн тэнцэл болсон гуравдугаар сарын 22- ны өдөр казахууд “Наурыз”- ын баяраа тэмдэглэж ирсэн уламжлалтай. Баярын өглөө ургах нарнаар эрэгтэйчүүд гол, горхи, булагны нүдийг нээж, эмэгтэйчүүд, хөгшчүүл сүү цагаа, идээ ундааныхаа дээжийг барьж нар мандахыг хардаг жаяг бий. Дараа нь хоорондоо золгож, бие биедээ баяр хүргэдэг юм. Мөн өндөр настнууд нь залуустаа сургаал хайрлаж, “Наурыз көже”, идээ цагаагаа зооглодог. “Наурыз көже” гэдэг нь “Наурыз шөл” гэсэн утгатай. Манай ёсонд “Наурыз”-аар будаатай шөл хийдэг юм. Үр удам нь олон байхыг бэлгэшээж казахууд будаатай шөл хийдэг гэж хуучны хүмүүс ярьдаг байсан.

-Та аль нутгийн хүн бэ?

-Баян-Өлгий аймгийн Дэл үүн сумд төрж өссөн. Аавыг маань Сүлеймен гэдэг байсан. Би өөрөө айлын долоо дахь хүүхэд байгаа юм. Эхээсээ олуулаа өссөн дөө.

-Хэзээнээс Улаанбаатарт суурьшсан бэ?

-Улаанбаатар төмөр замд ажиллахаар 1955 онд нутгаасаа гарч, тэр цагаас хойш нийслэлд аж төрсөн. Өвгөн маань ч гэсэн тухайн үед төмөр замд ажиллахаар Улаанбаатарт ирж байсан юм. Бид нэг жилийн дараа 1956 онд гэр бүл болж гал голомтоо бадраасан. Төмөр замд хамтдаа ажиллаж байгаад хуучнаар Чойр хот руу нүүсэн. Тухайн үед Чойрт манайхаас өөр казах айл байгаагүй. Ингээд таван жилийн дараа буцаад Улаанбаатарт ирж, суурьшсан юм.

Манай өвгөн С.Сейлхан гэж хүн байсан. Дөрвөн жилийн өмнө хорвоог орхисон. Бид Чойроос Улаанбаатарт нүүж ирдэг жил тэр маань цэргийн ангид автомашины засварчны ажилд орсон. Харин би хүүхдүүдээ өсгөж хэсэг хугацаанд гэртээ л байсан. Учир нь тэр үед цэцэрлэг, ясли ч байгаагүй. Ингээд хэдэн жилийн дараа хуучнаар Гэр ахуйн оёдлын үйлдвэрт оёдолчин хийсэн. Улсад 25 жил ажиллаа. Манайх нэлээд өнөр гэр бүл байгаа юм. Олон хүүхэд, төрүүлж өсгөлөө.

-Олон хүүтэй айл гэж сонссон юм байна. Хэдэн хүүхэдтэй вэ?

-Би арван нэгэн хүүхэд төрүүлсэн. Найман хүү, гурван охинтой. Том хүүгээс маань бусад нь эрүүл энх аж төрж байгаа. Бүгдээрээ тус тусынхаа амьдралыг зохиож, гэр бүл болцгоосон. Нас өндөр болсон хойно төрүүлсэн үрээ алдана гэдэг хэцүү байдаг юм байна. Миний том хүү олон жил цэргийн ангид ажиллаж, өндөр насны тэтгэвэрт 2005 онд гарсан. Тэр жилээ хорвоог орхисон доо.

-Таны хүүхдүүд тань одоо, хаана, юу хийдэг вэ?

-Бүгд өөрийн гэсэн ажил төрөлтэй. Тэдний дунд багш, хуульч,цагдаагийн байгууллагад шинжээч, цахилгаанчин, жолооч, цаг уурч, барилгын мэргэжилтэй нь ч бий. Нэг хүү маань одоо Солонгост аж төрж байна.

-Таны хүүхдүүд бүгд гэр бүл болцгоосон гэлээ. Тэгэхээр ач, зээтэйгээ нийлээд нэлээд өнөр өтгөн болсон биз?

-Өөрийн төрүүлж өсгөсөн арван нэгэн хүүхдээ, ач, зээтэйгээ нийлүүлбэл 50 хүрсэн байх. Харин гуч, жичээ үзээгүй л байна. Үр хүүхд үүдийн маань заяа түшиж, сэтгэл хангалуун аж төрж байгаадаа баярлаж суудаг.

-Ажлынхаа хажуугаар хүүхдүүдээ өсгөж, хүмүүжүүлэхэд яаж зав гаргадаг байсан бэ. Тэр үеийн дурсамжаас ярихгүй юу. Хөгтэй явдлууд их биз?

