“Nо naadam” хөдөлгөөнийхөн Чингисийн талбай дээр эсэргүүцлийн жагсаал хийв. Энэ талаар “Nо naadam” хөдөлгөөний зохион байгуулагч Д.Монголхүүгээс тодрууллаа.
-Ямар учраас энэхүү эсэргүүцлийг зарлав?
-Манай эсэргүүцлийн жагсаал 13 дахь өдрөө үргэлжилж байна. Талбай дээр өдөр бүр гарч эсэргүүцлээ илэрхийлж байгаа. Урьд нь ковидын улмаас нас барсан хүмүүсийн тоогоор зул өргөж, өдөр бүр эсэргүүцлээ илэрхийлдэг байсан. Өнөөдөр хэлбэрээ өөрчлөн Засгийн газарт өгсөн шаардлагын хариуг өгөхгүй байгаа тул бид нар хар уутаар Ковидын улмаас нас барсан хүмүүсийн тоогоор макет хийж тавьсан. Бид “Өвчнөө дараач, анхаарлаа хандуулаач, хяналтдаа аваач” гэж аль зургадугаар сарын 5-наас хойш шаардлага тавиад яваад байгаа.
-Танайхтай өөр ямар байгууллагууд хамтран жагсаж байгаа вэ?
-Эмч, эмнэлгийн ажилчид нэгдсэн. “Yes, No” төрийн бус байгууллага болон жирийн иргэд хувь хүмүүс ихээр дэмжин хамтран оролцож байгаа.
-Зургадугаар сарын 5-наас хойш Засгийн газраас ямар нэгэн хариу ирүүлээгүй юү?
-Ямар ч хариу үйлдэл реакци байхгүй. Гялайх ч үгүй байна. Тиймээс л аргаа өөрчлөн эсэргүүцлээ илэрхийлж байгаа нь энэ.
-Шаардлагыг хүлээж авахгүй бол цаашид яах вэ?
-Одоо иргэдийнхээ дэмжлэгийг л хүлээнэ дээ. Иргэд хэзээ талбай дээр гарч ирэх нь үү, хэзээ бид олуулаа болох нь уу, тэгж байж Засгийн газарт шахалт үзүүлж оруулна. Энэ Засгийн газраас арай чадамжтай кабинет бүрдүүлээд өвчнөө хяналтдаа авч, үр хүүхдүүд минь хэвийн хичээлдээ явдаг, нийгэмших хэрэгцээг нь хангуулмаар байна. Хүүхдүүд нийгэмших хэрэгцээгээ хоёр жил хасууллаа шүү дээ. Өдөр бүр ковидын улмаас 10-20 хүн нас барж байна. Энэ том давлагааг зогсоох зорилготой байгаа. Засгийн газар нь өөрөө иргэдийнхээ амь насыг аюулд оруулж, бөөн бөөнөөр нь цуглуулж зугаа цэнгэл хийдэг. Ийм байдлаа зогсоо. Ковидын үеийн хууль нь иргэдэд нэг өөр үйлчлээд, эрх мэдэлтнүүдэд өөр үйлчлээд байна. Тиймээс иргэдийнхээ амь насанд заналхийлсэн Засгийн газрыг огцруул гэсэн ийм л акц өрнөж байна.
-Засгийн газрын хуралдаанаар олон нийтийн арга хэмжээг дахин нэг сар хориглочихлоо. Энэ тал дээр ямар байр суурьтай байна вэ?
-Өөрсдөө бөөн бөөнөөр нь хүмүүс цуглуулж, салют буудуулж, баяр наадам болгон тэмдэглээд, өөрсдийнхөө хийх ёстой юмаа хийж дуусаад иргэдээ хорьчихож байна. Аж ахуйн нэгжүүд дахиад л хоолоо хориулаад, хүүхдүүд дахиад л онлайнаар хичээлээ хийгээд, эргээд л нөгөө байдал руугаа орчихож байна. Иргэдэд ямар шаардлага тавьж байгаа юм, өөрсдөдөө яг тэр шаардлагаа тавиад эрх тэгш байдлыг ханга гэсэн байр суурьтай л байгаа. Засгийн газар нь хэдэн зуугаар нь хүн цуглуулж байгаа юм бол аж ахуйн нэгжүүд нь 10-20 хүн суулгаад үйл ажиллагаагаа явуулж яагаад болохгүй байгаа юм бэ. Хэрвээ хорьж байгаа юм бол Засгийн газар нь ч гэсэн өөрсдийгөө хориоч. Яагаад иргэд нь хоригдоод, эрх мэдэлтнүүд нь хоригдохгүй байгаа юм бэ.
-Өнөөдрийн (өчигдөр) жагсаалд хэдэн хүн оролцсон бэ?
-Тоо баримт байхгүй. Бид нарт статистик гаргаад сууж байх боломж бололцоо байсангүй. Цагдаа нь пижигнэтэл бөөнөөрөө ирээд макет, материалуудыг булааж авч хураагаад, хүчирхийлээд эхэлж байгаа юм.
