Month: September 2022

Хичээлийн шинэ жил эхэлж буйтай холбогдуулан нийслэлийн тодорхой бүсэд автомашинуудыг улсын дугаарын тэгш, сондгойгоор замын хөдөлгөөнд оролцуулж байгаа.

Нийслэлийн Засаг дарга захирамж гаргасны дагуу наймдугаар сарын 27-ны өдрөөс найм хоногийн турш дугаарын хязгаарлалт хийж буй бөгөөд энэхүү хязгаарлалтын талаарх бодит мэдээллийг Замын хөдөлгөөний удирдлагын төв НӨҮГ-тай хамтран хүргэж байна. Энэ жилийн хувьд Монгол Улсын Засгийн газар, БШУЯ, НЗДТГ, Нийслэлийн боловсролын газраас сургууль, цэцэрлэг, боловсролын байгууллагуудын хүртээмжийг нэмэгдүүлэхэд онцгой анхаарч байгаатай холбоотойгоор авто замын ачаалал урьд өмнөх жилүүдээс нэмэгдсэнээрээ онцлог юм.

Замын хөдөлгөөний удирдлагын төв НӨҮГ-ын Хөдөлгөөн зохицуулалт, хяналтын хэлтсийн дарга Н.Намуу дараах тайлбарыг өглөө.

Тэрбээр “Манай төвийн бүртгэлийн камерт бүртгэгдсэнээр 2021 онд дугаарын хязгаарлалтын үед 340 мянган тээврийн хэрэгсэл хөдөлгөөнд оролцож байсан. Өнгөрсөн онд хичээл эхлэхийн өмнөх хагас, бүтэн сайн хоёр өдөр л хязгаарлалт хийсэн. Харин энэ жилийн хувьд дугаарын хязгаарлалт найм хоног үргэлжилнэ. Бүртгэлээс харахад энэ жилийн дугаарын хязгаарлалтын үед хөдөлгөөний эрчим өмнөх жилээс 16 хувиар буурсан дүн гарч, энэ ажил үр дүнтэй үргэлжилж байна. Нийслэлийн Засаг даргын захирамжийн дагуу иргэд, жолооч нар үүрэг хариуцлагаа ухамсарлан хөдөлгөөнд оролцож байна.

Дугаарын хязгаарлалт хийгээгүй байх үеийн хөдөлгөөний ачаалалтай харьцуулбал 45-50 хувиар буурсан мэдээ гарч байна. 2021 оны наймдугаар сарын 30-ны даваа гарагт 462,672 тээврийн хэрэгсэл хөдөлгөөнд оролцож байсан бол энэ оны наймдугаар сарын 29-ний даваа гарагт 249,541 тээврийн хэрэгсэл хөдөлгөөнд оролцсон. Үүнийгээ дагаад тээврийн хэрэгслийн хурд нэмэгдэж байгаа. Дугаарын хязгаарлалтгүй үед 7-8 км цагийн хурдтай зорчдог бол дугаарын хязгаарлалтын үед 17-18 км цаг болж нэмэгдэж байгаа нь хяналтын камераас харагдаж байна гэлээ.

Нийслэл Улаанбаатар хотын гол зам болох Энхтайваны өргөн чөлөө, Энхтайваны өргөн чөлөөнөөс урагш салаалсан дөрвөн гүүр, Нарны зам зэрэг газрууд замын хөдөлгөөний ачаалал өндөртэй. Мөн зах, худалдааны төвүүдийг чиглэсэн авто зам ачаалалтай байдгийг мэргэжилтэн тодотгож байлаа. Дугаарын хязгаарлалт хийгээгүй үед өглөөний 07:00 цагаас эхлээд дээр дурдсан гүүрнүүд ачаалалтай болж эхэлдэг гэнэ. Тэгвэл өнөө өглөөний хувьд гүүр төдийгүй төв замын хөдөлгөөн сийрэг байжээ. Түүнчлэн ердийн өдрүүдэд 2,700-3,000 удаагийн хөдөлгөөн зохион байгуулалтыг мэргэжилтнүүд хийдэг бол дугаарын ялгамжтай зорчих үед 500-600 удаа хөдөлгөөн зохион байгуулалт хийжээ.

