Month: October 2021

Өнөөдөр буюу аравдугаар сарын 1-нд УИХ-ын намрын чуулган нээсэн. Чуулганы нээлтийн үеэр парламент дахь сөрөг хүчин болох Ардчилсан намын гишүүд коронавируст халдварын нөхцөл байдлын хүндрэлийг эрх баригчдад сануулсан зурагт хуудас барьсан байсан юм.

Нээлтийн дараа тус намынхан Сүхбаатарын талбай дээр “Одоо боллоо” жагсаалыг зохион байгуулж эхэллээ. Ийн О.Цогтгэрэл, М.Тулгат нар оройлж, Засгийн газрыг огцрохыг шаардаж байна. Уг жагсаалд иргэд нэмэгдэж ирсээр байна.

Энэ үеэр УИХ-ын гишүүн, УИХ дахь АН-ын бүлгийн дарга Д.Ганбат “30 жилийн өмнө бид үг хэлэх, үзэл бодлоо илэрхийлэх эрхээ тунхаглаж, Үндсэн хуулиа баталсан. Гэтэл өнөөдөр Үндсэн хууль хэрэгжиж байна уу. Найм дахь удаагийн энэ УИХ байгуулагдахдаа ард түмний 30-хан хувийн саналаар, авлигаар, мөнгө тараалтаар байгуулагдсан. Гэтэл нэг жил, зургаан сарын хугацаанд харанхуй засагтай, харанхуй төртэй болчихоод байна. Урсахгүй ус үмхийрдэг.

Засгийн газарт ямар их эрх мэдэл байна. Ийм эрх мэдэлтэй, ийм Засгийн газар Монголын түүхэнд байгаагүй. Ард түмний жагсаал ингэж эхэлдэг юм. Бид үгээ ордон дотор орж чадахаа байсан. Иймд бид индэр дээрээс үгээ хэлж байна. Төсвийн мөнгөөр байгуулсан энэ цагаан байшингаас бүгдийг хэдхэн хүн удирддаг боллоо. Огцрох ёстой” гэллээ.

Эрүүл мэндийн яамнаас битүү орчинд урлаг соёлын арга хэмжээг зохион байгуулахгүй байхыг уриалав.

Энэ тухай УОК-ын дэргэдэх Эрдэмтдийн зөвлөлийн Нарийн бичгийн дарга О.Батбаяр “Халдварлах чадвар маш өндөртэй коронавирусийн дельта хувилбарын дэгдэлтийн энэ үед битүү орчинд урлаг соёлын үйл ажиллагаа явуулах, олон хүн бөөгнөрүүлэх арга хэмжээ зохиох болон тийм үйл ажиллагаанд иргэд амны хаалтаа авч үйлчлүүлэх нь өөрөө маш их эрсдэл дагуулж байгаа.

Тиймээс бид ийм арга хэмжээ зохион байгуулахгүй байхыг уриалж байна. Мөн ийм үйл ажиллагаанд иргэд оролцохгүй байхыг хүсье. Учир нь дельта хувилбарын халдварлах чадвар маш өндөр тул зохион байгуулагчид, оролцогчид халдвар авах эрсдэл нь их.

Олон нийтийн үйл ажиллагаанд оролцсон иргэд гэртээ байгаа вакцинд хамрагдаагүй хүүхдүүд болон эрсдэлт бүлэг болох жирэмсэн эмэгтэй, өндөр настнуудад халдвар тараах аюултай.

Улмаар тухайн гэр бүлийн гишүүд хүндрэх, амь насаараа хохирох асар эрсдэл байгааг сануулж байна” гэв.

ЭМЯ-ны хэвлэлийн төлөөлөгч Б.Ууганбаяр “ЭМЯ болон ХӨСҮТ-өөс битүү орчинд урлаг соёлын арга хэмжээг зохион байгуулахгүй байх, амны хаалтаа авч үйлчлүүлдэг тодорхой үйлчилгээний газруудыг цагийн хязгаарт оруулах хүсэлтийг Улсын онцгой комисст удаа дараа хүргүүлсэн” гэдгийг хэллээ.

