Эрүүл мэндийн яамнаас шинэ коронавирусний халдварын нөхцөл байдлын мэдээллийг 2020 оны хоёрдугаар сарын 28-ны өдрийн байдлаар мэдээллээ. Шинэ коронавирусний халдвараар 2858 хүн нас бараад байна. Халдвар авсан хүний тоо 83394-д хүрсэн бол 31157 хүн эдгэрчээ.
УИХ дахь Ардчилсан намын зөвлөл өнөөдөр /2020-02-28/ хуралдаж, цаг үеийн асуудлын талаар хэлэлцлээ. Хуралдаанаар үүсээд буй нөхцөл байдлаас хамааран, эрсдлээс сэргийлэх зорилгоор Эдийн засгийн байнгын хороог хуралдуулах санал гарган, УИХ-ын дарга Г.Занданшатарт албан бичиг хүргүүллээ.
Дэлхийн 43 улс оронд тархаад байгаа “Covid 19” Короновирусын халдвараар олон мянган хүн өвчилж, нас баралт нэмэгдэж дэлхийн дахинаа онцгой нөхцөл байдал үүсэж манай улс өндөржүүлсэн бэлэн байдлын хугацааг дахин нэг сар сунгасантай холбоотойгоор Монгол улсын эдийн засагт эрсдэл үүсэх нөхцөл байдал илэрч эхэлж байна. Эрсдэлээс сэргийлэх зорилгоор УИХ-ын Эдийн засгийн байнгын хороог хуралдуулж, Монгол банк болон Сангийн яамнаас мэдээлэл сонсох нь зөв хэмээн үзэж байна гэв.
Мөн “Улсын хэмжээнд эдийн засгийн бодит нөхцөл байдал ямар байдалтай байгаа, импортын барааны орлого, зарлагын тооцооллын талаар, хот, хөдөөд хүнсний нөөц хангамжийн хүртээмж болон хэрэглээний зах зээлийн нөхцөл байдал мөн үйлчилгээний байгууллагуудын орлого багасаж, бараа бүтээгдэхүүний борлуулалт огцом буурч байгаа тул банкны зээлийн хүүг бууруулах, зээлийн эргэн төлөлтийн хугацааг сунгах, түрээсийн төлбөрийн асуудлыг авч хэлэлцэх шаардлага үүсэж байна. Иймд 2020 оны 03 дугаар сарын 05-ны өдрийн дотор мэдээллийг сонсож, шаардлагатай гэж үзвэл УИХ-ын ээлжит бус чуулганыг хуралдуулах нь зүйтэй” хэмээжээ.
Монгол Улсын Шадар сайд, Улсын Онцгой комиссын дарга Ө.Энхтүвшин НҮБ-ын Монгол улсад суугаа суурин төлөөлөгч Мишра Тапан, ДЭМБ-аас Монгол Улсад суугаа суурин төлөөлөгч Сергей Диордица нартай уулзлаа.
Уулзалтын гол шалтгаан нь шинэ коронавирусийн халдварын эсрэг хийж хэрэгжүүлж байгаа ажлын талаар өөрсдийн санал сэтгэгдлээ илэрхийлж, цаашид Монгол Улсын Засгийн газартай хэрхэн хамтран ажиллах талаар байр сууриа илэрхийлсэн явдал юм. Энэ талаар Монгол Улсын Шадар сайд, Улсын Онцгой комиссын дарга Ө.Энхтүвшин мэдээлэл хийлээ.
Тэрээр “Монголын ард түмэн төр засгийнхаа гаргасан шийдвэрийг сайн дагаж, хүндэтгэж, хэрэгжүүлдэг ухаантай ард түмэн байна гэж тодорхойлжээ. НҮБ-ын зүгээс Монгол Улсад хэрэгцээтэй байгаа зүйлсийн жагсаалтыг гаргаж байна гэсэн. НҮБ-ын системийн байгууллагад ажиллаж байгаа бүх хүн нэг өдрийнхөө цалинг хандивлаж байгааг хэлсэн.
Би УОК-ийн даргын хувьд НҮБ-д 500 мянган маскны дэмжлэгийг үзүүлээч гэж хүсэлт тавьсан. Үүнийг бүрэн дүүрэн хүлээн авч ойрын хугацаанд хангаж өгнө гэсэн” гэв.