Дугаарын хязгаарлалт нь хойд зүгт 32-ын тойрог, урд зүгт Тэмээтэй хөшөөний уулзвар, Баруун зүгт Саппорогийн тойрог, зүүн тийш Чулуун овооны пост хүртэл үргэлжилж байгаа. Хязгаарлалтаас гадуурх бүсэд ачаалал нэмэгдсэн үү гэсэн асуултад Н.Намуу хариулахдаа “Хязгаарлалтын эхлэл цэгүүдэд хөдөлгөөн зохицуулагч нар ялгалт хийж байгаа. Тэгш тоогоор төгссөн машин явах байтал сондгой тоотой машинтай зорчихыг оролдох тохиолдол цөөнгүй гарч байна. Тиймээс ялгалт хийж буй цэгүүдэд л ачаалал үүсэж байгаа болохоос бусад замууд ачаалал багатай байна. Хамгийн их ачаалалтай Нисэх, Яармагийн зам ч хөдөлгөөн багатай байгааг хяналтын камераас харж болно” гэсэн юм.

Иргэд олон нийттэй харилцах 11-11 төвд хандсан иргэдийн 70 хувь нь дугаарын хязгаарлалтыг дэмжсэн бол 30 хувь нь хязгаарлалттай холбоотой санал, гомдол хэлсэн байна. Найм хоногийн буюу богино хугацааны замын хөдөлгөөний зохицуулалт үр дүн сайтай байгааг мэргэжилтнүүд онцолж байлаа. Дугаарын хязгаарлалт есдүгээр сарын 3-ны бямба гарагийг дуустал үргэлжилнэ.

Эх сурвалж: Нийслэлийн сургалт, судалгаа, олон нийттэй харилцах газар

Авлигатай тэмцэх газрын Хяналт шалгалт, дүн шинжилгээний хэлтэс нь 2022 оны 8 дугаар сарын 22-26-ны өдрүүдэд нийтийн албанд томилогдохоор нэр дэвшсэн 388 иргэний хувийн ашиг сонирхлын урьдчилсан мэдүүлгийг шалган, 264 мэдүүлгийг хянан шийдвэрлэлээ.

Одоогоор ажиллагаанд 124 нэр дэвшигчийн урьдчилсан мэдүүлэг хянагдаж байна. Тухайн хугацаанд иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 18 гомдол, мэдээллийг хүлээн авч шалгаснаас 9 гомдол, мэдээллийг хянан шийдвэрлэлээ. Төлөвлөгөөт хяналт шалгалтын хүрээнд 35 албан тушаалтны хувийн ашиг сонирхлын болон хөрөнгө, орлогын мэдүүлгийг шалгав гэж Авлигатай тэмцэх газраас мэдээллээ.

Сэтгэцийн эрүүл мэндийн үндэсний төв /СЭМҮТ/ архинд донтох эмгэгийн өдрийн эмчилгээг эрүүл мэндийн даатгалаар үнэ төлбөргүй явуулж байна.

2015 оноос эхлүүлсэн энэ эмчилгээг энэ оноос эхлэн эрүүл мэндийн даатгалаар үнэгүй үзүүлдэг болжээ.

Эмчилгээг мэргэжлийн эмч, сэтгэл зүйч, нийгмийн ажилтан, сувилагч ажлын өдрүүдэд 09-14:00 цагийн хороонд хийх бөгөөд амралтын өдрүүдэд 10-13 цагийн хороонд бүлгийн ярилцлага, хөгжүүлэх, нөлөөлөх сургалт явуулна.

Эмчилгээ хоёр долоо хоногийн турш үргэлжилнэ.

Улаанбаатар хотод 2022-2023 онд 679 цэцэрлэг ажиллаж байна.

Эдгээр цэцэрлэгт 16,376 хүн ажиллаж байгаа бөгөөд тэдний 6,200 нь багш, сурган хүмүүжүүлэгч нар юм.

Нийслэлд сургуулийн өмнөх боловсролын байгууллагад суралцах насны 141,023 хүүхэд амьдарч буй.

Тодруулбал, нийслэлд

• таван настан 35,125
• дөрвөн настан 36,208
• гурван настан 35,718
• хоёр настан 33,972 байна.

Гэвч 2-5 настай хүүхдүүдийн 106,538 буюу 76 хувь нь цэцэрлэгтээ явж, 34,485 нь гэртээ үлдэхээр байгаа.

Иймд хүртээмжийг нэмэгдүүлэхээр түрээсийн байр, хүүхэд харах үйлчилгээ, бүтээн байгуулалт зэрэг ажил хийсээр байна. Тухайлбал, 2022 онд цэцэрлэг, бага сургуулийн нэг цогцолбор, цэцэрлэгийн гурван барилга ашиглалтад ороод байна. Үүн дээр нэмж, он дуусах хүртэл хугацаанд цэцэрлэг, бага сургуулийн гурван цогцолбор, цэцэрлэгийн 13 барилга ашиглалтад оруулахаар тооцож байгаа аж.

