Month: June 2022

Оросын зэвсэгт хүчин Украин улсын нутаг дэвсгэрт халдан довтолсонтой холбоотойгоор Швед, Финланд улсууд олон жилийн турш баримталж ирсэн төвийг сахих бодлогоосоо татгалзаж, НАТО-д гишүүнээр элсэх өргөдөл гаргасан билээ.

Гэвч тэдний хүсэлтэд Турк улс ганцаараа хориг тавьсан юм. Учир нь Анкарагийн эрх баригчдын “террористууд” гэж үздэг Курдийн салан тусгаарлагчдыг дээрх улсууд нутаг дэвсгэртээ орогнуулдаг гэсэн үндэслэлээр хориг тавьж байжээ. НАТО-д шинэ гишүүн элсүүлэхэд бүх 30 гишүүн орон 100 хувь санал нэгдсэн байх ёстой юм.

Харин өчигдөр Испанийн нийслэл Мадрид хотод эхэлсэн НАТО-гийн гишүүн орнуудын дээд чуулганы үеэр Турк улс хоригоо цуцалж, Швед, Финланд улсуудыг гишүүнээр элсүүлэхийг зөвшөөрчээ.

“Бид Финланд, Швед улсуудыг НАТО-д элсүүлэх тохиролцоонд хүрлээ. Энэ бол түүхэн шийдвэр юм” гэж НАТО-гийн ерөнхий нарийн бичгийн дарга Йенс Столтенбэрг өчигдөр мэдэгджээ.

Ингэснээр Швед, Финланд улсууд аюулгүй байдлаа баталгаажуулж байна. НАТО-гийн дүрмээр бол аль нэг гишүүн оронд нь гаднаас зэвсэглэн халдвал хамгаалах үүрэг хүлээдэг.

Өчигдрийн уулзалтын дараа терроризмын эсрэг тэмцэлд хамтарч ажиллахаар тохиролцож чадсанаа Туркийн тал мэдэгджээ. Мөн 2019 онд Туркийн арми Сирийн умард нутаг дэвсгэрт байлдааны ажиллагаа явуулж эхэлсэнтэй холбоотой Швед, Финланд улсуудын Анкарагийн эрх баригчдын эсрэг тавьсан зэвсэг нийлүүлэх хоригийг цуцлахаар болсон байна.

НАТО-гийн өргөжилтийг зогсоох зорилгоор Украин улсад зэвсэглэн халдсан ОХУ-ын эрх баригчдад энэ шийдвэр нь том цохилт болж байгаа юм.

Балканы хойгийн Болгар улсын засгийн газар ОХУ-ын 70 дипломатчийг нутаг дэвсгэрээсээ хөөх болсныг өчигдөр зарлажээ.

Энэ нь Софи хот дахь ОХУ-ын элчин сайдын яамны ажилтнуудын талаас илүү хэсэг болж байна.

“Болгар улс Оросын 70 дипломатчийг нутаг дэвсгэрээсээ албадан гаргахаар боллоо. Тэднийг манай улсын ашиг сонирхлын эсрэг ажилладаг болохыг тусгай албад тогтоосон” гэж тус улсын ерөнхий сайд Кирил Петков өчигдөр мэдээлжээ.

Тэрбээр цааш нь ярихдаа “Болгар улсын ашиг сонирхлын эсрэг ажилласан бүгд нутаг буцах ёстой. Бид 70 суудал дүүрэн нисэх онгоц Москва руу нисгэх гэж байна” гэсэн байна.

Оросын дипломатчидын тус улсаас гарах сүүлчийн хугацаа долдугаар сарын 3-ны өдөр болохыг гадаад хэргийн яам нь мэдээлжээ.

Украинд Оросын цэрэг халдан довтолсноос хойш Европын олон улс орон Москвагийн дипломат ажилтнуудыг нутаг буцаасан юм.

Болгар улс нь коммунизмын үед Москватай найрсаг харилцаатай байсан. Мөн орчин үед Оросын жуулчдаас ихээхэн орлого олж байгаа.

Гэхдээ ерөнхий сайд Петковын үед тус улс ОХУ-тай харилцах харилцаандаа урьд өмнө байгаагүй хатуу байр суурь баримтлах болсон юм.

Тэрбээр хоёрдугаар сард Украины дайныг “цэргийн тусгай ажиллагаа” гэж нэрлэсэн батлан хамгаалахын сайдаа огцруулж байв.

2019 онд Оросын дипломатчид Болгарт тагнуулын ажиллагаа явуулдаг гэх дуулиан дэгдэж, өнгөрсөн хугацаанд тус улсын элчин сайдын яамны 20 ажилтныг нутаг дэвсгэрээсээ хөөгөөд байсан юм.

Хятадын Шинжлэх Ухааны Академийн эрдэмтэд Төвөдийн мөсөн голоос цуглуулсан цас, мөсний дээжээс мянга орчим төрлийн бактери илрүүлсэн талаар “Phys.org” мэдээллээ.

Мөсөн бүрхүүл, мөсөн голууд нь дэлхийн гадаргуугийн 10 орчим хувийг эзэлдэг ба цэвэр усны хамгийн том усан санд тооцогддог.

Эрдэмтэд 2010-2016 онуудад Төвөдийн 21 мөсөн голоос цас, мөсний дээж авч, хайлуулан шинжлээд усанд чухам юу үлдсэнийг шалгах туршилт судалгаа хийсэн юм.

Судалгаагаар эрдэмтэд 968 өвөрмөц нянгийн төрлийг олж илрүүлсэн ба тэдгээрийн ойролцоогоор 98 хувь нь урьд өмнө хэзээ ч байгаагүй төрлийн нян, вирусууд байгаа аж. 15 мянган жилийн настай мөснөөс мөн хэд хэдэн төрлийн вирус илрүүлсэн өөр багийн хийсэн судалгааны үр дүнд ихэнх нь бас хэзээ ч бүртгэгдэж байгаагүй төрлүүд байгааг эрдэмтэд онцолжээ.

Эрдэмтдийн үзэж байгаагаар, тэдгээр нян, вирусуудын зарим нь хүн, амьтанд халдварлах боломжтой. Ялангуяа, уур амьсгалын өөрчлөлтөөс шалтгаалж цас, мөс хайлахын хэрээр хүн ам суурьшсан газрын гол мөрөн, горхи руу тэдгээр нян, вирусууд орох эрсдэлтэй юм.

Орчин үеийн ургамал, амьтад, тэр тусмаа хүн төрөлхтөн аль хэдийн шинжлэх ухаанд ил болж танигдсан “хуучин” нянгуудтай харьцуулахад эсэргүүцэх дархлаа хүний биед суугаагүй, эмчлэхэд хүндрэлтэй, цаашлаад үхэлд ч хүргэж болох талтайг эрдэмтэд анхааруулж байгаа юм.

Судлаачид тэдний судалсан нян, бактери нь дэлхийн онцгой чухал бүс нутгаас б гаралтай болохыг онцолж байна. Төвөдийн цас, мөс хайлж, Хятад, Энэтхэгийн хүн ам шигүү суурьшсан бүс нутгуудад хүрэх учир эрсдэлтэй.
Учир нь, хэд хэдэн гол, мөрөн рүү урсдаг юм. Үүнтэй холбогдуулан шинжээчид дэлхийн өнцөг булан бүрт мөсөн голоос тархах нян, бактериудыг судлах ажлыг нэн даруй эхлүүлэхийг санал болгож байна.