-Ажлынхаа хажуугаар бүхнийг амжуулах гээд цаг завгүй л явдаг байлаа. Биднийг залуу байхад одоогийнх шиг бэлэн юм байхгүй шүү дээ. Одоо бодоод байхад хүмүүс нь ч харанхуй, бүдүү- лэг байж. Ямар сайндаа плитка хэрэглэхгүй байх вэ дээ. “Тэр чинь тог их иддэг, тэр хэрээр мөнгө их төлнө гэнэ” гээд тэрүүхэндээ шивэр авир болцгоодог үе байсан. Хүүхд үүд эхнээсээ өсч, юу ч гэсэн ах нь дүүгээ хувцаслаж, хоол ундыг нь идүүлчихдэг болсон үед жаахан амсхийсэн байх. Тэрнээс өдөр бүр нормын ажилтай хүнд бараг амрах зав гарахгүй. Долоо хоногийн ням гаригт л амарна. Хүүхдүүдээ усанд оруулж, хувцас хунарыг нь угааж индүүднэ. Хоол унд хийж, гэрээ цэвэрлэсээр амралтын өдрийг өнгөрөөнө. Гэтэл одоогийн хүүхдүүд долоо хоногийн хоёр өдөр нь амардаг хэрэн завгүй гээд явж байдаг. Ямар ч гэсэн хүүхдүүдээ идэх хоолгүй хонуулж байгааг үй. Арван нэгэн хүүхдийн эхний тав нь хүү байсан. Хөвгүүд маань их дуулгавартай, охин хүүхдээс дутахаарг үй гэрийн ажилд нямбай байсан болохоор ээждээ их тус хүргэнэ. Харин дунд сургуульд дөрөв, таваараа зэрэг сурдаг байсан болохоор жаахан хүндрэлтэй үе байлгүй яах вэ. Наад зах нь эцэг эхийн хурлаас эхсүүлээд. Өвгөн маань ажил ихтэй болохоор бараг очиж амждаггүй. Ихэнхдээ би очно. Нэгнийх нь багштай уулзаж, хичээлийнхэн явцтай танилцаад дараагийн хурал руу яарна. Ингээд бүгдийг амжуулна даа. Одоо чинь хонхны баяр тэмдэглэх гэж сүйд болдог болж. Миний талийгаач том хүү наймдугаар ангиа төгсөхд өө хөвөнтэй дээл өмч байсан санагддаг. Ер нь хүний арван хуруу тэгш биш шүү дээ. Түүнтэй адилхан хүүхд үүдийн маань зан байдал өөр өөр. Юу ч гэсэн өнөөдрийг хүртэл аллахын авралаар хүүхдүүд маань буруу зөрүү зүйл хийж, нэр сэвтүүлж байсангүй.

-Казахууд хүүхдийг ой хүртэл нь модон оронд өлгийддэг. Яагаад тэгдэг юм бол?

-Эрт дээр үеэс хүүхдээ жижигхэн модон оронд өлгийддэг заншил казах ёсонд байсан. Одоо ч гэсэн хүүхдийг өлгийддэг. Ингэснээр хүүхэд эрүүл чийрэг өсдөг гэж хууччуул ярьдаг. Бас тухтай унтаж, амардаг гэж үздэг юм. Зарим хүмүүс хүүхдийг ингэж өлгийдсэнээс түнхний мултарал гээч зүйл болдог гэдэг юм билээ. Би үүний үгүйсгэдэг. Казахуудын хувьд он удаан жил мөрдөж ирсэн хүүхэд өлгийдэх дэг жаягаас болж дээрх зүйл тохиолдсоныг би лав харааг үй. Өлгийдсөн хүүхдүүд маань эсэн мэнд өссөн.

-Та хүүхдүүддээ юу гэж сургадаг вэ?

-Эх хүн гэдэг үргэлж үр хүүхдүүдийнхээ сайн сайхан, эрүүл энх явахыг л хүсэж суудаг. Нэг нь жаахан дүрсг үйтэж эсвэл өвдчихвөл санаа зовно. Би хүүхдүүддээ хүний сайныг дууриа. Үнэн ч, шударга байхыг сургадаг. Хөвгүүддээ худал ярьж, мууг дууриан бор дарсанд шунахг үй хол яв гэж л захидаг юм.

-Дээр үед бэр богтолж авдаг дэг жаяг казах ёсонд байсан. Хэдий энэ нь тогтсон заншил биш ч саяхныг хүртэл хэвээр л байлаа шүү дээ. Харин таныг айлд бэрх буухад ямар байсан бэ?

-Тийм ёс байдаг. Гэхдээ өвгөн бид хоёр сэтгэл нийлж л гэр бүлийн амьдралаа зохиосон. Сайхан амьдралыг бий болгохын төлөө зүтгэхдээ хэн хэн маань ч ядарсан гэж хэлж байсангүй. Бараа таваар хомс тэр үед эхлүүлсэн амьдралаа сайхан болгохын төлөө чадах чинээгээрээ хичээсэн. Одоо үр хүүхдүүд маань хэнээс дутахааргүй сайхан аж төрж байгааг хараад бахархаж суудаг. Биднийг залуу байхад Оросын бакиал гутал хүртэл олддоггүй байлаа шүү дээ. Одоо бол тэр үетэй харьцуулашг үй болжээ.

-Нутагтаа очдог уу?

-Очдог. Уржнан жил Казахстан руу яваад ирсэн. Казахстанаас Баян-Өлгий рүү нислэгтэй. Тухайн үед Өлгийд очиж, төрөлх нутаг Дэлүүн сум руу яваад ирсэн. Маргааш хаврын урин дулаан цагийн эхлэл, нарны баяр “Наурыз” болно. Энэ баяр хүн бүрт аз хийморь авчрах болтугай.

Ч.АННА

Консул асан Д.Мөнх-Эрдэнийг шүүхээс өнгөрсөн даваа гаригт дахин цагдан хорих шийдвэр гаргасан. Энэ талаар түүний өмгөөлөгч Л.Баттогтохтой ярилцлаа.

---

-Д.Мөнх-Эрдэнийг өнгөрсөн долоо хоногт сулласан. Та бүхэн шүүхээс хуулийн дагуу сулласан гэж мэдэгдэж байв. Гэтэл өнгөрсөн даваа гаригт буцаагаад хорьчихлоо. Шүүгч шүүгчийнхээ захирамжийг хүчингүй болгосон нь ямар учиртай юм бэ?