Гадаад харилцааны яамнаас Монгол, Хятадын хоорондын нислэгийн тоог нэмэгдүүлж, долоо хоногт зургаан удаа нислэг үйлдэх асуудлыг Хятадын талтай тохиролцжээ. Улмаар хоёр улсын Иргэний нисэхийн ерөнхий газар болон агаарын тээвэрлэгч компаниуд холбогдох зөвшөөрлөө харилцан авч, хуваариа тохиролцох чиглэлээр ажиллаж байгаа гэдгийг холбогдох яамнаас мэдээллээ.

Улсын хэмжээнд наймдугаар сарын 29-ний өдрийн байдлаар нийт 133,229 тонн шатахууны нөөцтэй байгааг УУХҮЯ-наас мэдээллээ.

Үүнээс А-80 авто бензин 8,147 тонн буюу 49 хоногийн, АИ-92 авто бензин 33,723 тонн буюу 25 хоногийн, АИ-95 авто бензин 7,076 тонн буюу 53 хоногийн, ДТ 80,335 тонн буюу 29 хоногийн, онгоцны түлшний 56 хоногийн нөөцтэй.

Шатахууны нөөцийг бүсчилбэл, баруун бүсэд 15,691 тонн, хангайн бүсэд 7,132 тонн, төвийн бүсэд 32,230 тонн, зүүн бүсийн шатахууны үлдэгдэл, нөөц 8,034 тонн.

Улсын хэмжээнд мэдээлэл, харилцаа холбооны салбарын орлого энэ оны эхний хагас жилд 854.7 тэрбум төгрөг болж, өмнөх оны мөн үеийнхээс 105.1 (14 хувь) тэрбум төгрөгөөр нэмэгдлээ.

Үүнд утасгүй холбооны үйл ажиллагааны орлого 62 (14.3 хувь) тэрбум, утсан холбооны орлого 26 (28.6 хувь) тэрбум, өргөн нэвтрүүлэг бэлтгэх, дамжуулах үйл ажиллагааны орлого 14.1 (14.6 хувь) тэрбум төгрөгөөр нэмэгдсэн нь нөлөөлжээ.

Суурин утасны цэгийн тоо энэ оны 2 дугаар улирлын эцэст 340.6 мянга болж, өмнөх оны мөн үеийнхээс 30.8 (9.9 хувь) мянган цэгээр нэмэгдсэн байна. Ийнхүү нэмэгдэхэд нийслэлийн суурин утасны цэг 27.8 (10.9 хувь) мянгаар өссөн нь нөлөөлснийг Үндэсний статистикийн хороо мэдээлэв.

Кабелийн телевиз хэрэглэгчид энэ оны 2 дугаар улирлын эцэст 975.7 мянга болж, өмнөх оны мөн үеийнхээс 32.7 (3.5 хувь) мянган хэрэглэгчээр нэмэгдэв. Үүнд Улаанбаатар хотод 6.5 (1.3 хувь), Дорноговь аймагт 2.5 (11.1 хувь), Ховд аймагт 2.3 (12.4 хувь), Дархан-Уул аймагт 2 (8 хувь), Хөвсгөл аймагт 1.9 (5.9 хувь) мянган хэрэглэгчдээр нэмэгдсэн нь нөлөөлжээ.

Үүрэн утасны идэвхтэй хэрэглэгчид энэ оны 2 дугаар улирлын эцэст 4.7 (давхардсан тоо) сая болж, өмнөх оны мөн үеийнхээс 187.8 (4.2 хувь) мянган хэрэглэгчээр нэмэгджээ. Энэ өсөлтөд Өмнөговь аймгийн хэрэглэгч 12.8, Улаанбаатар хотын хэрэглэгч 9.1, Дундговь аймгийн хэрэглэгч 2.9 хувиар нэмэгдсэн нь нөлөөлөв.

Интернэт хэрэглэгчдийн тоо мөн хугацаанд 4.1 сая болж, өмнөх оны мөн үеийнхээс 136.6 (3.4 хувь) мянган хэрэглэгчээр нэмэгдлээ. Үүнд үүрэн холбооны хөдөлгөөнт өргөн зурвасын хэрэглэгч 99.8 (2.5 хувь), гэрээт интернэт хэрэглэгч 36.8 (10.7 хувь) мянгаар тус тус өссөн нь нөлөөлжээ.