Month: January 2020

Хичээл сургалтын үйл ажиллагааг өнөөдрөөс эхлэн гуравдугаар сарын 2-ныг хүртэл хугацаанд зогсоох шийдвэрийг Улсын Онцгой комисс нэгдүгээр сарын 24-ний өдөр гаргасан билээ.

Энэ хугацаанд сургалтын хөтөлбөрт тохирсон агуулгаар цахим болон теле хичээл бэлтгэн хүргэхийг Засгийн газраас Боловсрол, соёл, шинжлэх ухаан, спортын сайд болон холбогдох албаныханд үүрэг болгосон.

Харин гуравдугаар сарын 2-ныг хүртэл хугацаанд Мэргэжлийн сургалт үйлдвэрлэлийн төв, их, дээд сургуулиуд хичээл, даалгавраа өөрсдийн дотоод сүлжээгээр хариуцан явуулах юм.

Ерөнхий боловсролын сургуулийн теле хичээлийн хуваарийг албан ёсоор мэдээлэх хүртэл хугацаанд сурагчид, эцэг, эхчүүдийг хүлээцтэй байж, өнгөрсөн жилүүдэд бэлтгэн хүргэж байсан хичээлийг түгээж, төөрөгдөл үүсгэхгүй байхыг албаныхан зөвлөлөө.

Улаанбаатар хотоос орон нутаг руу чиглэсэн оюутан, сурагчдын зорчих хөдөлгөөн нэмэгдэж байгаатай холбогдуулан Автотээврийн үндэсний төвөөс зорчигч урсгал нэмэгдэж байгаа хот хоорондын зарим чиглэлүүдэд техникийн бүрэн бүтэн байдлыг хангасан тээврийн хэрэгслүүдийг нэмэлтээр төлөвлөн тээвэрлэлтийн үйл ажиллагааг хэвийн зохион байгуулан ажиллаж байна.

Өнөөдрийн /2020.01.27/ 10 цагийн байдлаар 60 чиглэлд 77 тээврийн хэрэгслээр 2695 зорчигч үйлчлүүлж байгаа бөгөөд нийт нутгаар цаг агаар тогтуун, тээвэрлэлт хэвийн, зам даваа саадгүй байна гэж Автотээврийн үндэсний төвөөс мэдээллээ.

БНХАУ-д шинэ коронавирусийн тархалт ихэссэнтэй холбогдуулан тухайн улстай хиллэдэг автозамын боомтуудад тээврийн хэрэгслийн хөдөлгөөнийг хязгаарлах чиглэл өгсөн байна. Үүнтэй холбогдуулан улс хоорондын зорчигчдын тогтмол тээвэр болон тогтмол бус тээврийг тодорхойгүй хугацаагаар зогсоогоод байгаа аж. Иймд жолооч, зорчигчид дараах чиглэлүүдэд зорчихгүй байхыг Автотээврийн үндэсний төвөөс анхааруулжээ.

Тээврийн хэрэгслийн хөдөлгөөнийг тодорхойгүй хугацаагаар зогсоосон боомтууд:

1. Улаанбаатар хотоос БНХАУ-ын Эрээн хот
2. Дорноговь аймгийн Замын-Үүд сумаас БНХАУ-ын Бээжин хот
3. Дорноговь аймгийн Замын-Үүд сумаас БНХАУ-ын Хөх хот
4. Дорноговь аймгийн Замын-Үүд сумаас БНХАУ-ын Эрээн хот
5. Дорнод аймгийн Хэрлэн сумаас БНХАУ-ын Манжуур хот
6. Өмнөговь аймгийн Гашуунсухайт боомтоос БНХАУ-ын ӨМӨЗО-ны Ганц мод боомт
7. Ховд аймгийн Булган сумаас БНХАУ-ын ШУӨЗО-ны Такешикен тосгон
8. Өмнөговь аймгийн Ханбогд сумаас БНХАУ-ын ӨМӨЗО-ны Баяннуур хотын Халиут балгасын чиглэлд хорио цээрийн дэглэм дуусах хүртэл зорчихгүй байхыг анхааруулж байна.

Сайжруулсан шахмал түлштэй холбоотой асуудлаар болон цаг үеийн бусад асуудлаар НОБГ, НМХГ, Агаарын бохирдолтой тэмцэх газар хамтран мэдээллээ.

НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй, “Угаарын хий мэдрэгчийг нэг удаа үнэ төлбөргүй олгох ажлын хүрээнд энэ сарын 26-ны өдрийн байдлаар 46828 айл өрхөд угаарын хий мэдрэгчийг суурилуулж ажлын гүйцэтгэл 93.6 хувьтай байна. Яаралтай түргэн тусламжийн төвд угаарын хийн хөнгөн хэлбэрээр хордсон гэх дуудлага 36 өрх дуудлага өгч, эмнэлгийн тулсамж үйлчилгээ зөвлөмж зөвлөгөө авсан” гэлээ.