-Эхлээд би өнгөрсөн хугацаанд болсон хуулийн процессыг тайлбарлая. Миний үйлчлүүлэгч Д.Мөнх-Эрдэнийг 2023 оны нэгдүгээр сарын 23-ны өдөр цагдан хорьсон. Намын даргын хуралд оролцож хязгаарлалт тогтоох таслан сэргийлэх арга хэмжээг зөрчсөн гэж буруутгасан. Тиймээс өмгөөлөгчийн хувьд миний бие хоёрдугаар сарын 9-нд хуваарилагдсан шүүгчид гомдол гаргасан. Гэвч миний хүсэлтийг хангаж шийдвэрлээгүй. Тиймээс эрхийнхээ хүрээнд шүүхийн ерөнхий шүүгчид 11-ний өдөр гомдол гаргасан.

Тэгэхэд ерөнхий шүүгч 14-ний өдөр өмнөх 9-ний өдрийн шүүгчийн захирамж нь хэрэг хянан шийдвэрлэх ажиллагааны явцад шүүгч эрх мэдлийнхээ хүрээнд гаргасан шийдвэр мөн байна. Тиймээс ЭХХШТХ-ийн 15.8 дугаар зүйлийн 2 дахь хэсэгт заасан ерөнхий шүүгчид гомдол гаргах эрхгүй болно гэсэн хариуг надад өгсөн.

Ингэж явсаар энэ сарын 2-нд гэм буруугийн шүүх хурал зарлагдлаа. Гэвч тухайн өдөр шүүх хурал болоогүй, 10-н хүртэл хойшилсон. Ингэхдээ Д.Мөнх-Эрдэнийн цагдан хорих таслан сэргийлэх арга хэмжээг үргэлжлүүлж шийдвэрлэсэн юм. Би гуравдугаар сарын 13-нд хуваарилагдсан шүүгчид дахиад гомдол гаргасан. Тэгэхэд шүүх 15-ны өдөр өмгөөлөгчийн хүсэлтийг хангаж Д.Мөнх-Эрдэнийг ЭХХШТХ-ийн 14.5 дугаар зүйлд зааснаар хязгаарлалт тогтоох арга хэмжээг авч, Д.Мөнх-Эрдэнийг сулласан. Энэ захирамжаа гаргахдаа шүүгч гомдол гаргах, эсэргүүцэл бичих эрхгүй болохыг дурдсан байдаг.

Гэтэл 17-нд нь прокурор шүүгчийн тэр захирамжид гомдол гаргасан. Утга нь ЭХХШТХ-ийн 15.8 дугаар зүйлийн нэг дэх хэсэгт заасан гурав хоногийн дотор ерөнхий шүүгчид гомдол гаргах, эсэргүүцэл бичих эрхийг хязгаарлачихлаа гэж гомдсон байна лээ. Ерөнхий шүүгч нь тэр хүсэлтийг хүлээж аваад нэгд, прокурорын гомдол эсэргүүцэл гаргах эрхийг хязгаарласан байна. Хоёрт, шүүхийн шатанд шүүгдэгч, өмгөөлөгч нар таслан сэргийлэх арга хэмжээтэй холбоотой гомдол гаргах эрх байхгүй гэсэн байдаг. Ингээд өмнөх 15-ны өдрийн Д.Мөнх-Эрдэнэд хязгаарлалт тогтоосон таслан сэргийлэх арга хэмжээг авсан шүүгчийн захирамжийг хүчингүй болгоод, шүүх хурал болтол цагдан хорихоор шийдвэрлэчихэж байгаа юм.

-Маш сонин процесс өрнөжээ. Гомдол гаргах, эсэргүүцэл бичих эрхийг хязгаарласан шүүгчийн захирамжийг ерөнхий шүүгч цуцлаад прокурорын эсэргүүцлийг хүлээж авсан нь хууль ёсных уу?

-ЭХХШТХ-ийн 15.8 дугаар зүйлийн нэгд прокурор оролцогч нь шүүхийн шийдвэрийг эс зөвшөөрвөл гурав хоногийн дотор гомдол гаргаж болно. Мөн энэ хуулийн 15.1, 15.2-д эрүүгийн хэрэг хянан шийдвэрлэх ажиллагааны оролцогч хууль ёсны ашиг сонирхлоо хамгаалуулах тухай хүсэлтийг шүүхэд гаргах эрхтэй, хүсэлт гомдлыг эрүүгийн хэрэг хянан шийдвэрлэх ажиллагааны аль ч үед гаргаж болохоор хуульчилсан байдаг.

Тэгэхээр аль ч үе шатанд гомдол гаргаж болно гэдэг хүсэлт нь ЭХХШТХ-ийн 14.1 дүгээр зүйлийн 3 дахь хэсэгт зааснаар эрүүгийн хэрэг шүүхэд хянан шийдвэрлэх явцад хязгаарлалт тогтоох хувийн баталгаа гаргах, барьцаа авах, тодорхой үйл ажиллагаа явуулахыг түдгэлзүүлэх, цагдан хорих зэрэг таслан сэргийлэх хэмжээг шүүгч авна гэдэг. Өөрөөр хэлбэл, шүүгчийн гуравдугаар сарын 15-нд гаргасан Д.Мөнх-Эрдэнийг сулласан захирамж нь хүчинтэй. Хууль зөрчөөгүй гэсэн үг. Харин ерөнхий шүүгчийн шийдвэр үндэслэлгүй. Өөрөөр хэлбэл, ерөнхий шүүгч хуулийн дагуу прокурорын эсэргүүцлийг хэлэлцэхгүй байх ёстой байсан. Энэ нь өөрөө шүүгчийн хараат бус байдалд нөлөөлсөн үйлдэл боллоо. Нэг ёсондоо шүүгчийн үйл ажиллагаанд хөндлөнгөөс оролцсон хэрэг.

