Үүнээс зөрчлийн дуудлага мэдээлэл 1511, хулгайтай холбоотой 22, гэр бүлийн хүчирхийллийн дуудлага 141, гэмт хэргийн шинжтэй мэдээлэл 93 бүртгэгдсэн байна.
Үүнээс гадна автомашин согтуу жолоодсон 86, олон нийтийн газар зүй бусаар биеэ авч явж, танхайрсан 128, хүний биед халдсан 35, Архидан согтуурахтай тэмцэх тухай хууль зөрчсөн 94, эрүүлжүүлэх байранд хоносон 190, оршин суугчдын амгалан тайван байдал алдагдуулсан 60 тохиолдол гарчээ.
Япон улс бизнес болон ажлын зорилгоор богино хугацаагаар /3 хүртэл сар/ зорчих шаардлагатай гадаад иргэдийг хилээр нэвтрүүлэхийг зөвшөөрч эхлэв. Тодруулбал, арваннэгдүгээр сарын 8-ны өдрөөс заасан нөхцөлийг хангасан тохиолдолд урт хугацааны оршин суух зөвшөөрөл бүхий шинээр хилээр нэвтрэх гадаад иргэд хувийн зардлаар суралцаж буй оюутан, ур чадварын дадлагажигч болон бизнесийн зорилгоор томилолтоор зорчих гэж буй иргэд хилээр нэвтрүүлэхийг зөвшөөрч эхэлсэн байна.
Эдгээр иргэд япон талын хүлээн авагч байгууллагын хариуцаж буй ажилтантай холбогдож (суралцах гэж буй сургууль, томилолтоор болон ажиллахаар очих гэж буй үйлдвэр аж ахуйн нэгж) Япон улсын холбогдох яам тамгын газраар (боловсролын байгууллага нь Боловсролын яам, хувийн хэвшлийн үйлдвэр аж ахуйн нэгж нь үйл ажиллагааг хариуцсан яам тамгын газар) хянагдан, “Хянагдаж дууссан тодорхойлолт”-ыг авах шаардлагатай гэнэ.
Иймд Япон улс руу шинээр зорчих гэж буй гадаад иргэд эхлээд Япон талын хүлээн авагч байгууллагаар дамжуулан энэ “Хянагдаж дууссан тодорхойлолт”-ыг авна уу. Жич: Тус ЭСЯ-наас “Хянагдаж дууссан тодорхойлолт”-ыг олгодоггүй болохыг анхаарна уу. “Хянагдаж дууссан тодорхойлолт“-гүй оюутан сурагч, ур чадварын дадлагажигч зэрэгт Визийн олголт хийх боломжгүй болно.
Засгийн газрын ээлжит хуралдаан болж байна.
Хуралдаанаар цаг үеийн асуудлыг хэлэлцэж байна. Мөн хуралдаанаар Шүүх шинжилгээний тухай хуулийн төслийг хэлэлцэж, УИХ-д өргөн барих эсэхийг шийднэ.
Тус хууль нь хэрэг, маргааныг хянан шийдвэрлэхэд хийдэг шүүх шинжилгээ хийх үндэслэл, журам, төрөл, процедур боловсронгуй болохын зэрэгцээ олон жил ярьж буй гэмт хэргийн улмаас хохирогчид учирсан сэтгэл санааны хохирол буюу сэтгэцэд учирсан хор уршгийг тодорхойлох, нөхөн төлбөрийг хэмжээг тогтоох эрх зүйн зохицуулалтыг тодорхой болгохыг зорьж байгаа болно.
ОХУ-ын Засгийн газрын тэтгэлгээр тус улсын их, дээд сургуульд суралцах хүсэлт авах хугацааг 12 дугаар сарын 15-ныг хүртэл сунгасан байна.
ОХУ-ын Засгийн газрын шийдвэрээр 2022-2023 оны хичээлийн жилд Монгол Улсын 600 иргэнийг тус улсын Засгийн газрын тэтгэлгээр суралцуулахаар шийдвэрлэжээ.
Тэтгэлэгт хөтөлбөрийн сонгон шалгаруулалтыг хийхдээ ОХУ-д суралцах хүсэлтэй иргэдээс ирүүлсэн хүсэлт/мэдүүлэг болон бичиг баримтыг судлан үнэлэх замаар буюу “Портфолио шалгаруулалт” хэлбэрээр зохион байгуулна.
Иргэд бүрдүүлэх материалын талаар Сонгон шалгаруулалтын комисст хандан зөвлөгөө авах боломжтой.
Зөвлөгөө өгөх хуваарь: Даваа-Баасан гараг 09.00-18:00 цагийн хооронд. Холбогдох утас: 45-46-00, 99092277.
“Портфолио шалгаруулалт” зохион байгуулах журам
ОХУ-д суралцах хүсэлтэй иргэд Оросын тэтгэлэгт хөтөлбөрийн сонгон шалгаруулалтад оролцох хүсэлт буюу мэдүүлгээ https://education-in-russia.com/ цахим мэдээллийн системд 2021 оны 12 дугаар сарын 15-ны өдрөөс өмнө оруулсан байх шаардлагатай бөгөөд дээр дурдсан системд өөрийн бичиг баримтаа амжилттай оруулсан горилогчийн бичиг баримтыг ОХУ-ын тэргүүлэх сургуулиудын төлөөллөөс бүрдсэн Экспертийн комисс хянаж, сонгон шалгаруулалтыг хийнэ.
