Month: September 2021

Хичээлийн шинэ жил эхэлж байгаатай холбогдуулан нийслэл хотод 07:00 цагаас эхлэн замын хөдөлгөөний ачаалал нэмэгджээ. Тиймээс цагдаагийн байгууллагын алба хаагчид өглөөний 06:30 минутаас эхлэн бүрэн бүрэлдэхүүнээрээ замын хөдөлгөөнд зохицуулалт хийн ажиллаж байна.

Ингэхдээ Улаанбаатар хотын замын томоохон уулзварууд болон сургууль, цэцэрлэг орчмын бүсүүд, хөдөлгөөний ачаалал нэмэгдүүлдэг гарц, уулзваруудад хөдөлгөөний аюулгүй байдлыг хангах, жолооч нарыг хурдан шуурхай аюулгүй хөдөлгөөнд оролцуулахаар зохицуулалт хийж байгаа юм.

Энэ талаар ТЦА-ын Замын Цагдаагийн газрын Нийслэлийн замын хөдөлгөөн зохицуулах хэлтсийн ахлах, цагдаагийн ахмад Ч.Чимэдбат: “Цар тахлын улмаас өнгөрсөн хоёр жилийн хугацаанд хичээлийн шинэ жил хийгээгүй. Тиймээс иргэд, хүүхэд багачууд хичээлдээ идэвхтэй хамрагдаж, улмаар тээврийн хэрэгслийн болон явган зорчигчийн хөдөлгөөний ачаалал эрс нэмэгдээд байна. Тиймээс Цагдаагийн байгууллагын зүгээс явган хүний гарц, уулзварт зохицуулалт хийж, тээврийн хэрэгслийн гэрлийг асаах, хүүхэд тээвэрлэж байгаа тээврийн хэрэгсэлд хяналт тавих зэргээр ажиллаж байна.

Цаг агаарын нөхцөл байдал дулаахан байгаа учраас иргэд явганаар болон унадаг дугуйтай зорчих нь их байна. Тиймээс эцэг эхчүүд гудамж замд хөдөлгөөнд оролцохдоо бага насны хүүхдээ биеэсээ салгахгүй, хүүхдэд тавих хараа хяналтаа сайжруулах хэрэгтэй байна.

Харин унадаг дугуйтай зорчигчид явган хүний гарцаар гарахдаа дугуйгаа түрэх, явган зорчигчийн замаар явахдаа бусдын аюулгүй байдлыг хангаж болгоомжтой явах хэрэгтэй.

Үүн дээр мөн цагдаагийн байгууллага хяналт тавьж байгаа.

Сургууль орчмын эргүүл буюу “school police”-тэй хамтарч, тогтмол мэдээ мэдээлэл солилцож, дэмжлэг үзүүлж байна.

Мөн нийтийн тээврийн хэрэгслийг хурдан шуурхай зорчуулах тал дээр онцгой анхаарч зорчих хэсгийн нэгдүгээр эгнээнд алба хаагчид болон камераар хяналт тавин ажиллаж байгаа.

Замын хөдөлгөөний шинэчилсэн найруулгад өглөөний 06.00 цагаас оройны 22.00 цагийн хооронд автобусны буудал орчимд суудлын авто машин зогсохыг хориглосон байдаг. Гэтэл замын хөдөлгөөнд автомашинтай оролцож байгаа иргэд автобусны буудал дээр зогсдог. Үүнээс үүдэн нийтийн тээврийн хэрэгслүүд буудал дээрээ зогсож чаддаггүй бөгөөд замын хөдөлгөөний ачаалал нэмэгдэх, тээврийн хэрэгслийн осол гарах эрсдэл үүсдэг. Тиймээс нийтийн тээврийн хэрэгслийн буудлуудад хяналт тавьж байна” гэлээ.

Иргэдийг замын хөдөлгөөнд аюулгүй зорчуулахын тулд цагдаагийн байгууллага бүрэн бүрэлдэхүүнээрээ хичээнгүйлэн ажиллаж байна. Тиймээс замын хөдөлгөөнд оролцохдоо анхаарал болгоомжтой оролцоорой.