Түүгээр зогсохгүй Шүүхийн тухай хуулийн 5 дугаар зүйлд заасан шүүх эрх мэдлийг аливаа этгээдээс хараат бусаар хэрэгжүүлнэ. Шүүхийн бие даасан байдлыг алдагдуулсан хууль тогтоомж болон хэм хэмжээний акт гаргахыг хориглоно гэж байдаг. Тиймээс ерөнхий шүүгчийн захирамжийг хүчингүй болгосон нь хууль бус үйлдэл боллоо гэж үзэж байна. Мөн энэ хуулийн 6 дахь хэсэгт заасан хууль дээдлэх нь шүүхийн зохион байгуулалт, үйл ажиллагааны үндсэн зарчим мөн гэдэг. Ерөнхий шүүгчийн үйлдэл энэ зарчмыг ч давхар алдагдууллаа.

-Сэжигтэн яллагдагчийн 30 хоногийн баривчилгаатай холбоотой маргаан Д.Мөнх-Эрдэнийн үйлдлээс үүдэлтэй өрнөөд байна шүү дээ. Яг ямар зарчим алдагдаад байна вэ?

-ЭХХШТХ-ийн 14.10 дугаар зүйлийн 1 дэх хэсэгт цагдан хорих үндсэн хугацааг нэг сар байна гэдэг. Нэг ёсондоо энэ хугацаа хэрэг бүртгэл мөрдөн байцаалт прокурорын шатанд хэрэгждэг байх нь. Гэтэл шүүхэд шилжсэн хэрэгт хэргийн холбогдогчийг шүүх хурал болтол цагдан хорино гээд шүүгч үздэг болоод байгаа юм. Бүр нийтлэг болчихлоо. Шүүх хурал болтол хорино гэсэн хуулийн томьёолол ямар ч хуульд байхгүй. Энэ нь хүний эрхийн ноцтой зөрчил. Хуульчлаагүй практик болчихоод байна.

Сэжигтэн яллагдагчийг баривчлах, цагдан хорьсон шийдвэрийг биелүүлэх тухай хуулийн 14 дүгээр зүйлд хоригдох этгээдийг ЭХХШТХ-д заасан үндэслэл, журмын дагуу эрх бүхий албан тушаалтнаас гаргасан шийдвэрт заасан хугацаагаар хорино гэж байгаа. ЭХХШТХ 14.10-т 30 хоног гээд заачихсан. Сэжигтэн яллагдагчийг баривчлах, цагдан хорьсон шийдвэрийг биелүүлэх тухай хуулийн 44 дүгээр зүйлд хоригдсон этгээдийг суллах журам бий. Энэ журмаар сэжигтэн яллагдагчийг хорьсон 30 хоногийн хугацаа дуусах үед хорих байрны захиргаа 24 цагаас доошгүй хугацаанд эрх бүхий албан тушаалтанд хугацааг сунгах эсэхийг тодруулж бичгээр мэдэгддэг. Хэрэв 24 цагийн дотор хариу ирэхгүй бол шүүхийн дарга, шүүхийн захиргаа хоригдогчийг нэн даруй суллах үүрэгтэй. Гэвч энэ хууль огт хэрэгжихгүй байгаа юм. Ийм байдлаар маш олон сэжигтний эрх зөрчигдөж байгаа. Шүүх хурал болтол хүнийг цагдан хориод байгаа нь залхаан цээрлүүлэх эрүү шүүлт яваад байна гэсэн үг. Энэ хуулийг УИХ-аар хэлэлцүүлж нэг мөр ойлгогдохоор тогтоохгүй бол шүүгч бүр өөр өөрийн ойлголтоор хуулийг буруу хэрэглээд байна.

-Д.Мөнх-Эрдэнийг дахин дахин цагдан хориод байгааг янз бүрээр тайлбарлаж байна. Ар гэрийнхний хувьд захиалгат үйл ажиллагаа гэж хардаж байгаагаа илэрхийлээд байгаа. Өмгөөлөгчийн хувьд прокурор, шүүгчийн үйлдлийг юу гэж харж байна вэ?

-Олон нийтийн сүлжээгээр шүүх, прокурор худалдагдсан байна. Нөлөө бүхий улстөрчдөд худалдагдсан, тэдний талд ажиллаад байна гэх зэргээр мэдээллүүд явж байна. Өмгөөлөгч миний хувьд арай тийм хэмжээнд хүрээгүй гэдэгт итгэж байна.

-Ерөнхий шүүгч хууль зөрчсөн гэлээ. Та гомдол гаргасан уу?

-Өнөөдөр /өчигдөр/ ЭХХШТХ-ийн 15.1 дүгээр зүйлийн 1 дэх хэсэг, 15.2 дугаар зүйлд хүсэлт гомдлыг эрүүгийн хэрэг хянан шийдвэрлэх ажиллагааны аль ч үед гаргаж болно, энэ хуулийн 14.1 дүгээр зүйлийн 3 дахь хэсэгт заасан эрүүгийн хэрэг шүүхэд хянан шийдвэрлэх явцад шүүх таслан сэргийлэх арга хэмжээг шийдвэрлэнэ гэсний дагуу, 14.6 дугаар зүйлд заасан барьцаа авах таслан сэргийлэх арга хэмжээгээр өөрчлүүлэх тухай хүсэлтийг шүүхэд өглөө. Хүсэлтийг хуульд зааснаар 24 цагийн дотор шийдвэрлэх ёстой. Маргааш /өнөөдөр/ шүүх хуралдах болов уу. Шүүх шударга шийдвэр гаргана гэдэгт итгэж байна.

УИХ-ын гишүүн Э.Батшугартай ярилцлаа.

---

-Чуулганы завсарлагааны хамгийн шуугиантай сэдэв Хөгжлийн банкны сонсгол байлаа. Сонсголын үр дүнгээс ярилцлагаа эхэлье?