Засгийн газар ээлжит бусаар хуралдаж байна. Хуралдаанаар бэлэн байдлын зэрэгт шилжүүлсэнтэй холбоотойгоор эдийн засгийг эрчимжүүлэх талаар авах арга хэмжээг хэлэлцэж байгаа аж. Эдийн засгийн хүндрэлтэй холбогдуулан авах арга хэмжээний талаар Сангийн сайд Ч. Хүрэлбаатар шийдлүүд танилцуулж хэлэлцүүлэх юм.
Тодруулбал, нүүрс,газрын тосны тээврийг тусгай горимоор /эрсдлээс хамгаалж/ БНХАУ-руу экспортлохыг ирэх сарын 15-аас эхлэн явуулахаар болж байгаа аж.
Монгол Улсын Шадар сайд, УОК-ын дарга Ө.Энхтүвшин НҮБ-ын Суурин зохицуулагч Тапан Мишра, ДЭМБ-ын Суурин төлөөлөгч Сергей Диордица нартай уулзлаа. Уулзалтын талаар Шадар сайд Ө.Энхтүвшин сэтгүүлчдэд мэдээлэл хийв.
-Коронавирусийн эсрэг хийж байгаа тэмцлийн талаар газар дээр ямар байдалтай байгааг ДЭМБ-ын мэргэжилтнүүд үзэж, бүрэн дэмжсэн. Зарим асуудалд хатуу шийдвэр гаргалаа гэж үзэж байна. Хөдөлгөөнийг хязгаарлах ажлыг цуцлахгүй байх талаар санал тавьсан. Танай ард түмэн төр засгийн шийдвэрээ яаж хүлээж авдгийг Цагаан сарын үеэр харлаа. Төр, засгийн шийдвэрээ дагадаг ард түмэн байна гэж хэлж байна. Монгол Улсад хэрэгцээтэй байгаа жагсаалтыг гаргаж, хамгийн сүүлийн үеийн тоног төхөөрөмж, оношлуур, эмийг ханган нийлүүлэх талаар хамтарч ажиллана гэдгээ хэллээ. НҮБ-ын системийн байгууллагад ажиллаж байгаа хүмүүс нэг өдрийн цалингаа хандивлана гэлээ.
Бидний зүгээс 500 мянган амны хаалт хандивлаач, эрсдэлтэй бүлэгт ажиллаж байгаа хүмүүст өгнө гэсэн бидний саналыг хүлээж авлаа.
-Засгийн газрын хуралдаанаар Онцгой комисст ямар нэг санал тавьсан уу?
-Энэ удаагийн хуралдаанаар ямар нэг санал тавиагүй.
-Эдийн засгийн хүндрэлтэй холбоотой асуудлыг хэрхэн шийдэх вэ, онцгой байдлын үед?
-Онцгой байдлын үед банкуудыг зээл төл гэж нэхэхгүй байх талаар Засгийн газрын хуралдаанаар хэлэлцсэн.
2000-3000 ажилтантай үйлдэрүүдэд халдвартай тохиолдол гарвал олон хүн халдвар авах эрсдэл үүсээд байна. Үүнийг яаж зохицуулэх вэ?
-Тухай үйлдвэр компаниуд нь дээд зэргийн зохион байгуулалтад орж байгаа. Ариутгал халдваргүйжүүлэлт гэх мэтээр стандартын дагуу зохионд байгуулалтад орж байгаа.
Монгол Улсын Засгийн газрын 2020 оны 30, 39 дүгээр тогтоол, Улсын Онцгой комиссын 2020 оны 01 дүгээр тогтоол, Улсын Онцгой комиссын 2020 оны 03 дугаар хурлын тэмдэглэл, Нийслэлийн Засаг даргын “Халдварт өвчнөөс урьдчилан сэргийлэх талаар авч хэрэгжүүлэх зарим арга хэмжээний тухай” А/166 дугаар захирамж, Улаанбаатар хотын Захирагчийн ажлын албаны 2020 оны 02 дугаар сарын 07-ны өдрийн 01/296 дугаар албан бичгийн дагуу шинэ коронавирусний халдвараас урьдчилан сэргийлэх халдваргүйтгэлийн ажил 19 салбар газруудад тогтсон хугацаанд хийгдсээр байна.
COVID-19 буюу коронавирусний халдвараас урьдчилан сэргийлэх зорилгоор Монгол Улсын Онцгой Комиссын шийдвэрийн дагуу “МИАТ” ТӨХК-ийн Улаанбаатар-Токио-Улаанбаатар чиглэлийн бүх нислэгүүд 2020 оны 02 дугаар сарын 28-ний өдрөөс 03 дугаар сарын 11-ний өдрийг дуустал хугацаагаар цуцлагдсан болно.
