Month: September 2021

Нийслэлийн Онцгой комиссоос нийслэл дэх коронавирусийн нөхцөл байдал, орны хүртээмж болон эрүүл мэндийн салбарын ачааллын талаар мэдээлэх үеэр хүний нөөцтэй холбоотой асуудлаар НЭМГ-ын дарга Б.Бямбадорж мэдээлэл өглөө.

Тэрбээр “Нийслэлээс хүний нөөцийг нэмэгдүүлэх талаар газруудтай хамтарч ажиллаж байна. Өнөөдрийн байдлаар 239 резидент эмч Эрүүл мэндийн сайдын тушаалаар хуваарилагдсан. Үүний 62.8 хувь буюу 150 хүн нь ажлын байран дээр гарсан.

Глобал сангийн санхүүжилтээр өдрийн 50 ам.долларын урамшуулалтай сайн дурынхныг ажиллуулж байгаа. 207 хүн ирэх ёстойгоос 111 хүн ажиллаж байна. Бид мэдээг өдөр өдөрт нь авч байгаа. Улаан загалмай нийгэмлэгийн хувьд сайн дурын 187 ажиллтан ажиллах ёстойгоос өнөөдөр 57.2% нь ажиллаж байна.

Манай эрүүл мэндийн салбарт ердийн үед ч стандарт хангасан хүний нөөцийн хомсдол байдаг. Эрүүл мэндийн чиглэлээр мэргэшсэн эмч, сувилагч, ажилтнууд та бүхнийг ковидын хариу арга хэмжээний үйл ажиллагаанд сайн дураараа идэвхтэй оролцохыг уриалж байна. Бас гуйж байна.

Мөн судалгаагаар нийслэлийн хэмжээнд эмнэлгийн бус мэргэжлийн хүн ажиллах боломжтой 910 ажлын байр бий. гэсэн. Ажиллуулахдаа богино хэмжээний сургалт явуулж, цар тахлын эсрэг арга хэмжээнд татан оролцуулах бололцоотой юм. Энэ хүрээнд Нийслэлийн ЗДТГ-аас 992 хүнийг эмнэлгийн бус мэргэжлийн хүн ажиллах боломжтой ажлын байранд ажиллуулах шийдвэр гарч байгаа нь бидний ажилд дэм болж байна” гэв.

УИХ-ын сонгуулийн 18, 28 дугаар тойргийн нөхөн сонгуулийн санал авах ажиллагаа аравдугаар сарын 10 буюу ирэх ням гаригт болно. Уг сонгуульд Хэнтий аймгийн 18 сум буюу тус аймгийн нийт сонгогчид оролцох юм. Харин УИХ-ын 2020 оны сонгуулийг зохион байгуулахдаа нийслэлийн Сонгинохайрхан дүүргийг гурван тойрог хуваасан учраас энэ удаагийн нөхөн сонгуульд зөвхөн долоо, найм, ес, 10, 11, 12, 13, 14, 15, 16, 17, 18, 19, 21, 23, 25, 27, 28, 29, 30, 31, 38, 39, 40, 42, 43 дугаар хорооны сонгогчид оролцож саналаа өгнө.

Нөхөн сонгуульд оролцох боломжгүй буюу дээрх хороодоос өөр хороонд амьдардаг иргэд саналаа өгч болно гэсэн ойлголтыг иргэдэд өгч төөрөгдүүлэх тохиолдол гарчээ. Үүнтэй холбогдуулан Сонгуулийн ерөнхий хорооноос “Сонгогчдыг төөрөгдүүлсэн ташаа мэдээллийг тарааж, иргэд сонгогчдын хуулиар хамгаалагдсан эрхэд хөндлөнгөөс нөлөөлөх гэсэн хууль бус үйлдэл гарч байгаа талаар Сонгуулийн ерөнхий хороонд хандан иргэдээс гомдол гаргасан. Олон нийтэд худал мэдээлэл тарааж, Монгол Улсын Үндсэн хууль болон бусад хуулиар хамгаалагдсан иргэдийн үндсэн эрхийг зөрчиж байгаа нь хууль бус үйлдэл тул энэ талаарх гомдол, мэдээллийг баримт нотолгооны хамт цагдаагийн байгууллагад гаргаж шийдвэрлүүлэх боломжтой” гэж мэдээллээ.