-Чуулганы завсарлагааны үеэр гурван шаттай сонсголыг хийлээ. Энэхүү сонсгол парламентын түүхэнд тод үлдэх байх. Учир нь парламентын хянан шалгах хороо анх удаа байгуулагдсан. Анх удаа явагдаж байгаа сонсгол ч гэлээ амжилттай дуусгалаа. Хөгжлийн банкны сонсголын гол зорилго нь нотлох баримтад дүн шинжилгээ хийж, олон нийтэд мэдээлэх. Мэдээж гэм буруутайг нь шүүх тогтооно гэдгийг онцолж хэлье. Гэхдээ ямар хэмжээний луйвар хулгай, зохион байгуулалттай үйлдэл явж байсныг бүгдийг нь ард түмэнд ил болголоо.

Товч дүгнэж хэлэхэд, зээлийг зориулалтын бусаар ашигласан байдал их гарсан. Хямд их үүсвэрээр бусдын боломжийг хааж өөрсдийнхөө давуу эрх ашиглаж зээл авсан. Ингэхдээ авсан зээлээ зориулалтын бусаар зарцуулсан байна. Тухайлбал, нэг зээлдэгч төмрийн үйлдвэрт ган хайлуулах үйлдвэр барина гэж зээл авчихаад тэр мөнгөөрөө Макао, Сингапурт казино тоглосон хэрэг гарлаа. Сонсголын шууд дамжуулалтын үеэр үүнийг ард түмэн харсан байх.

Хөгжлийн банкны үндсэн үүрэг нь экспортыг дэмжих, импортыг орлох үйлдвэрүүдийг барихад санхүүжилт олгох. Мөн Монгол Улсыг хөгжүүлэх стратегийн ач холбогдолтой том том төслүүдийг хэрэгжүүлэх юм.

Хөгжлийн банкнаас зээл хүсэхдээ том үйлдвэр барина. Экспортыг дэмжиж импортыг орлох, валютын урсгалыг Монгол Улсад үлдээнэ хэмээн төсөл бичиж зээл авчихаад тэрийгээ хувийн хэрэгцээндээ ашигласан эдгээр үйлдэл бол санхүүгийн гэмт хэрэг.

Хоёрдугаарт, маш их хэмжээний мөнгийг дандаа холбогдох этгээдүүд авсан байна. Холбогдох этгээд гэдэг нь нэг эзэмшигчтэй олон компанид зээл өгсөн гэсэн үг. Эсвэл нэг эрх мэдэлтний хамаатан саданд зээл олгосон байна.

Гуравдугаарт, зээлээ эргэж төлөхгүй байгаа зээлдэгчид байна. Зээлээ эргэн төлөөгүй янз бүрийн шалтгааныг хэлж байна. Жишээлбэл, эдийн засгийн нөхцөл байдал өөрчлөгдсөн. Төрөөс дэмжлэг өгөөгүй гэх мэтчилэн. Энэ бол мөн л зөрчил. Бусдын боломжийг хаасан. Монгол Улсын хөгжлийг боомилсон зүйлүүдийн нэг жишээ гэж харж байна.

Зээлдэгчээс гадна Хөгжлийн банкны удирдлагууд том алдаанууд гаргасан асуудлууд байна. Тухайлбал, нэгдүгээрт зээл олгохдоо ашиг сонирхлын зөрчил гаргасан зүйл байна. Жишээлбэл, бүх хорооны шийдвэрийг нэг өдөр гаргасан. Эсвэл банк хэзээ ч зээл олгохооргүй, санхүүгийн үзүүлэлтгүй компаниудад зээл олгосон. Эсвэл муу зээлийн түүхтэй компанид зээл олгосон асуудлууд байна. Ямар нэгэн банк санхүүгийн байгууллага зээл авагчийн зээлийн төлөлт хийгдэж байгаа эсэхэд хяналт хийх ёстой. Үүнд хяналт хийгээгүй байдал илэрлээ. Санхүүч хүний нүдээр харахад ханшны зөрүүнд ямар нэгэн менежмэнт хийгээгүйгээс их хэмжээний алдагдал хүлээсэн гэж байна. Олгож байгаа зээл нь төгрөгөөр эсвэл өөр валютаар байвал түүнд нарийн менежмэнт хийх хэрэгтэй. Ам.доллараар зээл олгож байгаа бол тухайн зээлдэгчийн орлого нь ам.доллараар орж ирдэг байх ёстой. Тэгж байж зээлээ ам.доллараар төлнө. Ингэвэл Хөгжлийн банк ч алдагдал хүлээхгүй. Монгол Улс ч ханшны дарамтад орохгүйгээр төсөл нь хэрэгжинэ. Энэ мэтээр алдаа их гарсан. 2011-2017 онд ямар нэгэн байдлаар ханшны эрсдэлд менежмэнт хийгээгүй нь харагдсан. Дээрээс нь маш их хэмжээний алдагдал гаргасан.

Үүнээс гадна тодорхой компаниуд өөрийнхөө банкаар дамжуулж зээл аваад өөрийнхөө банкинд байгаа зээлээ хаасан нөхцөл илэрсэн. Мөн олгосон зээлийн нотлох баримтуудаа устгасан гэмт хэргийн шинжтэй зүйлүүд гарсан. Жишээлбэл, Капитал банк өөрийнхөө банкнаас цааш дамжуулан зээл олгохдоо “олгоогүй” гэсэн бичилт хийсэн байна. Хөгжлийн банкны баримт дээр Хөгжлийн банкнаас Капитал банк руу яалт ч үгүй мөнгө шилжсэн байгаа юм. Иймэрхүү зохион байгуулалттай гэмт хэргийн шинжтэй зүйлүүд илэрсэн. Энэ бүхнийг ард түмэн ч, УИХ-ын гишүүд ч мэддэггүй байсан. Сонсголын үр дүнд их хэмжээний нотлох баримт илэрлээ.

