Month: October 2020

Улсын Их Хурлын гишүүн, УИХ дахь Монгол-Британийн парламентын бүлгийн дарга Ч.Ундрам өнөөдөр (2020.10.07) Их Британи, Умард Ирландын Нэгдсэн Хаант Улсаас Монгол Улсад суугаа Элчин сайд Филип Малоуныг хүлээн авч уулзав.

Элчин сайд Ф.Малоун УИХ дахь Монгол-Британийн парламентын бүлгийг ахлах болсонд УИХ-ын гишүүн Ч.Ундрамд баяр хүргээд хоёр улсын харилцаа, хамтын ажиллагааг өргөжүүлэн хөгжүүлэхийн төлөө хамтран ажиллахад бэлэн буйгаа илэрхийллээ.

Хоёр улсын хооронд 1963 онд дипломат харилцаа тогтож, өдгөө худалдаа, эдийн засаг, бизнес, хөдөө аж ахуй, боловсрол, эрүүл мэнд гээд бүхий л салбарт хамтын ажиллагаа идэвхтэй өрнөж байгааг УИХ-ын гишүүн, УИХ дахь Монгол-Британийн парламентын бүлгийн дарга Ч.Ундрам тэмдэглээд цаашдын хамтын ажиллагааны чиглэлийн талаар ярилцав.

Талууд хоёр улсын найрсаг харилцаа, хамтын ажиллагааг эдийн засгийн агуулгаар баяжуулж, боловсрол, соёл, бизнес, хөрөнгө оруулалтын салбарын хамтын ажиллагааг өргөжүүлэх бүрэн боломж байгаатай санал нэгдэж байлаа.

COVID-19 цар тахалтай тэмцэхэд хоёр талын болон олон улсын хамтын ажиллагаа, эв нэгдэл чухал гэдэгт талууд санал нэгдэж, өнөөгийн нөхцөл байдалд тохируулан хоёр улсын хамтын ажиллагааны хүрээнд төлөвлөсөн ажлуудаа тасралтгүй хэрэгжүүлэхэд хоёр талаас хамтран ажиллах талаар ярилцаж, санал солилцлоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Улсын Их Хурлын Боловсрол, соёл, шинжлэх ухааны байнгын хорооны өнөөдрийн /2020.10.07/ хуралдаан 10 цаг 24 минутад 61.1 хувийн ирцтэй эхэлж, Байнгын хорооны дарга Ж.Мөнхбат гурван асуудал хэлэлцэн, шийдвэрлэхийг танилцуулав.

Хуралдаанаар эхлээд Засгийн газраас 2019.04.06-ны өдөр өргөн мэдүүлсэн Кино урлагийг дэмжих тухай хуулийн төсөл болон хамт өргөн мэдүүлсэн хуулийн төслүүд-ийг хэлэлцэх эсэхийг хэлэлцлээ.

Хуулийн төслийг Соёлын сайд С.Чулуун танилцуулав.

Монгол киног дэлхийн зах зээлд өрсөлдүүлэх, кино үйлдвэрлэлийг дэмжин хөгжүүлэх, кино урлагийн салбарыг эдийн засгийн хөгжилтэй уялдуулан хөгжүүлэх эрх зүйн орчин бий болгох зорилгоор хуулийн төслийг боловсруулсан бөгөөд төрөөс кино урлагийг хөгжүүлэх талаар бодлогын чиглэл, зарчмыг тодорхойлж, төрийн байгууллагын эрх үүргийг болон кино урлагийн мэдээллийн сан бүрдүүлэх, кино урлагийг хөгжүүлэхэд дэмжлэг үзүүлэх асуудлыг зохицуулахаар тусгажээ.