“Хаан” банк үүсгэн байгуулагдсаныхаа түүхт 30 жилийн ойг тохиолдуулан нийгмийн хариуцлагын хүрээнд 21 аймаг, нийслэлийн Багануур, Багахангай дүүрэгт 3х3 сагсан бөмбөгийн жишиг талбай байгуулж буй бөгөөд энэ сарын эхээр эхний талбайгаа Төв аймагт ашиглалтад оруулсан билээ.

Хүүхэд залуусын эрүүл мэнд, хүсэл мөрөөдлийг дэмжин, ирээдүйн сайн сайхны төлөө байгуулж буй эдгээр талбайн удаахыг Дархан-Уул аймгийн 10-р багт, “Оюуны ирээдүй” цогцолборын дэргэд нээн, аймгийн удирдлагад өчигдөр хүлээлгэн өглөө. Мөн Багахангай, Багануур дүүрэг, Орхон, Сэлэнгэ, Булган, Говьсүмбэр, Дорноговь зэрэг нийт 9 газарт бүтээн байгуулалтын ажил өндөрлөж, талбайг аймгуудын ЗДТГ-т хүлээлгэн өгөөд буй.

Энэхүү сагсан бөмбөгийн талбайнууд олон улсын стандартад нийцсэн резинэн зөөлөвчтэй шал, материал, тоноглолоор хийгдсэн бөгөөд тэнд тоглох хүүхэд, залуусын эрүүл мэнд, аюулгүй байдалд онцгой анхаарч, мэргэжлийн байгууллагуудтай энэ тал дээр хамтран ажилласан билээ. Мөн аймгуудын ЗДТГ, биеийн тамир спортын хороо, ерөнхий боловсролын сургуулиуд зэрэг талбайг хүлээн авсан холбогдох газрууд цаашдын ашиглалт, арчилгаанд хяналт тавин ажиллах аж.

“Хаан” банкнаас компанийн нийгмийн хариуцлагын хүрээнд хэрэгжүүлж буй энэхүү төсөл чөлөөт цагаа зөв боловсон өнгөрүүлэх боломжийг хүүхэд залууст олгон, их спортын ертөнцөд эх орноо төлөөлөх тамирчдын мөрөөдөл, тэмүүлэлд хүч нэмэх орон зай болно гэдэгт итгэж байна.

ОХУ-ын Ставрополийн хязгаараас Монгол Улсад анх удаа 21 толгой цэвэр үүлдрийн адуу экспортолжээ.

Цэвэр үүлдрийн адууг Минераловодск дүүргийн “Терский үүлдрийн адуу үржүүлгийн 169 дүгээр ферм” нийлүүллээ гэж Ставрополийн хязгаарын Хөдөө аж ахуйн яам мэдээлсэн байна.

Монгол Улсад нийлүүлснээс гадна, тус бүс нутгийн сайн үүлдрийн адуу үржүүлэгчид есөн сарын хугацаанд 150 элит адуу, түүний дотор Арабын шилмэл үүлдрийн 19 толгой адуу экспортод гаргаж борлуулсан бөгөөд Арабын шилмэл үүлдрийн адуу Австри, Бельги, Чех, Румын зэрэг улсуудад, Ахал-Теке үүлдрийн адуу Польшид эрэлттэй байжээ.

Одоогийн байдлаар Ставрополийн хязгаарт 1093 толгой сайн үүлдрийн адуу байгаа бөгөөд үржлийн гол нөөц нь Минераловодск, Александровский, Новоселицки, Шпаковский, Предгорный дүүргүүдэд төвлөрч байна.

Эдгээр дүүрэгт голдуу Араб, Ахал-Теке, Англи адуу, Карачай үүлдрийн адуу үржүүлдэг ажээ. “Хөдөө аж ахуйг хөгжүүлэх” бүс нутгийн хөтөлбөрөөс адуу өсгөх фермүүдийг дэмждэг байна.