Сонсголын тайланг УИХ-д танилцуулж, шүүхэд нотлох баримт болгож өгнө. Мөрдөн байцаагчдын баримт дээр нэмээд сонсголын нотлох баримттай болж байна. Ингэснээр шүүх хэргийг илүү нягталж шийдэх бололцоотой болж байна. Тиймээс шүүх хурдан хугацаанд хэргийг шуурхай шийдэх хэрэгтэй. Ингэж байж ирээдүйн зээлдэгч нарт том сургамж болно. Мөн Хөгжлийн банкны ирээдүйн үйл ажиллагаа үндсэн функтээрээ явах нөхцөл бүрдэнэ.

Хөгжлийн банк бол маш том институц шүү дээ. Учир нь монгол ард түмний нэрийг, Монголын Засгийн газрын нэрийг ашиглаж гаднаас хөрөнгө босгох эрхтэй, боломжтой байгууллага. Хөгжлийн банкны эх үүсвэрийн дийлэнх нь бонд болон бусад гадны эх үүсвэрээс бүрддэг.

-Монголын хамгийн нөлөө бүхий хүмүүсийг та бүхэн “ухаж төнхлөө”. Ер нь ажлын хэсгийнхэн та бүхэнд ямар нэгэн хавчлага, шахалт гарав уу. Ажлыг удаашруулах гэсэн нөлөө ирэв үү. Намын “том” ах нартайгаа үзэлцэхэд амаргүй байсан байх, та ний нуугүй яриач?

-Бусад гишүүдийнхээ өмнөөс би хариулж чадахгүй. Миний хувьд лав ямар нэгэн дарамт, шахалт ирээгүй. Хамгийн гол нь энэ бол аль намаас үл хамаарч Хөгжлийн банкыг дээрэмдэж, тоносон хэрэг. Монгол Улсын эрх ашиг, Монгол Улсын хөгжил, эдийн засгийн асуудал учраас үүнийг чөдөрлөсөн, боомилсон бүх хүнд хатуу хариуцлага тооцох ёстой.

Ажлын хэсэг ажлаа хэвийн явуулахад гэрч ирэхгүй байх асуудал их гарсан. Хоёрдугаарт, анх удаа явагдаж буй, бүхнийг шинээр хийж байгаа учраас бичиг цаасны асуудал, нотлох баримтуудаа цуглуулахад тодорхой хэмжээний бэрхшээл гарсан. Тухайлбал, банкууд нотлох баримт өгөхдөө заавал прокурорын зөвшөөрөлтэй өгөх ёстой гэсэн гэдэг ч юм уу. Гэхдээ бид ямартай ч ажлаа сайн хийлээ. Энд УИХ-ын дарга Г.Занданшатар дарга манлайлж их дэмжлэг үзүүлсэн. Тиймээс энэ завшааныг ашиглаад талархал илэрхийлье.

Хөгжлийн банкны үйл ажиллагаа цааш явах ёстой. Хөгжлийн хөтөлбөрөө санхүүжүүлэх ёстой. Учир нь БНСУ, Япон, Вьетнам, Хятад зэрэг олон орон энэ институцийн нөлөөгөөр үйлдвэржсэн. Зүүн, баруун Герман нийлэхэд ч ийм институц байсан. Тиймээс энэ институцийг зөв ашиглаж, мандатынх нь дагуу үйл ажиллагааг явуулах нь чухал байна.

-Үндсэн хуульд өөрчлөлт оруулах асуудалд улс төрийн намууд ойлголцсон гэгдэж буй. Тиймээс энэ хаврын чуулганы гол хууль Үндсэн хууль болох нь. Та ер нь ҮХНӨ оруулах, эсвэл шинэ Үндсэн хууль батлах асуудлын алийг нь дэмжиж байна вэ?

-Энэ бол их өргөн хүрээтэй сэдэв. Тиймээс өөрийн байр суурийг маш товчхон илэрхийлье. Ардчилсан Үндсэн хуулийг батлаад 31 дэх жилтэйгээ золгож байна. Одоо хэрэгжиж байгаа Үндсэн хууль өөрийн үүргээ биелүүлсэн гэж боддог. Монгол Улс 1992 онд социалист тогтолцооноос ардчилсан тогтолцоо руу, зах зээлийн нийгэм рүү шуудхан шилжсэн. Тухайн үед мэдэхгүй зүйлүүд байсан гэж боддог. Тухайлбал, хоёр шатлалт банкны тухай, Хөрөнгийн биржийн тухай, татвар гэх мэтчилэн асуудлаар нарийн ойлголт тухайн үед байгаагүй гэж боддог. Гэхдээ 1992 онд маш олон зүйлд зохицуулалт хийж Төв Азийн ардчилсан Монгол Улс зах зээлийн нийгмээ баталгаажуулж чадсан. Үүний үр дүнд гадаадын банк санхүүгийн байгууллагаас Монгол Улс бонд босгож чадсан. Чингис бондыг энд дурдъя. Өнөөдөр бүтцийн өөрчлөлт хийж дахин санхүүжүүлээд явж байна. Зах зээлийн эдийн засагтай дэлхийн улс орнууд манай улсыг бүрэн хүлээн зөвшөөрсөн гэдгийг үүнээс харж болно. Бид ямар нэгэн зүйлийг шинэчлэхээсээ өмнө хаана алдсан байна вэ гэдгээ дэнслэх хэрэгтэй. Тиймээс үүндээ дүн шинжилгээ хийж тодорхой хэмжээний өөрчлөлт оруулах зайлшгүй шаардлагатай гэж бодож байна. Жишээ нь сонгуулийн тогтолцоо. Сонгогчдын санал гээгдэж байгаа талаар нийгэмд их шүүмжлэл өрнөдөг. Тиймээс санал гээгдэхгүй пропорциональ тогтолцоог нэвтрүүлэх ёстой гэж үзэж байна.