Иргэд замын хөдөлгөөнд оролцохдоо:

-Хүүхдээ зориулалтын суудалд суулгах, хамгаалалтын бүс бүслүүлж хэвших,

-Гарцаар гарахдаа гэрлэн дохиогоо харж, анхаарал болгоомжтой зорчих,

– Хөдөлгөөний аюулгүй байдлыг хангах зорилгоор тээврийн хэрэгслийнхээ оврын гэрлийг асаах,

– Замын хөдөлгөөнд оролцохдоо хүүхдэдээ үлгэр дуурайлал үзүүлж, замын хөдөлгөөнд соёлтой оролцохыг цагдаагийн байгууллагаас анхааруулж байна.

Цагдаагийн байгууллагаас хичээлийн шинэ жилийг угтаж “Хичээл эхэллээ” арга хэмжээг улсын хэмжээнд зохион байгуулж байгаа аж. Уг арга хэмжээний хүрээнд сургууль, цэцэрлэг орчмын аюулгүй байдлыг хангах, боловсролын байгууллагын ажилтан, эцэг эх асран хамгаалагч нарт замын хөдөлгөөний тухай хууль, эрх зүйн мэдлэг олгох, гудамж замын аюулгүй байдал зэргийг шалгах гэх мэт олон ажил зохион байгуулж, мэргэжил арга зүйн зөвлөгөө өгч хамтран ажиллаж байгаа юм.

Эрхэм хүндэт багш нар, энхрий хөөрхөн хүүхдүүддээ болон нийт эцэг, эхчүүддээ цагдаагийн байгууллагын нэрийн өмнөөс 2021-2022 оны хичээлийн шинэ жилийн баярын мэндийг хүргэе!

COVID-19-ийн эсрэг “Moderna”-ийн вакцины хоёр тун “Pfizer”-ийн вакцинтай харьцуулахад хоёр дахин их эсрэг биет үүсгэж байгааг 1600 хүнийг хамруулсан судалгаагаар тогтоожээ.

Үүнээс гадна улс орнуудад “коронавирус”-ийн халдварын тархалт эрчимжиж байгаатай холбоотойгоор сургуулиуд халдвар хамгааллын дэглэмээ сайн сахих хэрэгтэй гэдгийг “John Hopkins” их сургуулийн эрдэмтэн онцоллоо.

“John Hopkins” их сургуулийн Жошуа Шарфштейн “Зарим улсад аль хэдийн хичээл сургууль эхэлчихсэн байгаа. Халдварын тархалт буурахгүй, өндөр байгаатай холбоотойгоор сургуулиудад халдвар тархах эрсдэл байсаар байна. Тиймээс сургуулиуд халдвар хамгааллын дэглэмээ сайн барих хэрэгтэй. Гэвч зарим тохиолдолд энэ нь мөрдөгдөхгүй байна. Улмаар багш нар халдвар авч, хөл хорио тогтоосноор хүүхдүүд дахин хөл хорионы дэглэмд орж байна. Үүнээс сэргийлж, сургуулиуд амжилттай үйл ажиллагаа явуулахын тулд халдвар хамгааллын дэглэмээ сайн барих хэрэгтэй” гэсэн байна.

Энэ хичээлийн жилд Улаанбаатар хотын хэмжээнд 286 ерөнхий боловсролын сургуульд 341.500 сурагч суралцана. Төрийн өмчийн 152, төрийн бус өмчийн 134 сургуульд шинээр 38.842 сурагч элсэн орж байна.

2021-2022 оны хичээлийн жилд хотын төв буюу Их тойрууд байршилтай 17 сургууль, хотын захын нийтийн тээврийн үйлчилгээний хүртээмж тааруу 12 сургуулийн сурагчдад зориулж сургуулийн автобусаар үйлчлэхээр болжээ. Их тойрууд байршилтай сургуулиудын хувьд хүүхдээ хүргэх, авах гэсэн эцэг эхчүүд автомашинаар зэрэг зорчин авто замд ачаалал үүсгэдэгтэй холбоотойгоор сургуулийн автобусаар үйлчлэх болсон юм. Харин хотын захын сурагчдын хувьд нийтэд үйлчилдэг автобусны тоо цөөн байдгаас хүлээлт үүсгэхийн сацуу хүүхэд багачууд автобусанд сууж чадахгүй хоцрох тохиолдол гардаг аж. Тиймээс хотын захын 12 сургуулийн сурагчдыг сургуулийн автобусаар хичээл сургуульд нь хүргэхээр болжээ.