Хуулийн төслийг дагалдуулан Соёлын тухай хуульд өөрчлөлт оруулах тухай, Зөрчлийн тухай хуульд нэмэлт оруулах тухай, Зөрчил шалган шийдвэрлэх тухай хуульд нэмэлт оруулах тухай, Засгийн газрын тусгай сангийн тухай хуульд нэмэлт оруулах тухай, Улсын тэмдэгтийн тухай хуульд нэмэлт оруулах тухай хуулийн төслүүдийг боловсруулсан байна.

Танилцуулгатай холбогдуулж Улсын Их Хурлын гишүүн Б.Жаргалмаа, Г.Амартүвшин, Г.Мөнхцэцэг, П.Анужин, Н.Учрал нар асуулт асууж, хариулт авлаа. Гишүүдийн асуултад Ажлын дэд хэсгийн гишүүн Соёлын сайд С.Чулуун хариулт өгөв.

Улсын Их Хурлын гишүүн Г.Мөнхцэцэг Кино урлагийг дэмжих сангийн үйл ажиллагааг ямар бодлогоор хэрхэн авч явж байгаа талаар болон тус санд төвлөрүүлэхээр тусгасан 10 тэрбум төгрөгийн зарцуулалтын талаар тодруулж асуусан бол Улсын Их хурлын гишүүн П.Анужин цирк, кино үйлдвэр, кино театруудын менежментийн хувьчлалыг дагаад үйл ажиллагаа нь доголдсон учир эргүүлж сэргээх талаар ямар бодлого, чиглэл баримталж ажилладгийг тодрууллаа. Улсын Их Хурлын гишүүн Н.Учрал ашиг олох зорилгоор арилжааны кино хийдэг ч өв соёл, түүхээ харуулсан кино хийгдэхгүй байна гээд өв соёл, түүхийг таниулсан киног захиалж хийлгэх, Кино урлагийг дэмжих санг хөндлөнгийн удирдлагатай болгох талаар болон тус сангийн менежменттэй холбоотой цаашид авч хэрэгжүүлэх асуудлын талаар тодруулсан юм.

Улсын Их Хурлын гишүүн Ж.Мөнхбат уран бүтээлчдэд тулгардаг хамгийн том бэрхшээл киноны дэд бүтцийн асуудал байдгийг дурьдаад төрийн сан хөмрөгийг кинонд ашиглах зэрэг кино үйлдвэрлэлийн шатанд дэд бүтцийн асуудлыг хэрхэн шийдвэрлэх талаар тодруулж асуув.

Гишүүдийн асуултад Соёлын сайд С.Чулуун хариулахдаа, Кино урлагийг дэмжих сангийн үйл ажиллагааг Засгийн газрын тусгай сангийн тухай хуулийн дагуу авч явдаг талаар, цирк, кино үйлдвэр, кино театр зэрэг менежментийн хувьчлалаар хувьчилсан газруудын үйл ажиллагааг хэвийн явуулах нь шинэ яамны чухалчилж тавьж байгаа бодлогын асуудал болох талаар, мөн Кино урлагийг дэмжих сангийн үйл ажиллагааг хөндлөнгийн төлөөлөл, мэргэжлийн зөвлөлд хариуцуулж, шийдвэр гаргуулах талаар хариулж, тус Санг хөрөнгөжүүлэхэд анхаарч байна гэв.

Гишүүд асуулт асууж, хариулт авч дууссанаар Улсын Их Хурлын гишүүн Ё.Баатарбилэг, Ц.Мөнхцэцэг, Г.Амартүвшин, П.Анужин, Г.Мөнхцэцэг нар үг хэллээ. Гишүүд кино урлагийг хөгжүүлэх бодлогын асуудалд төрийн дэмжлэг зайлшгүй байх шаардлагатай талаар хэлсэн үгэндээ тэмдэглэсэн. Ийнхүү хэлэлцээд Кино урлагийг дэмжих тухай хуулийн төсөл болон хамт өргөн мэдүүлсэн хуулийн төслүүд-ийг чуулганы нэгдсэн хуралдаанаар хэлэлцүүлэхийг дэмжье гэсэн саналын томъёоллоор санал хураалт явуулахад гишүүдийн 81.8 хувийн саналаар дэмжсэнээр Байнгын хорооны санал, дүгнэлтийг чуулганы нэгдсэн хуралдаанд танилцуулахаар шийдвэрлэлээ.