Экспертийн комисс нь горилогчийн баримт бичгийг шалгахдаа дараах зүйлийг харгалзан үзнэ. Үүнд:
– орон нутгийн түвшинд (магистр ба аспирантурт элсэгчдийн хувьд их сургуулийн түвшинд)
– ОХУ-д зохион байгуулсан олимпиад
– Бүх Оросын олимпиад
– Эрдэм шинжилгээний бага хуралд тавьсан илтгэл, хэвлүүлсэн нийтлэл (диплом эсвэл нийтлэлийн скан хуулбараар баталгаажуулсан байна)
5. Олон улсын арга хэмжээнд оролцсон байдал (Ялалтын баяр, олон нийтийг хамарсан буюу “тотал”, “угсаатан зүйн” цээж бичгийн уралдаан)
Горилогчдын бичиг баримтыг судлахдаа олимпиадын ялагч, шагналт байранд орсныг харгалзан үзнэ.
Архитектур-уран барилга болон Дизайны мэргэжлээр элсэж буй горилогчдын хувьд:
Архитектур-уран барилга болон Дизайны мэргэжлээр элсэх хүсэлтэй горилогчид анкетаа бөглөхдөө А-4 хэмжээтэй цаасан дээр зурсан бүтээлээ (шугам зураг, гар зураг, зохиомж зэрэг) хавсаргах шаардлагатай.
Өнгөт харандаа, гуаш, усан будаг зэргээр зурсан бүтээл (байгалийн зураг, натюрморт)
Биет зүйлсийн дүрс (хараандан зураг), тойрог, тэгш өнцөгт эсвэл квадрат (хайрцаг эсвэл лааз гэх мэт)
Гортиг, шугам гэх мэт хэрэгсэл ашиглаж зурсан шугам зураглал.
Эх сурвалж: БШУЯ
Өнөөдөр нутгийн зүүн хэсгээр үүлшиж, Дорнод Монголын тал нутгаар ялимгүй цас орно.
Бусад нутгаар багавтар үүлтэй, цас орохгүй. Салхи ихэнх нутгаар баруун хойноос секундэд 4-9 метр, говь, талын нутгаар секундэд 12-14 метр хүрч ширүүснэ. Монгол-Алтай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндий, Дарьгангын тал нутгаар 2-7 градус хүйтэн, Орхон-Сэлэнгийн сав газар болон говийн бүс нутгаар 3-8 градус дулаан, бусад нутгаар 4 градус дулаанаас 1 градус хүйтэн байна. Ойрын хоногуудад ихэнх нутгаар цаг агаар тогтуун, өдөртөө бага зэрэг дулаарна.
Монголын цахим орчин бол тэр чигээрээ гадаадын компаниудын хараат. Өөрийн гэх үндэсний цахим суваг байхгүй байгааг бид одоо ойлгох цаг болжээ. Цахим хэрэглээ нь давуу чанар ихтэй. Гар утаснаасаа шууд орж ашиглана, хүртээмж өндөр, хурдтай. Ийм цахим сувгууд руу компаниуд зар сурталчилгааны төлбөрөө тушааж байна. Тухайлбал Google, Yahoo, facebook, Telegram, Twitter, Tiktok, Viber, Instagram… гэхчлэн бичвэл гадны олон платформ байна. Эдгээр платформууд дор бүртээ өөрийн хуультай. Наад зах нь төрөөс хууль гаргаж тэдэн хувийг эдгээр нөхдөд төлнө гэж хуульчилсан байдаг юм.
Үүгээр юу хэлэх гээд байна гэхээр монголчуудад үндэсний цахим сүлжээ алга. Гэхдээ Үндэсний хэвлэл мэдээллийн хэрэгслүүд байна. Үндэсний хэвлэл мэдээллийн хэрэгсэл нь тухайн улс орныхоо оршин тогтнох үндэс болж, улмаар зар сурталчилгааны дархлаатай, өөрийн имижээ хадгалсан байдаг юм.
Бусад улс оронд Үндэсний хэвлэл мэдээллийн хэрэгсэл нь ямар байдаг вэ. Хариулт нь бас л тодорхой. Үндэсний эрх ашгаа хамгаалсан, дуу хоолой нь хүчтэй, эх орных нь тусгаар тогтнолтой ижил түвшинд эрэмбэлэгдсэн байдаг юм аа. Тусгаар тогтносон бүрэн эрхт улс бид мөн л юм бол үндэсний хэвлэл мэдээллийн хэрэгслүүдээ хамгаалж, хадгалан явах ёстой.
Гэвч өнөө үед Монгол Улс үндэсний хэвлэл мэдээлэлтэй байхад үнэхээр хэцүү боллоо. Тэдэнд санхүүгийн дэмжлэг ус агаар шиг хэрэгтэй байна. Улс орон тэгтлээ дор орчихоогүй байна. Монголын аж ахуйн нэгжүүдэд нөөц байна. Дээр нь дараад хэвтчихсэн их хөрөнгө өнөөдрийн дарга цэргүүд, УИХ-ын гишүүдэд байна. Тэд энэ эх орны төлөө л ажиллах ёстой юм бол улс үндэстний дархлаа, ардчилал хүний эрхийн баталгаа болсон үндэсний цөөн хэдэн хэвлэл мэдээлэлд зориулж төсөв гарга. Ингэж чадахгүй бол Монгол Улс даяараа нүдгүй, чихгүй, хяналтгүй нийгэмтэй учрах гунигт хэрэг явдал болно. Тийм аюул тун ойрхон байна.