Түүнчлэн “Урлаг соёлын арга хэмжээнээс гадна томоохон сүлжээ дэлгүүрүүд нэг дор үйлчлүүлж буй иргэдийн тоог хязгаартай байлгах нь зүйтэй. Мөн хувь хүний хариуцлага маш их чухал” гэдгийг НЭМГ-ын орлогч дарга Ж.Отгонболд сануулав.

Сүхбаатар дүүргийн Эрүүгийн хэргийн анхан шатны шүүхийн шүүгч З.Болдбаатар, Х.Идэр, Булган аймаг дахь сум дундын Эрүүгийн хэргийн анхан шатны шүүхийн шүүгч Д.Отгонбаатар нарт энэ оны тавдугаар сарын 25-ны шүүхийн магадлалаар сахилгын шийтгэл ногдуулахаар болсон.

Тэгвэл Захиргааны хэргийн давж заалдах шатны шүүх Монгол Улсын Шүүхийн Ёс зүйн хорооны уг магадлалыг хүчингүй болгож, хэргийг дахин хэлэлцүүлэхээр буцааж шийдвэрлэсэн байна.

Нийслэлийн Эрүүл мэндийн газрын орлогч дарга Ж.Отгонболд оюутнуудын халдвар авсан байдлын талаар мэдээлэл өглөө.

“Их, дээд сургуулиуд оюутнуудаа эрүүл мэндийн даатгалд хамруулахыг уриалж байна”

Тэрбээр “Хичээл сургууль эхэлсэнтэй холбоотойгоор оюутны дотуур байранд орон нутгаас 10,000 орчим оюутан ирсэн. БШУЯ, НОК-ын Шуурхай штаб хамтран есдүгээр сарын эхээр хичээлийн танхим, оюутны байруудад хяналт шалгалт хийж, удирдамж арга зүйгээр хангасан.

Гол нь төрийн их, дээд сургуулиуд оюутнуудаа эрүүл мэндийн даатгалд хамруулахыг уриалж байна.

Одоогийн байдлаар МУИС-ын оюутны дөрөвдүгээр байр, Оюутны өргөө-2 байрын хоёр давхрыг тусгаарлан эмчлэх байр болгон гаргаад байгаа.

Өнөөдөр СУИС дээр шинээ найман тохиолдол батлагдсан. Одоогоор нийт 750 оюутан коронавируст халдвараар өвчлөөд байгаагаас тав нь эмнэлэгт хэвтээд байна.

Халдвар авсан хойноо авах хариу арга хэмжээнд бус халдвар авахгүй байхад анхааран эрсдэлийг бодож, вакцины гурав дахь тунд хамрагдахыг иргэд, оюутан залууст уриалж байна. Учир нь залуучууд олон нийтийн газраар илүү их зорчиж байгаа нь эргээд эрсдэл үүсгэж байгаа юм.

Өнгөрсөн хугацааны турш эрүүл мэндийн байгууллага маш их ажиллаж байна.

Бид резидент эмч, төрийн болоод хувийн их, дээд сургуулийн төгсөх курсийн оюутнууд, Сувилахуйн сургуулийн 3, 4 дүгээр дамжааны оюутнуудыг цар тахлыг эсрэг авах арга хэмжээнд хийж чадах зүйлээрээ туслахыг уриалсан.

Өрхийн эрүүл мэндийн төвийн тандалтын багуудыг илүү чадавхжуулахаар 126 өрхийн эмнэлэг дээр 60 түр бүлгийг нээсэн. Өнөөдрийн байдлаар 22 бүлэг ажилдаа ороход бэлэн болсон” гэлээ.