-Тодорхой хэмжээний өөрчлөлт гэдгээр та Үндсэн хуульд нэмэлт өөрчлөлт оруулахыг дэмжиж байгаа гэж ойлгож болох уу?

-Нэмэлт өөрчлөлт, эсвэл шинэ Үндсэн хууль гэж аль нэгийг нь зааж хэлмээргүй байна. Асуултын эхэнд хариуллаа шүү дээ. Энэ бол өргөн хүрээний том асуудал. Тиймээс ярилцлагын дунд дурдаад өнгөрөх нь зохимжгүй. Үндсэн хуулийн асуудлаар маш олон хэлэлцүүлэг өрнөсөн. Олон намууд оролцсон. Нам бүр шинэ Үндсэн хууль боловсруулсан байдаг. Тэгэхээр энэ том концепцийг харахдаа тусгайлсан сэдэв болгож алдаа, оноогоо дэнсэлж, өөрчлөлтөөр ирээдүйд ямар нөлөө учрах вэ гэдгийг ярих нь зүйтэй.

Нэмж хэлэхэд, Ардчилсан Үндсэн хуулийг хэлэлцэж баталсан протоколыг харах ёстой. Тэр үеийн Үндсэн хуулийг боловсруулсан хүмүүс ирээдүйг хэрхэн харж байсан. Үндсэн хуулийн заалт нэг бүр дээр төвлөрч ямар үр дагавар гарах вэ гэдгийг хэлэлцсэн тухай. Мөн тэдний хүссэн үр дүн өнөөдөр бий болсон эсэх. Хэрвээ үгүй бол бид юун дээр алдсанаа харах нь зөв гэж бодож байна. Ийн нарийн хандах ёстой гээд байгаа шалтгаан нь Үндсэн хуулиар ирээдүйн Монгол Улсын дүр зургийг тодорхойлдог болохоор тэр.

-Н.Энхбаярын даргын боловсруулж, танилцуулсан шинэ Үндсэн хууль нийгмийн анхаарлыг их татсан. Нэг хэсэгтээ л шуугиулсан. Та тэрхүү хуулийн төслийг хэрхэн дүгнэж байгаа вэ?

-Ерөнхий сайд Үндсэн хууль боловсруулах ажлын хэсэг гаргасан. Ажлын хэсгийн ахлагчаар нь миний аавыг томилсон. Нам бүр өөрийн боловсруулсан Үндсэн хуультай байсан. Тиймээс намуудтай уулзаж, бүгдийнх нь төслийг судалж, зөвшилцсөний үндсэн дээр зөв шийдэл нь энэ гээд тэрхүү Үндсэн хуулийг Ерөнхий сайдад гардуулж өгсөн. Социализмын Үндсэн хууль бол нам төвтэй байсан. Өнөөдөр хүчин төгөлдөр хэрэгжиж байгаа Үндсэн хууль төр төвтэй. Харин шинэ боловсруулсан Үндсэн хууль бол хүн төвтэй хууль. Ардчилсан нийгэмд хүний эрх гэдэг бол хамгийн чухал, том сэдэв. Тиймээс миний аавын боловсруулсан төсөл бол хүнийг төв болгосон хууль л даа.

-Та Үндсэн хуулийн сэдэв одоохондоо эрт байна гэсэн болохоор дараагийн сэдэв рүүгээ оръё. Та санхүүч хүн. Энэ улс орны иргэд ам.долларын өсөлт, үнийн хөөрөгдөлд дарлуулж байна. Богино хугацаанд бид үүнээс яаж гарах вэ?

-Эдийн засаг бол миний ярих дуртай сэдэв шүү. Таны асуултад хариулахын өмнө гадаад орчны байдлыг ярих нь зөв болов уу. Гадаад орчин хүнд нөхцөлд орчихсон байна. Сүүлийн 20 жилд байгаагүй санхүүгийн тулгамдсан асуудлууд гарчихлаа. Тэр дундаа дэлхий нийтийн өмнө тулгарч байгаа том асуудал бол үнийн өсөлт. Турк улсын үнийн өсөлт 80-аас дээш хувьтай болчихлоо. Америк, Европын холбоо болон бусад улс орнуудын инфляци сүүлийн 25 жилд байгаагүй өндөр түвшинд хүрсэн. Үүнд улс орнуудын Төв банкууд бодлогын хүүгээ өсгөсөн нь нөлөөлсөн. Америк бодлогын хүүгээ чангаруулсан байгаа. Энэ жил дахин чангаруулна гэсэн төлөвтэй байна. Бодлогын хүү чангарахаар автоматаар ам.долларын ханш чангарна. Бүх валютын эсрэг ам.долларын ханш чангарч байна. Үүнээс гадны Орос-Укрианы байдал дэлхийн үнийн өсөлтөд нөлөөлсөн.

Америкийн Төв банк бодлогын хүүгээ өсгөсний дүнд хоёр сонголтын өмнө зогсож байна. Нэгдүгээрх нь, эдийн засгаа хатааж нурааж үнийн өсөлтөө барих. Учир нь үнийн өсөлтөө барихын тулд эдийн засгаа хатааж эдийн засгийн өсөлтөө барьж байж эрэлт нийлүүлэлтийг багасгана.