Монголын үндэсний том компаниуд болон манайд үйл ажиллагаа явуулдаг гадаадын хөрөнгө оруулалттай компаниуд реклам сурталчилгаагаа Google, Yahoo, facebook, Telegram, Twitter, Tiktok, Viber, Instagram… зэрэг цахим орчинд хийхэд олон арван сая долларыг төлжээ. Энэ нь эх орноос нь гадагшилж буй их мөнгө, хоёрдугаарт эх орноосоо гадны компаниудад санхүүгийн дэмжлэг үзүүлж байгаа хэрэг. Ийм байж яаж болох вэ дээ, ганц “Говь” реклам сурталчилгааны гадаадад төлж буй дүнг харахад гайхаж үхмээр юм билээ…
Өнгөрсөн УИХ-ын сонгуулийн үеэр манай нэр дэвшигчид facebook,Twitterт 14 сая ам.доллар зарж Америкийн компанийн ашиг орлогыг нэмсэн байх юм. Энэ мөнгөн дүн бол албан ёсны ауидитаар баталгаажсан, СЕХ-ноос танилцуулагдсан албан ёсны баримт. Энэ эх оронч үйлдэл мөн үү. Сүүлчийн Ерөнхийлөгчийн сонгуулиар цахим орчинд хэдэн сая доллар зарцуулсан дүн хараахан гараагүй байна.
Тэгэхээр үндэсний хэвлэл мэдээллийн байгууллагуудаа аврах цаг болж. Үүнд МҮОНР телевиз, радио, сонинууд орно. Эдгээрийг дагасан Үндэсний өөрийн гэх цахим платформтой болох хэрэгтэй байна. Эдгээр үндэсний мэдээллийн сүлжээндээ зар сурталчилгааны орлогын 30 хувиас доошгүй мөнгийг төрөөс өгөх ёстой. Мөн төр засгийн байгууллагуудын зүгээс тендер, зарын орлогын 50 хувиас доошгүй дүнг үндэсний хэвлэл мэдээлэлдээ өгч байх шийдвэрийг албан ёсны батлан гаргаж хэрэгжүүлэх цаг болжээ. Ер нь бол хууль ч гэх зүйлгүй Засгийн газрын тогтоолоор шийдчихэж болох ажил юм шүү.
Ийм л шийдвэрийг гаргаж дэмжихгүй бол гадаадын цахим платформуудад хэдэн төгрөгөө өгөөд дуусах нь. Эцсийн дүндээ энэ хэдэн Үндэсний хэвлэл мэдээллийн байгууллагууд дампуураад дуусна. Ингэсэн цагт монголчуудад үндэсний үзэл санаа, үнэт зүйл, хэл соёл… бүгд дампууран алга болно. Үүний эхлэл нь хөгшин залуугүй бүгдээрээ гэрт ч, ажил дээрээ ч гар утсан доторх гадаадын хэдэн сошиал сүлжээнд тархи оюунаа захируулж, сүүлдээ бүр захирагдаж, өөрийн гэсэн өгөгдөлгүй, гар утасныхаа боол нь болж амьдрах дээрээ туллаа. Бид ертөнцийн хөгжил цэцэглэлт, ажил амьдралын шинэ хэв маяг, технологийн гайхамшгаас хоцрогдох ёсгүйг маш сайн ойлгож байна. Гэвч тусгаар улсын иргэд бидэнд үнэнийг хэлж өгч, үндэсний дархлаа болж байдаг өөрийн гэсэн Үндэсний хэвлэл мэдээллийн байгууллагууд, үндэсний цахим цоо шинэ платформ байх ёстой, түүнийгээ төрийн дэмжлэг, хууль дүрмийн зохицуулалтаар бүтээж авъя. Эцэст нь нэг л үнэн бий, тэр нь эдийн засгийн маш сайн дэмжлэггүй идей санаа ажил болдоггүй. Шинэ бүхнийг хийхийн тулд нэгдүгээрт төрийн дэмжлэг, хоёрдугаарт манай үндэсний компаниудын дэмжлэг байх нь чухал цаг болжээ. Энэ хоёрын дэмжлэг гэдэг өөрөө мөнгө, санхүүгийн чадавх, дэмжлэг шүү дээ.
Монголд үйл ажиллагаа явуулж байгаа том компани бүр зар сурталчилгааны бүх мөнгөө гадаадын компаниудад тушаан сурталчлуулдаг гаж тогтолцоог таслах хэрэгтэй. Google, Yahoo, facebook, Telegram, Twitter, Tiktok, Viber, Instagram…эдгээр чинь бүгд гадаадын компаниуд шүү дээ, монголчууд аа.
Монгол Улсын Их Хурлын байнгын болон түр хороодын өнөөдрийн /2021.11.10/ хуралдааны тов, хэлэлцэх асуудлын дэгийг хүргэж байна.