НМХГ-ын дэд дарга С.Даваасүрэн: “Мэргэжлийн хяналтынхан автотээврийн шалган нэвтрүүлэх товчоодод ажиллаж өнгөрсөн амралтын өдрүүдэд 2229 тээврийн хэрэгсэлд хяналт шалгалт хийж ажиллалаа. Иргэдээс түүхий нүүрстэй холбоотой гомдол ирүүлээгүй. Гэхдээ түүхий нүүрсийг тээвэрлэн оруулж ирэх асуудал тасрахгүй байна” хэмээв. Харин агаарын чанарын хувьд өнгөрсөн оны энэ үетэй харьцуулахад PM 10 37 хувиар, PM2.5 47 хувиар тус тус буурсан үзүүлэлттэй гарсан талаар нийслэлийн Агаарын бохирдолтой тэмцэх газрын мэргэжилтэн Г.Даваажаргал мэдээллээ.

Нийслэлийн онцгой комиссын хуралдаанаар томуу, томуу төст өвчин болон шинэ коронавируст халдвараас урьдчилан сэргийлэх, цаашид авч хэрэгжүүлэх арга хэмжээний талаар хэлэлцээд ирэх гуравдугаар сарын 2-ныг хүртэл олон нийтийг хамарсан ямар нэгэн үйл ажиллагаа зохион байгуулахгүй байх шийдвэрийг хотын Захирагч С.Амарсайхан гаргасан. Уг шийдвэрийн хүрээнд холбогдох албаныхан нийслэлийн нутгийн захиргааны 120 байгууллага, ерөнхий боловсролын 197 сургууль, 237 цэцэрлэгт мэдэгдэл хүргүүлж, иргэд олон нийтэд халдварт өвчнөөс урьдчилан сэргийлэх зөвлөмж мэдээллийг хүргэн ажиллаж байна. Сургууль цэцэрлэгийн үйл ажиллагааг түр зогсоосон үед хүүхдийн аюулгүй байдлыг хангаж хараа хяналтаа сайжруулахыг албаныхан санууллаа. Мөн иргэдийг шаардлагагүй тохиолдолд олон нийтийн газраас зорчихгүй байж, амны хаалт зүүж, гараа тогтмол угаах зэргээр хувийн ариун цэврийг сайтар хангаж халдварт өвчнөөс урьдчилан сэргийлэхийг мэргэжлийн хүмүүс сэрэмжлүүлэв.

Жил бүр Цагаан сарын бэлгийн 80 орчим хувийг импортоор авч байгаа нь дунджаар 357.3 тэрбум төгрөгийн гадагшлах урсгалыг бий болгож байгааг Үндэсний статистикийн хороо гаргасан байна. Энэ жилийн сар шинийн баяраар улсын хэмжээнд 845 тэрбум төгрөгийн зардал гарахаар төлөвтэй байгаа юм.

Тэтгэвэрийн зээлийг тэглэх тухай хууль батлагдсантай холбоотой Сар шинийн худалдан авалт өнгөрсөн жилтэй харьцуулахад нэмэгдэх төлөвтэй байна. Иймээс ХХААХҮЯ-наас гадагш урсах мөнгөн урсгалыг сааруулах, дотоодын үйлдвэрийн бараа бүтээгдэхүүний борлуулалтыг дэмжих эх оронч худалдан авалтыг зохион байгуулахаар “Үндэсний баяраараа –Үндэсний бүтээгдэхүүнээ” сарын аяныг эхлүүлж байна.

Аяны хүрээнд төрийн байгууллагуудад үндэсний үйлдвэрийн бараа бүтээгдэхүүний үзэсгэлэн худалдааг хамтран зохион байгуулах, Томоохон үзэсгэлэн худалдаа зохион байгуулж буй байгууллагуудтай хамтарч үйлдвэрлэгч, худалдан авагчдыг идэвхжүүлэх, “Үндэсний баяраараа-Үндэсний бүтээгдэхүүнээ” сурталчилгаа, зэрэг арга хэмжээг зохион байгуулж эхэллээ.

Сар шинийн баяраараа дотоодын үйлдвэрлэлээ дэмжсэн эх оронч худалдан авалт хийж үндэсний үйлдвэрлэлээ дэмжсэнээр худалдан авалтад дотоодын үйлдвэрүүдийн эзлэх хэмжээ 50 хувь хүртэл нэмэгдэх боломжтойг ХХААХҮЯ-ны ХҮХБЗГ-аас хийсэн судлагаагаа харуулж байгаа юм.

Төрийн ордноос эхлэн зохион байгуулж буй үзэсгэлэн худалдааны бэлтгэл ажлыг хоёр сарын өмнөөс хангаж эхэлсэн бөгөөд үүссэн нөхцөл байдалтай холбогдуулж үйл ажиллагаанд оролцож байгаа бүх хүмүүс амны хаалттай оролцож байгаа юм.