Жич: Зорчигчид Та бүхэн тийз худалдан авсан агент руугаа холбогдоно уу!
Эх сурвалж: МИАТ
Засгийн газрын хуралдаанаар хэлэлцсэн асуудлын талаар мэдээлэл хийх гэж байна.
Өнөөдрийн хуралдаанд эдийн засгийг эрчимжүүлэх талаар авах арга хэмжээний талаар Сангийн сайд танилцуулсан билээ.
Сангийн сайд Ч.Хүрэлбаатар” Өндөржүүлсэн бэлэн байдлын үед авч хэрэгжүүлэх хэд хэдэн арга хэмжээний тухай Засгийн газрын хуралдаанаар хэлэлцлээ.
Эдийн засгаас дэмжих үүднээс эрүүл ахуй, ариун цэврийн шаардлага ханган нүүрс, газрын тосны экспортыг эхлүүлнэ. Ингэхдээ хилээр гараад тэр өдөртөө буцаж орж ирсэн байх зэрэг шаардлага тавьж байгаа.
Хоёрдугаарт, өндөржүүлсэн бэлэн байдалд шилжсэн хугацаанд НДШ-ийг төлж чадаагүй торгуулийг авахааргүй болсон. Үүнийг УИХ-аар шийдвэрлэнэ.
ААН-үүдийн үйл ажиллагаа тодорхой хэмжээгээр доголдож байгаа үед торгууль ногдуулахгүй байх хууль эрх зүйн шаардлага үүсч байна. Энэ асуудлыг асуудлыг мөн УИХ-аар шийдвэрлэнэ.
Энэ хугацаанд зах, худалдааны төв, үйлчилгээний газруудад түрээсээр үйл ажиллагаа явуулдаг түрээслэгчдийг түрээсийн орлогод ногдуулах татвараас чөлөөлнө. Гэхдээ энэ нь зөвхөн түрээсийн төлбөрөө буулгасан түрээслэгчдэд зориулсан зохицуулалт.
Улсын төсвийн тодотгохгүй” гэлээ.
Монголбанкны Ерөнхийлөгчийн тушаалаар 2006 онд үйлдвэрлэгдсэн 20000-тын дэвсгэртүүдийг 2020 оны гуравдугаар сарын 1-ний өдрөөс эхлэн гүйлгээнээс татахаар болсон. 2006 оны энэхүү дэвсгэрт нь хамгаалалтын элемент хангалтгүй байдгаас уг дэвсгэртийг ихэвчлэн хуурамчаар үйлдэж байгаа аж.
Тиймээс 2020 оны гуравдугаар сарын 1-нээс эхлэн уг дэвсгэртээр төлбөр тооцоо хийхийг зогсоож буй бөгөөд иргэд уг дэвсгэртийг 2022 оны гуравдугаар сарын 1-ний өдөр хүртэл хоёр жилийн хугацаанд банкуудад болон Монголбанкинд хандан шинэ дэвсгэртээр солиулах юм байна.
Монголбанк 50 болон 20000 төгрөгийн дэвсгэртүүдэд орчин үеийн технологи бүхий хамгаалалтын шинэ элементүүдийг оруулан шинэчлэн сайжруулж, гүйлгээнд гаргаж эхэллээ. Шинэчилсэн хамгаалалтын элементүүд нь иргэд энгийн нүдээр хараад хуурамч дэвсгэртээс төвөггүй ялгаж, таних боломжтой бөгөөд 3 хэмжээст, микро оптик, хөдөлгөөнт гадаргуутай тууз болон 3 хэмжээст өнгө нь хувирагч элемент, харааны бэрхшээлтэй иргэдэд зориулсан товгор таних тэмдэг зэргийг дурдаж болно. Шинэ 20000 төгрөгийн дэвсгэрт нь түүхэн болон үндэсний уламжлалт хэв маягийг хамгийн сүүлийн үеийн технологитой төгс хослуулснаараа онцлогтой юм.
Нийгмийн даатгалын байгууллага нь тэтгэврийн санхүүжилтийг урьдын адил хугацаанд нь олгох тул заавал тэтгэвэр олгох эхний өдөр банкинд дугаарлаж, ачаалал үүсгэлгүй, картаар эсвэл ачаалал багатай өөр өдөр сонгон үйлчлүүлж өөрийн эрүүл мэндээ хамгаалахыг тэтгэвэр авагчиддаа уриалж байна.