|
БАЙНГЫН, ТҮР ХОРООНЫ ХУРАЛДААН /2021.11.10/ |
|||
|
10.00 |
Байгаль орчин, хүнс, хөдөө аж ахуйн байнгын хорооны хуралдаан: Хэлэлцэх асуудал: · Байнгын хорооны тогтоолын төсөл /11 дүгээр сарын хэлэлцэх асуудлын цаглавар батлах тухай/ |
“Их Эзэн Чингис хаан” танхимд |
|
|
11.00 |
Төсвийн байнгын хорооны хуралдаан: Хэлэлцэх асуудал: · Монгол Улсын нэгдсэн төсвийн 2022 оны төсвийн хүрээний мэдэгдэл, 2023-2024 оны төсвийн төсөөллийн тухай хуульд өөрчлөлт оруулах тухай хуулийн төсөл болон хамт өргөн мэдүүлсэн Төсвийн тухай хуульд нэмэлт, өөрчлөлт оруулах тухай хуулийн төсөл /Засгийн газар 2021.09.30-ны өдөр өргөн мэдүүлсэн, эцсийн хэлэлцүүлэг/ · Монгол Улсын 2022 оны төсвийн тухай хууль, Ирээдүйн өв сангийн 2022 оны төсвийн тухай хуулийн төслүүдийн хамт өргөн мэдүүлсэн хууль, Монгол Улсын Их Хурлын тогтоолын төсөл /Засгийн газар 2021.09.30-ны өдөр өргөн мэдүүлсэн, эцсийн хэлэлцүүлэг/ · Монгол Улсын 2022 оны төсвийн тухай, Нийгмийн даатгалын сангийн 2022 оны төсвийн тухай, Эрүүл мэндийн даатгалын сангийн 2022 оны төсвийн тухай, Ирээдүйн өв сангийн 2022 оны төсвийн тухай хуулийн төслүүд /Засгийн газар 2021.09.30-ны өдөр өргөн мэдүүлсэн, гурав дахь хэлэлцүүлэг/ · Байнгын хорооны тогтоолын төсөл /11 дүгээр сарын хэлэлцэх асуудлын цаглавар батлах тухай/ · Бусад |
“Жанжин Д.Сүхбаатар” танхимд |
|
|
14.00 |
Ёс зүй, сахилга хариуцлагын байнгын хорооны хуралдаан: Хэлэлцэх асуудал: · “Улсын Их Хурлын гишүүний ёс зүйн дүрмийг шинэчлэн батлах тухай” Улсын Их Хурлын тогтоолын төсөл /Улсын Их Хурлын гишүүн Б.Бат-Эрдэнэ нарын 4 гишүүн 2021.03.24-ний өдөр өргөн мэдүүлсэн, хэлэлцэх эсэх/ · Байнгын хорооны тогтоолын төсөл /11 дүгээр сарын хэлэлцэх асуудлын цаглавар батлах тухай/ |
“Их Эзэн Чингис хаан” танхимд |
|
|
16.00 |
Түр хорооны хуралдаан: /Оюу толгой ордын ашиглалтад Монгол Улсын эрх ашгийг хангуулах тухай Улсын Их Хурлын 2019 оны 92 дугаар тогтоолын хэрэгжилтэд хяналт тавих, шаардлагатай бол санал боловсруулж, дүнг нэгдсэн хуралдаанд танилцуулах үүрэг бүхий/ Хэлэлцэх асуудал: · Оюу толгой төслийн гадны хөрөнгө оруулагч талтай хэлэлцээ хийх, төслийг тохирох, эцэслэсэн хувилбарыг Засгийн газрын хуралдаанд танилцуулах үүрэг бүхий ажлын хэсгээс ажлын явц байдлын талаар мэдээлэл сонсох |
“Их засаг” танхимд |
|
Өнөөдөр /2021.11.10/ Улаанбаатар хотод явуулын 45, суурин 42 цэгт 96 багийн 373 эмч, ажилтан ажиллаж, 5928 иргэнийг дархлаажуулахаар төлөвлөлөө.
Та өөрт ойр вакцины аль ч цэгт очиж дархлаажуулалтад хамрагдах боломжтой. Дархлаажуулалтын цэгүүд 09:00-17:00 цаг хүртэл ажиллана. Дархлаажуулалтын цэгийг дүүрэг тус бүрээр танилцуулж байна.
АН-ын Ерөнхий нарийн бичгийн дарга Лу.Гантөмөртэй ярилцлаа.
-Арчилсан намыг эвлэрсэн гэж ойлгож болох уу. УБЕГ-т бүртгэлтэй гэрчилгээ, тамга тэмдэг нь бидэнд бий гээд байдаг М.Тулгат, С.Эрдэнэ дарга нар хуралд оролцсонгүй шүү дээ?
-Хамгийн эхний зарчим нь АН-ын удирдлагууд хамтарч ажиллах хэрэгтэй. Ямар ч үед хамтарч ажиллаж байж л Монголын төлөө байна шүү дээ. Салж сарних тухай ойлголт байхгүй, үүнийг хатуу ойлгох хэрэгтэй. Хоёрдугаарт, АН-ын аливаа маргааныг гишүүд нь хагалах хэрэгтэй. Манай нам 200 мянган гишүүнтэй. Эдгээр гишүүдийг төлөөлж байгаа хүмүүсээс маргаж байгаа нь гарын арван хуруунд багтах цөөн хүн бий. Дээд тал нь 20 гэж бодъё. 200 мянган хүний өмнөөс 20 хүн зодолдоод байж болохгүй. Тиймээс 200 мянган гишүүнээрээ асуудлаа шийдүүлдэг нь учиртай. Асуудал шийдэгдсэн гэж би хувьдаа дүгнэж байгаа. 330 сум, 200 гаруй үүр, есөн дүүргийн төлөөлөл бүрэн сууж байгаад 95 хувийн ирцтэйгээр намын их хурлаа хийлээ. Таван хувь нь ирээгүй. Мэдээж тэд өөр бодолтой байж болно. Төлөөлөл нь ирээд яриад шийдсэн. Улс төрийн нам гэдэг бол дэмжигч гишүүдийн байгууллага. Тиймээс гишүүд нь асуудлаа шийднэ. Бид хоёр зарчим барьж байгаа. Нэгдүгээрт, нийлж нэгд. Хоёрдугаарт, гишүүдээрээ шийдүүл. Энэ хоёр зарчмыг тунхаглах хэрэгтэй. Гуравдугаарт, залуу үе болон гишүүдээ хохироож болохгүй. Эдгээр хүмүүсийн санал, хүч, буянаар олон жил УИХ-ын гишүүн, сайд, дарга хийсэн хүмүүс тэднээсээ асуухгүй маргалдаад суугаад байж болохгүй. Таны асуултдаа дурдсан хүмүүс болон бусад бүх оролцогч нарт хувийн асуудал, байр суурь байхгүй болов уу гэж би харж байгаа. Бидний байр суурь бол ерөөсөө л гишүүдийнхээ төлөө, тэдний санал, шийдлээр явна. Өөр арга байхгүй.