Энэхүү арга хэмжээнд Хөнгөн хүнсний салбарын нийт 136 аж ахуйн нэгж оролцож байна. Үүнд Арьс ширэн бүтээгдэхүүн 15 аж ахуйн нэгж, Ноолууран бүтээгдэхүүн 5, ноосон бүтээгдэхүүн 6, оёмол бүтээгдэхүүн 27, Гоо сайхан, арьс, үс арчилгааны бүтээгдэхүүн 11, модон бүтээгдэхүүн 2, хэвлэлийн бүтээгдэхүүн 3, Сав баглаа боодлын бүтээгдэхүүн 3, Жижиг дунд үйлдвэрлэл эрхлэгчид 40, Хүнсний бүтээгдэхүүн үйлдвэрлэгчид -11, Хөгжлийн бэрхшээлтэй иргэд 13 бүтээгдэхүүнээрээ оролцож байна.

Хүнс, хөдөө аж ахуй, хөнгөн үйлдвэрийн салбарт 2020 оныг “Экспортыг нэмэгдүүлэх жил” болгон зарласан. Нэмүү өртөг шингэсэн бүтээгдэхүүн экспортлох маркетинг хөгжүүлэх, гадаад худалдааны эргэлтийг нэмэгдүүлэх гэрээ, хэлэлцээр байгуулаар ажиллаж байна. Хөдөө аж ахуйн гаралтай гол нэрийн бүтээгдэхүүн, түүхий эдийн экспорт 2018 онд 643 сая ам.доллар болсон нь нийт экспортын орлогын 9.2 хувийг эзэлж байна.

Үндэсний баяраараа үндэсний бүтээгдэхүүнээ худалдан авахыг ХХААХҮЯ-наас нийт иргэддээ уриалж байна.

Улаанбаатараас Казахстаны нийслэл Астанаг зорьж явсан автобус өчигдөр ОХУ-ын Алтайн Бүгд Найрамдах Улсад осолджээ. Автобусанд нийт 47 хүн зорчиж явсны 45 нь монгол иргэн байсан бөгөөд азаар нэг ч хүн гэмтэж бэртээгүй аж.

Урьдчилсан дүгнэлтээр жолооч нь зам, цаг уурын нөхцөл байдлыг харгалзаж үзээгүй, хянуур бус байснаас осол гарсан гэж үзэж байна.

Эмнэлгийнхэн зорчигчдыг үзэж дуусаад өөр автобусанд суулган Казахстан явуулжээ. Харин замын хажуу руу унасан автобусыг бульдозероор татаж гаргасан байна.

Онцгой байдлын ерөнхий газрын дарга, хошууч генерал Т.Бадрал өнөөдөр тус газрын бүтцийн нэгжийн дарга нарын 2020 оны гүйцэтгэлийн төлөвлөгөөг баталсан байна.

Энэ үеэр нийт удирдлагуудад хандан, төрийн албаны тухай хууль тогтоомж, стандарт, ёс зүйн хэм хэмжээг чанд сахих, цэргийн сахилга, ёс зүй, хариуцлагыг албан хэмжээнд өндөржүүлж, Онцгой байдлын байгууллагын хэмжээнд дэвшүүлсэн зорилтыг биелүүлэн ажиллахыг үүрэг болгоод ажлын амжилтыг хүссэн юм. Онцгой байдлын байгууллагаас 2020 онд:

-Алба хаагчдын эрүүл ахуй, хөдөлмөрийн аюулгүй байдлыг хангаж, тогтвортой ажиллах орчин, нөхцлийг бүрдүүлэх,

-Гамшгаас хамгаалах үйл ажиллагаанд дэвшилтэт технологи, стандарт, инновацийг нэвтрүүлэх зорилтыг албаны хэмжээнд дэвшүүлэн ажиллаж байна.

Титэм вирусийн цаг үeийн нөхцөл байдлын талаар ДЭМБ-ын Монгол дахь суурин төлөөлөгч Сергей Диордица, ЭМЯ-ны Төрийн захиргааны удирдлагын газрын дарга Б.Цогтбаатар нарын албаны хүмүүс мэдээлэл хийлээ.

Эрүүл мэндийн яамны Төрийн захиргааны удирдлагын газрын дарга Б.Цогтбаатар “2020.01.27-ны 10.00 цагийн байдлаар ДЭМБ-ын мэдээлж байгаагаар титэм вирусээр өвчилсөн хүний тоо 2797, нас барсан хүний тоо 80-д хүрсэн байна. Үүнээс БНХАУ-д 2761 тохиолдол, хилийн чанад болон бусад 85 оронд титэм вирусийн халдвар бүртгэгдсэн. Харин нас баралт одоогоор зөвхөн БНХАУ-д бүртгэгдээд байна.

БНХАУ-ын эрүүл мэндийн яамны мэдээлж буйгаар 461 хүн сэхээн амьдруулах тасагт хэвтэн эмчлүүлж байгаа бол бүрэн эдгэрсэн 49 тохиолдол байна.

БНАХУ-ын 30 мужид болон Макао, Сингапур, Франц, Канад, Малайз гэсэн 14 оронд халдварын тохиолдол бүртгэгдсэн сэжигтэй гэж үзэж буй 9 орон байна.

Харин Монгол Улсад шинэ коронавирусийн халдвар бүртгэгдээгүй. Шадар сайдын журмын дагуу хийсэн үнэлгээгээр манай орны эрсдэлийн зэрэг дундаас өндөрт шилжсэн” гэлээ.