Нийслэлийн хэмжээнд сургуулийн автобусыг гурав дахь жилдээ явуулж байгаа бөгөөд энэ ажилд нийтийн тээврийн компаниуд идэвх санаачилгатай оролцож, нийгмийн хариуцлагын хүрээнд 3-5 автобусыг нийтийн тээврээс чөлөөлж, сургуулийн автобус болгон үйлчилж байгааг Нийслэлийн Боловсролын газрын Хяналт, шинжилгээ үнэлгээний хэлтсийн дарга Ц.Мөнх-Эрдэнэ онцоллоо. Өнгөрсөн онд нийслэлийн хэмжээнд давхардсан тоогоор 5600-6300 сурагч сургуулийн автобусаар зорчсон байна.

Энэ хичээлийн жилийн хувьд сургуулийн автобусыг 37 чиглэлд явуулахаар төлөвлөжээ. Сургуулийн автобус есдүгээр сарын 6-ны өдөр буюу ирэх даваа гарагаас эхлэн сурагчдад үйлчилнэ. Нийт 37 чиглэлд 37 автобус явах юм. Сургуулийн автобусаар зөвхөн бага ангийнхан бус, нийт сурагчид үйлчлүүлэх боломжтой.

Эх түүхээ хамгаалж үлдэх асуудлаар УИХ-ын гишүүн Б.Бат-Эрдэнэ болон “Бидний цөөхөн монголчууд” төслийн санаачлагч М.Зоригт тэргүүтэй хүмүүс мэдээлэл хийлээ.

“Бидний цөөхөн монголчууд” төслийн санаачлагч М.Зоригт:

“Өнгөрсөн долоо хоногт Андлалын хөшөөг буулгахыг хараад цочирдсон. Арай ч гэж дээ гэж бодогдсон. Өмнө нь тэр хөшөөн дээр очиж үзэж байсан. Ард иргэдийн муулаад байгааг ойлгож л байсан. Бүх шатандаа цавчдаг, иддэг дүр төрх тэнд байж л байсан. Гэхдээ муу ч сайн ч түүхээ авч үлдэх ёстой. Монголчууд бид цөөхүүлээ шүү дээ. Хөшөөг буулгаж байна гэх бичлэг үзээд тухайн өдөр нутгийн удирдлагуудтай ярьж, асуухад үнэн гэсэн. Гэтэл Засгийн нэг сайд нь гаргасан зардлыг нь улсын төсөвт буцааж тушаасан гэж мэдэгдэж байх жишээтэй. Өнөөдөр монголын хамгийн сайн оёдолчид, зураачид, барималчид хаана байна вэ, Өнмөд Монголд байна. Андлалын өргөөг баригдахын өмнөх Монголчууд, нураасны дараах Монголчууд байгаасай гэж хүсэж байна” гэв.

Хэнтий аймгаас сонгогдсон УИХ-ын гишүүн Б.Бат-Эрдэнэ:

“Үеийн үедээ Монголын төр үүх түүхээ дархлаажуулж ирсэн юм. Өдий хзртэл соёлын үүх түүх болсон газар нутгаа өдий хүртэл хамгаалж ирсэн Хан Хэнтийчүүддээ баярлалаа гэж төр засаг хэлж байсан үе бий. Монгол Улсын Засгийн газар Хэнтий аймгийг “Түүхэн аялал жуулчлалын бүс” болгох онцгой шийдвэр гаргасан байдаг. Андлалын өргөөг зүгээр нэг хүн очоод барьчихсан цогцолбор бол биш юм. Барьсан газар нь хүртэл түүхэн газар барьсан байдаг юм” гэв.