-Их хуралд оролцоогүй хүмүүс тамга тэмдгийн хэрүүл гаргахыг үгүйсгэхгүй. Хэрвээ маргаан гарвал яах вэ?
-Эцсийн шийдвэр гарчихлаа. АН-ын гишүүдийн саналаар Их хурал бүрэлддэг. Намын их хурлын гишүүдийн саналаар асуудал шийдэгддэг. Саяны хурлын процессыг дэлгэрэнгүй хэлэхэд хоёр жилийн хугацаанд явсан маргаантай шийдвэрүүдийг эцэслэсэн.
Жишээлж хэлбэл, УИХ дээр хуулийн зөрчлийг арилгаж, хуулийн уялдааг гаргах хууль баталдаг. Тэглээ гээд зөрчилтэй байсан хуулиуд тухайн цаг үедээ үйлчилсэн тухай маргаан байдаггүй. Тэр бол үйлчилдэг. Тэгэхээр урьд нь гарсан намын маргаантай асуудал хүчин төгөлдөр байжээ гэж харж байгаа юм. Энэ Их хурлаар тодорхой хэсгийг хүчингүй болгож, тодорхой хэсэг дээр нь Их хурал өөрөө дэмжиж шийдвэр гаргалаа.
Тухайлбал, цахим сонгууль хүчингүй гэсэн шийдвэрийг намын Их хурал гаргачихлаа. Үүнийг би юмуу, эсвэл намын хэн нэг хүн гаргасангүй. Намын Их хурлын гишүүд ийм саналтай байна. Санал хураалтын байранд очиж цаасаар өгсөн саналаа өөрсдөө хамгааллаа. Цаасаар санал хурааж ялсан О.Цогтгэрэл дарга саналаа баталгаажууллаа. Тэгэхээр миний санал бол О.Цогтгэрэл намын дарга нь юм бол М.Тулгатыг дэд даргаар уриад ажиллуулаач ээ гэж байгаа. Процессын засвар хийх гэж байгаа бол ингэж засах хэрэгтэй. Тэрний тал, энэний тал гэдэг талцалд нэг мөр цэг тавьсан хурал болсон гэдэгт би итгэлтэй байгаа.
-Та их эмзэг цаг үед намын генсекээр томилогдож байна. Ажлаа юунаас эхэлнэ гэж төлөвлөж байна?
-Хоёр зарчим байна. Нэгдүгээрт, ажил хэрэгч улс төрийн хүчин байхыг зорьж байна. Хоёрдугаарт, боловсрол төвтэй улс төр хийнэ. Ажил хэрэгч улс төрийн хүчин байна гэдэг нь юу гэсэн үг вэ гэхээр өнөөдрийн нийгэм, цаг үеийн байдалд байнга судалгаа хийж, үнэлэлт дүгнэлт өгөх ёстой. Судалгаагаар гарсан датаг ашиглаж тодорхой бодлогуудыг боловсруулах ёстой. Тиймээс судалгааны төвүүдтэй хамтарч ажиллана. Хамтарч ажиллах судалгааны төвүүдээ удахгүй зарлана. Төр засаг ямар шийдвэр гаргаасай гэж хүсч байгааг иргэдийн амьдрал, сэтгэл санаа, санаа бодолд тулгуурласан судалгааг сар бүр хийнэ. Хоёрдугаарт, АН-ын дэргэд Стратеги судалгааны хүрээлэн байгуулагдана. Энэ хүрээлэн нь судалгаа хийдэг, бодлого боловсруулдаг бүх эрдэм шинжилгээний байгууллагуудтай хамтарч ажиллаж тодорхой бодлого боловсруулна. Бидний хүч хүрэхгүй бол гадаадын судалгааны байгууллагуудыг ч дайчилна. Нэг үгээр хэлбэл, бодитой судалгаанд үндэслэж бодитой бодлогын хариуг гаргана. Гарсан хариугаа УИХ-ын бүлгээрээ дамжуулж хууль, тогтоомж, Засгийн газрын шийдвэр болгож батлуулна. Ингэж бид ажил хэрэгч, улс төрийн хүчин байна. Бидэнд УИХ-ын 13 суудал байна. Чамлахаар чанга атга гэж үг бий. Байгаа нөөцөө бүрэн дайчлах хэрэгтэй. Агаарт бодол санаагаа цацаад байдаг хүмүүс бид биш. Бодитойгоор, цаасан дээр төсөл төлөвлөгөөгөө гаргаж, хуулийн төслөө хийж, УИХ-д өргөн барьдаг, Засгийн газарт шахалт үзүүлдэг, санал санаачилга гаргадаг, нээлттэй сонсгол явуулдаг, санал хураалтад өөрсдийнхөө бодлогын баримт бичгийг оруулдаг болъё. Гуравдугаарт, улс төрийн бусад намуудтай хамтарч ажиллана. Өөрсдийнхөө бодол санаа, дуу хоолойг нийгэмд хүргэж байгаа тэр улс төрийн хүчнүүдтэй хамтарч 2024 оны сонгуульд амжилт гаргах ёстой. МАН-ын Засгийг өөрчлөх хэрэгтэй. Одоо л салхи оруулахгүй бол монголчуудын ирээдүй сайн сайхан харагдахгүй байна. Дабль стандартыг алга болгоё гэж байгаа Э.Одбаяр, Д.Монголхүү болон асуудалд ямар нэгэн байдлаар шийдэл гаргаж, нийгмийн дуу хоолойг хүргэхийг зорьж байгаа иргэний нийгмийн байгууллагуудтай байнга хамтарч ажиллаж, 2024 оны сонгуульд хамтарч оролцоно.
-Боловсрол төвтэй улс төр хийнэ гэлээ. Үүнийг тодруулахгүй юу?