Өнгөрсөн долоо хоногт санхүүгийн зах зээлд том шок үүслээ. 209 тэрбум ам.долларын активтай Sili­con Valley Bank дампуурсан. Дээрээс Нью-Йоркийн 110 тэрбум ам.долларын активтай Sig­nature Bank дампуурсан. Үүнийг дагаад 212 тэрбум ам.долларын активтай First Republic Bank дампуурлын ирмэгт ирж АНУ-ын бусад банкууд 30 тэрбум ам.долларыг түр байршуулснаар дампуурлаас аварсан байдалтай байна. Санхүүгийн зах зээлд маш том цочроо явж байна. АНУ-ын Төв банкны хүү огцом нэмэгдсэнээр нэгдүгээрт, зээлдэгчид нь мөнгөө эргэж төлж чадахааргүй болчихоод байна.

Учир нь Америкийн банкуудын дийлэнхийнх нь зээл нь хэлбэлздэг хүүтэй. Хатуу хүүтэй биш гэсэн үг. Бодлогын хүү дээр нэмэх нь тэдэн хувь гэж явдаг. Бодлогын хүү өсөхөөр зээлийн эргэн төлөлтийн сарын төлөлт нь ихэсчихэж байгаа юм. Ингэхээр банкууд нь төлж чадахгүй хүнд байдалд орчихоод байна. Хоёрдугаарх шалтгаан нь, АНУ-аас олон банк бонд авчихсан байдаг.

Бодлогын хүү ихэссэнээс үүдэж бондын үнэлгээ болон барьж байгаа активын үнэлгээ нь багасчихаад байгаа юм. Ингээд зохистой харьцаа нь алдагдаж банкууд хүнд байдалд орж байна. Суурь нөхцөл ийм байна. Үүнээс шалтгаалж өнгөрөгч амралтын өдрүүдэд юу болсон бэ гэхээр дэлхийн топ 10-т ордог Швейцарийн Credit Suisse bank дампуурлын ирмэгт ирсэн. Швейцарьт хоёрдугаарт, дэлхийд 10-т ордог банк дампуурч байгаа нь 2008, 2009 оны хямралыг шинээр авч ирэх нөхцөл үүссэн. Үүнийг засахын тулд Швейцарийн Төв банк Credit Suisse bank-нд 54 тэрбум ам.долларын дэмжлэг өгсөн. Түүнчлэн тус банк дампуурахгүй нь тулд Швейцарийн хамгийн том банк болох UBS-тай өнгөрөгч ням гаригт нэгдлээ. Швейцарийн хамгийн том 575 тэрбум ам.долларын бланстай банкийг UBS bank 3.2 тэрбум ам.доллараар өөртөө нэгтгээд авчихлаа. Дээрээс нь Швейцарийн Засгийн газар 100 тэрбум ам.долларын баталгаа өгч байна. 2008, 2009 оны санхүүгийн нөхцөл байдлыг ахиж үүсгэхгүйн тулд улс бүрийн Засгийн газар, Төв банкууд хурдтай арга хэмжээ авч байна. Дэлхийн санхүүгийн нөхцөл байдал эмзэг, тогтворгүй байна гэдэг нь үүнээс харагдаж байна. Дэлхийн олон орны Төв банкууд бодлогын хүүг огцом нэмсэн нь сүүлийн 20 жилд байгаагүй хүндрэлүүд гарч байна.

Харин Монгол Улсын эдийн засгийг ярихад өнгөрсөн онд манай улсын эдийн засагт 4.8 хувийн өсөлт гарсан. Бусад орнуудтай харьцуулбал, харьцангуй гайгүй үзүүлэлт. Тулгамдаж байгаа гол асуудал нь төгрөгийн ханш суларч ам.долларын үнэ өслөө. Мөн үнийн өсөлт байна. Энэ хоёр асуудалд дотоодын бодлогоос илүү гадаадаас ирж байгаа санхүүгийн салхи нөлөөлж байна. Монгол Улс тодорхой хэмжээгээр давж чадлаа. Гэхдээ иргэд, аж ахуйн нэгжид хангалттай бодлогын өөрчлөлт болж чадсангүй гэсэн шүүмжлэл явж байна. Бид чадах бүхнээ хийсэн. Учир нь Монголын эдийн засаг өөрийн гэсэн тодорхой хэмжээний нөөцтэй. Боомтын сэргэлтийн хүрээнд 32 сая тонн нүүрс гаргаж, түүхэндээ хамгийн өндөр орлого буюу 12 тэрбум ам.долларт хүрсэн. Энэ жил 40 сая тонн нүүрс экспортолчихвол Монголын эдийн засагт том өгөөж авч ирнэ. Үүнийг дагаад Уул уурхайн биржийн тухай хууль батлагдсан. Нүүрсийг биржээр арилжаалж байгаа нь ханшинд тодорхой хэмжээний эерэг нөлөө үзүүлнэ. Валютын нөөцөд ч эерэг нөлөөтэй.

Хаврын чуулганаар Аялал жуулчлалын тухай хууль хэлэлцэгдэнэ. Нэг сая жуулчныг авчирвал Монгол Улсын эдийн засагт 1-1.5 тэрбум ам.долларын өгөөж ирэх боломжтой. Энэ бол манай улсын жилийн хэрэглээний гуравны нэг гэсэн үг л дээ. Валютын нөөцөд мөн эерэг нөлөө үзүүлнэ. Ханшийг тогтвортой байхад ч нөлөөлнө. Аж ахуйн нэгжүүд тэр дундаа аялал жуулчлалын салбарын аж ахуйн нэгжийн орлого нэмэгдэнэ. Ажлын байр бий болно. Татварын орлого нэмэгдэнэ гэх мэтчилэн эерэг нөлөө гарна.