Дараа нь Улсын Их Хурлын гишүүн Б.Баттөмөр нарын гишүүдээс өргөн мэдүүлсэн Шинжлэх ухааны академийн эрх зүйн байдлын тухай хуульд нэмэлт, өөрчлөлт оруулах тухай хуулийн төслийг хэлэлцүүлэгт бэлтгэх үүрэг бүхий Ажлын хэсгийг Улсын Их Хурлын гишүүн Ё.Баатарбилэгээр ахлуулан байгуулах Байнгын хорооны тогтоолын төслийг хэлэлцэж, баталлаа.

Хуралдааны төгсгөлд мөн Засгийн газраас болон Улсын Их Хурлын гишүүн Б.Баттөмөр нарын гишүүдээс өргөн мэдүүлсэн Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төслүүдийг нэгтгэн, нэг төсөл болгож хэлэлцүүлэгт бэлтгэх үүрэг бүхий Ажлын хэсгийг Улсын Их Хурлын гишүүн Н.Учралаар ахлуулан байгуулах Байнгын хорооны тогтоолын төслийг хэлэлцэж, баталснаар хуралдаан өндөрлөв гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Монгол Улсын Засгийн газар, Бүгд Найрамдах Беларусь Улсын Засгийн газар хоорондын экспортын зээлийн хүрээнд Онцгой байдлын байгууллагад нийлүүлэгдэж байгаа гал түймэр унтраах, аврах тусгай зориулалтын автомашиныг хүлээн авах ажиллагаа өнөөдөр боллоо.

Хүлээлгэн өгөх ажиллагаанд Монгол Улсын Шадар сайд Я.Содбаатар, БНБУ-аас Монгол Улсад суугаа онц бөгөөд бүрэн эрхт элчин сайд Станислав Чепурной, ОБЕГ-ын дарга, бригадын генерал Г.Ариунбуян, Нийслэлийн Засаг дарга бөгөөд Улаанбаатар хотын даргын захирагчийн үүрэг гүйцэтгэгч Ж.Батбаясгалан, Пожснаб компанийн Засварын албаны дэд захирал Павел Витальевич нар оролцсон юм.

Шадар сайд Я.Содбаатар хэлсэн үгэндээ “ Монгол Улсын Засгийн газар 2003 оноос эхлэн Япон, Солонгос, Австри, Польш, Хятад, Франц, Беларусь Улсын Засгийн газар болон олон улсын байгууллагуудтай хамтран буцалтгүй болон нэн хөнгөлөлттэй зээл, тусламжийн төсөл хөтөлбөрүүдийг хэрэгжүүлсэнээр Онцгой байдлын байгууллагын гамшигтай тэмцэх техник, тоног төхөөрөмжийн хүчин чадал дээшилсэн.

“Онцгой байдлын албаны гамшигтай тэмцэх техник, тоног төхөөрөмжийн хүчин чадлыг сайжруулах төсөл”-ийг хэрэгжүүлснээр Онцгой байдлын байгууллагын гал түймэр, гамшиг осолтой тэмцэх, эрэн хайх, аврах ажиллагааны чадавх дээшилж, хуулиар хүлээсэн чиг үүргээ амжилттай хэрэгжүүлэх, төрийн үйлчилгээг иргэдэд түргэн шуурхай хүргэх боломжийг нэмэгдүүлж байгааг тэмдэглэн хэлэхэд таатай байна” гэлээ.

Төслийн хүрээнд нийлүүлэгдэж байгаа гал түймэр, унтраах аврах зориулалтын эдгээр автомашинууд нь Монгол орны цаг агаарын эрс, тэс уур амьсгал, газар нутаг, автозамын хүнд нөхцөлд тохируулан нэмэлт тоног, төхөөрөмжөөр тоноглогдсон, орчин үеийн дэвшилтэт технологи бүхий аврах ажиллагааны багаж, хэрэгсэл суурилуулснаараа онцлог юм.