-Бид хүний нөөцийн бодлогоо боловсролын суурин дээр хийнэ. Нэг үгээр хэлбэл, бид өөрсдөө хүмүүсээ сургаж, хөгжүүлж, зорилготой болгож амжилтад хүргэе гэж байгаа. Залуучуудаа бид амжилтад хүргэх хэрэгтэй. Ардчилсан намын нэг үүрэг бол Монголын төрд очих залуу үеийн лидерүүдийг бэлдэж өгөх ёстой. Залуучууд үзэл бодолдоо үнэнч, түүнийгээ хамгаалж чаддаг байх хэрэгтэй. Тэднийг өөрсдийнх нь тойрогт таниулж, өөрсдийнх нь иргэний нийгэм рүү оруулж өгөх хэрэгтэй. Бид тэр хүмүүсийн хийж байгаа ажилд бүх талын туслалцаа, дэмжлэг үзүүлэх ёстой. Баг дээр хэн яаж амьдрах юм бэ, хороо дээр ямар амьдрал өрнөх юм бэ, юугаараа онцлог байх юм бэ. Жишээлбэл, Баянзүрх дүүргийн 26 дугаар хорооны Засаг дарга Г.Отгонбаатар шиг Засаг дарга, удирдлагууд Монголын төрд байх ёстой. Монголын төрд ар өврийн хаалгаа эсвэл мөнгө санхүүтэй, удам угсаагаараа очдог энэ байдлыг халах хэрэгтэй. Боловсрол төвтэй улс төрийн бодлогыг хийж, хүний нөөцийн зөв шийдлүүдийг гаргаж, үүнийхээ үр дүнд бид Монгол Улсын төр, засгийн хүний нөөц шударга, ил тод зарчимтай байх улс төр рүү бүрэн шилжилт хийнэ. Дүгнэж хэлэхэд, бид хурдтай явахгүй бол асар их хоцорчихсон байгаа. Нөгөө айл бараг бариандаа орж байна. Бид дөнгөж хөдөлж байна.
-АН сөрөг хүчний үүргийг гүйцэтгэж чадахгүй байна гэж олон нийт шүүмжилж байна. Хүчтэй сөрөг хүчин болохын тулд бүлэгтэйгээ хэрхэн хамтарч ажиллах вэ?
-МАН-ын бүлэг 63 гишүүнтэй. Энэ бүлгийн гишүүдэд үйлчилж байгаа нь Монголын Засгийн газар. Засгийн газар. Үүний цаана хэдэн зуун мянган хүн энэ хүмүүст үйлчилж байгаа. АН-ын бүлэг яагаад сул харагдаж байна гэхээр ард нь үйлчилдэг хүмүүс, иргэний нийгэм, аппарат, үйл ажиллагаа алга. Тиймээс л ажил хэрэгч улс төрийн хүчинг АН-ын бүлгээр бий болгоно. Тэр бүлгийг бид бодлого болон бусад дэмжлэгээр хангах ёстой. Бүлэг дээр бид Монголын иргэний нийгмийн оролцогчдыг хөтөлж аваачиж өгөх ёстой. Тэдний дуу хоолойг сонсож мэдээллээр хангах хэрэгтэй. Жишээлбэл, бүлгийн гишүүдийг боловсрол, эрүүл мэндийн салбар, хүний эрхийн зэрэг байгууллагуудтай уулзуулах ёстой. Өөрөөр хэлбэл, бид бүлэгтээ үйлчлэхгүй бол бүлэг бидэнд үйлчлэхгүй. Мэдээллээр дутагдана, үзэл санаа, үйл хэргээр дутагдана. МАН-ын 63 гишүүнд хэн үйлчилж байгааг бид тодорхой харах хэрэгтэй. Наанадаж л 14 сайд, дэд сайд, төрийн нарийн бичгийн дарга, агентлагийн дарга нар байна. Бодлого боловсруулж байгаа энэ хүмүүс бүгдээрээ тэдэнд үйлчилгээ үзүүлж байгаа. Бодлогын бичиг баримтыг боловсруулж өгч байна. Хууль бичиж өгч байна. Хэлэх үгийг нь бэлдэж өгч байна. Хэвлэл мэдээллээр гарах яриаг нь хүртэл бэлдэж өгч байна. Энэ бол тэнцвэргүй тулаан. Тэнцвэргүй тулаан удаан үргэлжлэхээр парламентын ардчилал харагдахаа больчихдог. Учир нэг тал нь мэдээллийн хомсдолтой, дэмжлэггүй. АН сөрөг хүчний дуу хоолойг парламентад хүргэхийн тулд бид сүүдрийн Засгийн газрын түвшинд бодлогын баримт бичиг боловсруулах, чадвар, чансааг өөр дээрээ авах ёстой. Тэр ажлыг их богино хугацаанд хийнэ.
-Ерөнхийлөгч асан Х.Баттулга шинэ нам байгуулах асуудал нийгэм, улс төрийн орчинд ил болох шиг боллоо. Хэрвээ нам байгуулбал өөрийг нь дэмждэг, дагадаг АН-ын дэмжигч, гишүүдээсээ намдаа элсүүлэхийг үгүйсгэхгүй. Үүний эсрэг юу хийх юм бэ. Ер нь яаж намын гишүүд дэмжигчдийн итгэлийг сэргээх юм бэ. АН-ын нэр хүнд унасантай холбоотойгоор олон нийтийн АН-д итгэх итгэл алдарч байна шүү дээ?