Монгол, Хятадын “Хилийн боомт, тэдгээрийн дэглэмийн тухай” Монгол Улсын Засгийн газар, БНХАУ-ын Засгийн газар хоорондын хэлэлцээрийн дагуу БНХАУ-ын үндэсний баярын өдрийг тохиолдуулан 2021 оны 10 дугаар сарын 1-3-ны хооронд хоёр улсын хил амарна.

Өнөөдөр Олон улсын ахмадын өдөр өнөөдөр тохиож байна. Тухайлбал, НҮБ-ын Ерөнхий Ассамблей 1992 оноос жил бүрийн энэ өдрийг Олон улсын Ахмадын баяр болгон тэмдэглэхийг тунхаглаж байсан билээ. Энэ жилийн хувьд Монголын ахмадын байгууллагын түүхт 90 жилийн ой тохиож буй. Үндэсний статистикийн хорооноос гаргасан судалгаагаар манай улсын хүн амын долоон хувийг өндөр настнууд эзэлдэг. Ахмадуудын 69 хувь нь хот болон аймгийн төвд амьдран суудаг бол 31 хувь нь хөдөө орон нутагт аж төрж байна.

Түүнчлэн ахмадуудын 40 хувь нь тэтгэврийн зээлтэй бөгөөд эрчүүдийн 87 хувь нь цэргийн алба хааж байжээ. Монгол Улсад ахмад настнаа дэмжсэн нийгмийн даатгалын тэтгэвэр тэтгэмж, халамжийн тэтгэвэр, төрөлжсөн асрамжийн үйлчилгээ, хөдөлмөр эрхлэлтийг дэмжих үйлчилгээ, эрүүл мэндийн үйлчилгээ, нийгмийн хөгжлийн үйлчилгээ зэрэг нийт есөн төрлийн нийгмийн халамж, хөтөлбөрүүд хэрэгждэг ажээ.

Монгол Улсад музейн салбар үүсэн байгуулагдсаны 95 жилийн ой, Олон улсын ахмадын өдрийг угтан “Хаан ордны намар 2021” нээлттэй өдөрлөг өнөөдрөөс эхэлж байна.

Энэ үеэр үзэгч үйлчлүүлэгчиддээ зориулан музейн тасалбарын үнийг хоёр хүний дунд нэг буюу 50 хувь, өндөр настан, хөгжлийн бэрхшээлтэй иргэд, зургийн тасалбарын үнийг (үзмэр үзүүллэгийн зураг ороогүй болно) 100 хувь чөлөөлж буй юм.

Өдөрлөг аравдугаар сарын 1-7-ны өдрүүдэд үргэлжлэх бөгөөд музей 09:30-18:30 цагийн хооронд ажиллана.

Халдвар хамгааллын дэглэмээ сахин үйлчлүүлэхийг тус музейн хамт олон зөвлөлөө.

Уг үзэсгэлэнд “Богд хааны ордон музейн” үзмэрийн дээжисээс толилуулах бөгөөд үзэгч олны сонирхлыг ихээхэн татдаг “Бодлоор зангидсан илд” үзмэр үзүүллэгт гарах юм.

“Хаан ордны намар 2021” арга хэмжээний үеэр Манж цавын асарт амралтын өдрүүдээр “Бүжигчний нэгэн өдөр” залуучуудын бүжгийн тоглолтыг олон нийтэд толилуулан бие биелгээний сургалт зохион байгуулахаас гадна өөр сонирхолтой арга хэмжээнүүд зохион байгуулагдана.

Тухайлбал “Богд хааны ордон музейн” боловсролын ажил танилцуулга, үзэгчид хөрөг зургаа зуруулах, уран бичлэг зэрэг сонирхолтой хөтөлбөрүүд багтсан болно.

Аравдугаар сарын 3-ны өдөр “Богд хааны ордон музейн” дэргэдэх дурсгалын цэцэрлэгт хүрээлэнд “Jazz City Revival” жазз хөгжмийн наадмын тоглолтын хөтөлбөртэй байна.