Гал түймэр унтраах, аврах автомашиныг техник, багаж хэрэгслийн хамт хүлээн авч, нийслэл болон төв, орон нутгийн Онцгой байдлын байгууллагад хүлээлгэн өглөө.

Ингэснээр Онцгой байдлын байгууллагын гал түймэр унтраах зориулалтын автомашины хангалт 14.4% хувиар нэмэгдэж байна.гэж Онцгой байдлын ерөнхий газраас мэдээллээ.

А.Сүрлэгмаа

Монгол Улс хүйтэн, дулааны хэмийн зөрүүтэй, эрс тэс, хуурай уур амьсгалтай орон. Хүйтний улиралд хувцсаа тохируулж өмсөх, үсээ хатаасны дараа гадагшаа гарах нь эрүүл мэндээ хамгаалах энгийн арга юм. Хүйтэн, сэрүүнд нимгэн хувцас, малгайгүй явснаар эмгэг хууч өвчин, мэдрэлийн суурь өвчтэй болдог тухай мэргэжилтнүүд зөвлөдөг.

Насанд хүрсэн хүний уураг тархинд нэг минутад ойролцоогоор 750 мл (зүрхнээс тархи руу урсах цусны 15 хувь) цус урсан тэжээлээр хангадаг бол даарах тохиолдолд биеийн дулааны 7-10 хувийг алдаж, гүрээний судас нарийсч цусны урсгалын хурд удааширснаар тархины цусан хангамж мууддаг аж. Ингэснээр дараах эрүүл мэндийн сөрөг нөлөөг үзүүлдэг байна.
• Архаг өвчин сэдрэх
• Тархиар хатгуулж өвдөх
• Хараа, сонсгол муудах
• Нулимс гоождог болох
• Нойр муудах
• Мэдрэлийн суурь өвчин үүсэх
• Ой тогтоолт муудах
• Стрест өртөж ажлын чадвар буурах
• Хуйхны эрүүл орчин алдагдах
• Үс хуурайшиж, өнгөө алдах

Тиймээс өвлийн улиралд малгай өмссөнөөр хүн дээрх өвчлөлөөс өөрийгөө хамгаална. Эцэг, эхчүүд хүүхдүүддээ хараа хяналт тавьж малгайг нь байнга өмсгөж хэвшүүлвэл, оюутан, залуус тогтмол малгай өвсөж заншвал тархи, толгойны өвчнөөс хол байх болно. Эрүүл биед саруул ухаан оршино гэдэг билээ.

“COVID-19” халдварын тохиолдлын тоо 36 сая 037 мянга давж, эдгэрсэн хүний тоо 27 сая 143 мянгад хүрлээ.

Нийслэлийн БЗД-ийн 26 дугаар хороонд байрлах “Саруул” хотхоны 11 давхрын дээврээс 31 настай эмэгтэй үсэрч амиа егүүтгэсэн харамсалтай хэрэг гарчээ.

Урьдчилсан байдлаар амь хохирогч нь нөхөр, хүүхэдгүй бөгөөд гэр бүлийн хүчирхийлэл тогтоогдоогүй болохыг цагдаагийн байгууллагаас мэдээллээ.

Тус хотхонд өмнө нь төрсөн эгчийгээ хөнөөж галдан шатаасан ноцтой хэрэг гарч байсан. Мөн уг хотхоны гал түймэр гарсан байрнаас хүлээстэй цогцос олдож байв.