-Гишүүдтэйгээ бид ажиллана. Намын их хурал хуралдлаа. Хурлын мэдээллийг их хурлын төлөөлөгчид очиж мэдээлж, өөрийн намын гишүүдэд тайлагнана. Тайлагнасны дараа намын гишүүдийнхээ саналыг авна. Саналыг авч ирэхийг АН-ын ХЭГ-ийн бүрэлдэхүүнд өгсөн. Нөгөө талд бид судалгааны байгууллагуудтай ажиллана. Манай намын гишүүд юу хүсч, сонирхож байгааг намын шугамаар бус хөндлөнгийн судалгаагаар татаж авна. АН-ыг эв нэгдэлтэй байлгахын төлөө бүх хүчээ дайчилна. Х.Баттулга нам байгуулах гэж байгаа юм байна гэсэн хов живд итгээд явахыг би хүсэхгүй байна. Тэр хүн тэр байр сууриа илэрхийлсэн үед л итгэнэ үү гэхээс биш наана нь таамаг дэвшүүлж, түүнд тааруулж хийнэ гэж байхгүй. АН бол улс төрийн хүчний хувьд 30 жил бойжчихсон. Ийм хэмжээний намыг бойжуулж гаргах 30 жил гэдэг бол хэцүү. Учир нь эрх барьж байгаа намын өөрийнх нь хүч ямар байгааг бүгд харж байгаа. Энэ хүчний өөдөөс ямар ч хүчтэй нэг хоёр хүн хөдлөөд нэмэргүй. Үүнийг ч бүгдээрээ ойлгож байгаа. Үүний өөдөөс улс төрийн том нэгдэл хөдөлнө. Тиймээс бүх улс төрийн намуудтай нэгдье гээд байгаа юм. 2024 оны сонгуульд МАН-ын эсрэг ганц улс төрийн нам тэмцэнэ гэдэгт эргэлзэж байна. Бид хөдөлж чадаагүй байгаа учраас ийм эргэлзээ надад байна. Тиймээс таамаглал, хов жив, хүмүүсийн маргаан дээр суурилсан улс төрийн шийдвэрийг манай нам гаргахгүй байгаасай гэж би хүсч байна. Бид АН-ыг цул болгох шийдвэрүүд, уриалгыг гаргах хэрэгтэй. Үүний тулд АН-аас төрсөн улстөрчид хамтдаа байх орчныг бүрдүүлэх ёстой. Хэн нэгний талд ороод чавчаад байж болохгүй. Хэн нэгнийг дэмжээд суугаад байж болохгүй.
-Та бүтцээ ямар шалгуураар хэрхэн бүрдүүлэх гэж байна?
-Ажил хэрэгч улс төрийн хүчин байна гэхээр маш сайн туршлагатай, бодлогын бичиг баримт дээр суух чадвартай хүн хэрэгтэй. Тиймээс би З.Нарантуяа гишүүнийг урьсан. З.Нарантуяа насаараа банкинд ажиллачихсан. Санхүүгийн зохицуулах хороонд ажиллаж байсан. УИХ-ын гишүүнээр дөрвөн жил зүтгэсэн, АН-ын дэд даргын албыг хашиж байсан, судлаачдын дунд өөрийн гэсэн байр суурьтай. Би ийм л хүмүүсийг сонгож авч байгаа. Өөрөөр хэлбэл, миний бодлого боловсруулах түвшинд тулж түшиж ажиллах хүн З.Нарантуяаг гэж харж байгаа. Мөн Х.Тэмүүжинг урьсан. Ажиллуулна. Х.Тэмүүжин боловсрол төвтэй улс төр, хүний нөөцийн зөв схем, сургалтууд, хөгжлийн асуудал зэрэгт төвлөрч ажиллах болов уу гэж найдаж байгаа. МХАҮТ-ын дарга О.Амартүвшинтэй хамтарч ажиллана. Ямар ч хэлбэрээр байж болно. Бид Монголын эдийн засгийг авч явах, хувийн хэвшлийнхэнтэй нүүр тулах хэрэгтэй. Тэр хүмүүст ямар орчинг бид өгөх вэ, дундаж давхаргаа яаж баталгаажуулах вэ, яаж хүмүүсийнхээ орлогыг нэмэгдүүлэх вэ гэдэг асуудалд хувийн хэвшлийг зангидаж байгаа, тэдэнтэй хамтарч чаддаг улс төрийн зүтгэлтнүүдтэй хамтарч ажиллая гэж бодож О.Амартүвшинд санал тавьсан. Үүнээс гадна Ц.Элбэгдорж Ерөнхийлөгчийн хуулийн зөвлөх байсан Ч.Өнөрбаярт санал тавьсан. Ямар хариу ирэх нь тодорхойгүй байна. Гэхдээ Ч.Өнөрбаяр залуучуудын төлөөлөл болж хуулийн шинэчлэлд амжилттай сайн ажиллана гэдэгт итгэж байгаа. Х.Баттулга Ерөнхийлөгчийн Тамгын газрын дарга байсан Ө.Шижирт санал тавьсан. Залуу үеийнхэн дунд өөрийн гэсэн байр суурь, үнэлэмжтэй залуу. Олон нийтийн ажил хийгээд сурчихсан. Иргэний нийгмийн байгууллагуудтай өргөн хүрээнд ажиллаж чадна. Ажил хэрэгч улс төрийн хүчин байхын тулд иргэний нийгэмтэй бид хамтарч ажиллах ёстой гэж түрүүн хэлсэн шүү дээ. Энэ талд Ө.Шижир илүү туршлага хуримтлуулсан гэдэгт итгэж байгаа. Манай намын нарийн бичгийн дарга, Хөдөлмөрийн яамны төрийн нарийн бичгийн даргаар ажиллаж байсан П.Гантулгыг урьсан. Төрийн бүтцийн өөдөөс ямар бүтэц ажиллах вэ гэдгийг маш тодорхой бодлогыг хийж өгч чадна гэж бодож байгаа.