Улсын ерөнхий прокурорын газраас прокурорын байгууллагын 2020 оны гуравдугаар улирлын хяналтын ажил, олны анхаарал татсан эрүүгийн хэргүүдийн шийдвэрлэлтийн талаар мэдээлэл хийлээ. Энэ үеэр нийслэлийн Прокуорын газрын орлогч прокурор Ц.Насанбат олны анхааралд байгаа хэргүүдийн талаар дараах мэдээллийг өглөө. Үүнд:

• “Жи Тайм” сүлжээний н.Оюунчимэгтэй холбогдох 11386 хохирогчийн хохирлыг тодорхой хэмжээнд төлүүлэхээр болсон.
• Д.Дамба-Очир, Д.Солтан нарын хэргийг анхан шатны шүүхээр гэм буруутайг тогтоосон.
• С.Баяр, С.Баярцогт, Н.Номтойбаяр, Д.Эрдэнэбат, Ж.Эрдэнэбат нарын хэргийг анхан шатны болон давж заалдах шатны шүүхээр шийдвэрлэсэн.
• Өнөөдрийн байдлаар “Жаст” Группын захирал Ш.Батхүү нарт холбогдох залилах болон мөнгө угаасан хэрэгт гэм буруутай хэргийн шүүх хуралдаан гурав дахь өдрөө үргэлжилж байна.

Сэтгүүлчид бусад хэргүүдийн талаар тодруулан лавлахад “Мөрдөн байцаалтын явц үргэлжилж байгаа учир мэдээлэл өгөх боломжгүй” гэсэн хариуг өглөө.

Прокурорын байгууллагын 2020 оны 3 дугаар улирлын хяналтын ажлын мэдээ:

• Замын хөдөлгөөний аюулгүй байдлын тухай хууль зөрчих зөрчил 1 хувиар
• Хулгайлах зөрчил 42 хувиар,
• Хүний биед халдах зөрчил 10 хувиар
• Эрүүл ахуйн тухай хууль зөрчих зөрчил 57 хувиар тус тус буурсан бол
• Гэр бүл хүчирхийллийн зөрчил 27 хувиар
• Танхайрах зөрчил 47 хувиар
• Хүүхдийн эрхийг зөрчих зөрчил 2,5 дахин
• ОН-ийн газар зүй бусаар биеэ авч явах зөрчил 17 хувиар
• Төрийн албан тушаалтны шийдвэрийг үл биелүүлж, саад учруулсан зөрчил 57 хувиар
• Архидан согтуурхсан зөрчил 57 хувиар тус тус өссөн талаар мэдээллээ.

Гадаад харилцааны сайд Н.Энхтайван өөрийн цахим хуудсаа идэвхтэй ашигладаг нэгэн. Албан ёсны айлчлалын мэдээ болон бусад мэдээллийг тэрбээр өөрийн цахим хуудсаараа дамжуулдаг учраас албан ёсны, бодит мэдээлэл гэж үзэх зарим хэвлэл, мэдээллийн хэрэгслүүд түүний өнөөдөр “Саарал жагсаалтаас Монгол Улсыг гаргасан шийдвэрийг Европын холбооны Сангийн сайд нар энэ сарын 6-нд гаргав” хэмээн өөрийн сошиал хуудсаараа дамжуулан түгээв.

Энэ талаар Сангийн сайд Ч.Хүрэлбаатар “Саарал жагсаалтаас гаргах ФАТФ-ын өгсөн бүх үүргийг Монгол Улсын Засгийн газар, Монголын төрийн байгууллагууд биелүүлсэн. Үүний дараагаар газар дээр нь шалгалт хийгдэх байсан. Бид зургадугаар сараас хойш хүсэлт тавьсан. Цар тахлын улмаас шалгалт хийх баг ирээгүй. Сая ирж ажилласан гэдгийг та бүхэн мэдэж байгаа. Бидний хариу аравдугаар сарын 13-нд тухайн байгууллагын байнгын хороо хуралдаж шийдвэр гаргана. Аравдугаар сарын 21- 23-ны хооронд болох нэгдсэн хуралдаанаас Монгол Улсыг саарал жагсаалтаас гаргах эцсийн шийдвэр гарна” хэмээв.