Монголчуудын ажил хөдөлмөр эрхлэх боломж, бололцоо давуу талыг бий болгоход ажиллана гэдэгт итгэж байгаа. Дахиад ч дөрөв, таван хүнд санал тавина. Ер нь бол бүгдээрээ хамтдаа байя гэдэг зарчим барьж байгаа. Хүмүүс намайг фракцуудын төлөөлөл татаж байна гэж байгаа. Бидэнд хамтдаа байх нь хамгийн чухал байна. Салаад сарниад явбал бүгдээрээ алдана. Хамтдаа нийлж, нягтарвал хүсч мөрөөдөж байгаа ажил хэрэг, хүслээ биелүүлж чадна. Юу мөрөөдөж байгаа юм бэ, ямар нийгэм хүсээд байгаа юм бэ, юуны төлөө гэж бодоод хувийн амьдралаа хойш тавиад улс төрд оролцоод байгаа юм бэ. Энэ итгэл үнэмшлээ ажил хэрэг болгоход нь АН тусалдаг байх хэрэгтэй. Бидэнд үнэт зүйл байгаа. Үнэт зүйлээ хамгаалах ёстой. Тэр бол хүний эрх, эрх чөлөө, эдийн засгийн эрх чөлөө, үг хэлэх эвлэлдэн нэгдэх эрх чөлөө. Энд бүх оролцогчид хатуу байр суурьтай байх ёстой. Дараагийн чухал асуудал бол хөгжил дэвшил. Дахиад гурван зарчим байна. Нэгдүгээрх нь, парламентын засаглалыг хайрлаж, хамгаалж явах ёстой. Хөгжил дэвшлийн төлөө байх хэрэгтэй. Ардчиллаа бид аврах ёстой. Ардчилал гэдэг бол бүх хүний тэгш оролцооны ойлголт шүү дээ. Тэгш оролцоо гэдэг зүйл алга болчихоор нийгэмд нэг хэсэг хүмүүс гарч ирдэг. Энэ бол бусад улс оронд жишээ нь, Энэтхэгт кастын систем гараад ирсэн байх жишээний. Ардчилал алга болохоор анги давхарга үүсч эхэлдэг. Ямар ч давхаргын хүн эрх чөлөөтэйгөөр улс төр, эдийн засгийн үйл хэрэгт оролцдог ийм тогтолцоо цаашаа явах ёстой.
-Таван нам нэгдэж АН үүссэн. АН-ын лидерүүд муудалцахад гишүүд ч тэднийг дагаж байна. Тэдгээр лидерүүдийг үзэл санаан дээрээ нэг цул болгохын тулд юу хийх вэ?
-Би олон жил энэ хүмүүсийн дунд явсан. Тэд бол үзэл санаан дээрээ нэг цул байгаа. Монголчуудын эрх чөлөөний төлөө тэд бүгд зогсоно. Харин үйл хэрэг, арга барил дээрээ зөрөөд байгаа юм. Тэгэхээр арга барилын зөрүүг хэрүүл маргаан болгомооргүй байна. Бид боловсрол төвтэй улс төр хүний нөөцөөрөө намынхаа янз бүрийн арга барилын зөрүүг багасгана. Шийдвэр, шийдлийн зөрүү байгаа. Нийгмийн салбар бол бодлого бодоход олон хариу гардаг салбар шүү дээ. Шинжлэх ухааны салбар бол нэг л хариу гардаг. Олон хариутай ажил учраас олон хариу гаргачихаад байгаа хүмүүсийн хариу бүрт ач холбогдол өгч болохгүй. Сайн хариултыг цаг үе өөрөө авч ирдэг. Нийгэм өөрөө авч ирдэг. Тиймээс бид олон хүний оролцоотой хэлэлцүүлэг хийж, олон хүний гол үзэл санаагаа алдахгүй, үнэт зүйлээ гээхгүй шийдлээ гаргаад явна. Энэ бол маш прагматик ойлголт.
-Өмнө танаас ярилцлага авч байхад хамтын удирдлагатай болох хэрэгтэй гэж хэлж байсан. Үүнийгээ ажил хэрэг болгох уу?
-Дүрмэндээ өөрчлөлт оруулаад, нам нь шийдвэрээ гаргадаг байх шийдэл рүү орно. Бодлого боловсруулахдаа намын удирдах зөвлөлөөр дамждаг байх зарчим руу орохоос өөр аргагүй. Гэхдээ бид АН-ын чөлөөт сэтгэлгээг үлдээх тал дээр анхаарах хэрэгтэй. Хамтын удирдлага руу орно гэхээр хуйвалдаан хийх нь гэж ойлгодог. Хуйвалдаан руу оруулахгүйн тулд чөлөөт сэтгэлгээтэй хүмүүсээ яаж хайрлаж, хамгаалахаа тодорхой болгох ёстой. Чөлөөтэй сэтгэж дуугарч байгаагаа хэрхэн хамгаалах юм гэдэг нь чухал.
Аргын тооллын арваннэгдүгээр сарын 10, Буд гариг. Билгийн тооллын 6, Элдэв тэнгэртэн одтой, хар нохой өдөр. Өдрийн наран 7:51 цагт мандан, 17:21 цагт жаргана. Тухайн өдөр бар жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр эе эвээ ололцох, хамтын хөдөлмөр эхлэх, гэрээ хэлцэл байгуулах, найр хурим хийх, бэр гуйх, инж өгөх, авах, үнэт эрдэнийн зүйл авах, хишиг даллага дуудуулах, насан бүтээл хийлгэх, хүүхэд үрчлэн авах, андгай тангараг, гэрээ хэлцлээ буцаахад сайн. Нүүдэл суудал хийх, хэрүүл тэмцэл хийх, эрдэнийг гадагш өгөх, хүүхэд хөлд оруулахад муу.