Турк улсын Анталья хотноо сурагчдын ДАШТ болж 33 орны 392 тамирчин оролцсоноос Монгол Улсаа төлөөлөн 23 шатарчин өрсөлджээ.
Манай шатарчин хүүхдүүдээс тус бүр 3 алт, мөнгө, нэг хүрэл медаль хүртсэн байна. Тухайлбал, Энх-Амгалангийн Энхрий “Монголын Хүүхдийн Ордон” (Охидын 11 хүртэлх нас) ДШХ-ны ДМ Хишигбаатарын Баясгалан “Босоо Ноён” клуб (Охидын 13 хүртэлх нас), ОУМ Очирхуягийн Өлзийхишигжаргал “Төв” клуб (Охидын 17 хүртэлх нас) нар аварга болсон бол Батсүхийн Ананд “1-р сургууль” (Нээлттэй 11 хүртэлх нас), ДШХ-ны ДМ Даваахүүгийн Мөнхзул “Төв” клуб (Охидын 13 хүртэлх нас), Наранбаатарын Наран-Эрдэнэ “Сүхбаатар аймаг” (Охидын 17 хүртэлх нас) нар мөнгөн медалийн эзэд болсон байна. Харин Далхаагийн Сүхбат “Төв аймаг” (Нээлттэй 15 хүртэлх нас) хүрэл медаль хүртжээ. Тусгай байрт Ганбаярын Мишээл “Төр Монгол ХТ” (Охидын 7 хүртэлх нас), Гурванбаатарын Урангоо “Чингис” клуб” (Охидын 9 хүртэлх нас), Эрдэнэбаярын Маргадгуа “Төв” клуб (Охидын 15 хүртэлх нас), Энхбаатарын Энх-Од “Сүхбаатар аймаг” (Нээлттэй 15 хүртэлх нас) нар шалгарсан байна. Багийн дүнгээр Монгол Улсын баг алт -3, мөнгө-3, хүрэл-1 гэсэн амжилтаар тэргүүлсэн бол Казахстан (64 тамирчнаас алт-3, мөнгө-2, хүрэл-2), Узбекстан (10 тамирчнаас алт-3, мөнгө-1, хүрэл-1) улсын багууд II, III байр эзэлжээ.
УИХ-ын Байгаль орчин, хүнс, хөдөө аж ахуйн байнгын хороо (БОХХААБХ)-ны өнөөдрийн хуралдаанаар тус байнгын хорооны даргаар УИХ-ын гишүүн Х.Болорчулууныг томилохыг дэмжлээ. УИХ-ын тухай хуулийн 22 дугаар зүйлийн 22.3 дахь хэсэгт “Байнгын хороог Улсын Их Хурлаас нэг жилийн хугацаагаар сонгосон дарга тэргүүлнэ”, мөн 22.4 дэх хэсэгт “Байнгын хорооны даргыг тухайн хорооны гишүүдээс сонгоно” хэмээн заасан. Өнгөрсөн нэг жилийн хугацаанд УИХ-ын гишүүн Л.Элдэв-Очир БОХХААБХ-г даргалсан бөгөөд бүрэн эрхийн хугацаа нь дуусч буй юм. Тиймээс УИХ дахь МАН-ын бүлгээс Х.Болорчулуун гишүүнийг тус байнгын хорооны даргад нэр дэвшүүлснийг олонх дэмжлээ. Байнгын хорооны даргын томилгоог УИХ-ын чуулганы энэ долоо хоногийн нэгдсэн хуралдаанаар эцэслэн шийдвэрлэх юм. Байнгын хорооны хуралдааны үеэр УИХ-ын гишүүн А.Сүхбат байгаль орчны доройтлыг зогсоох, нөхөн сэргээхэд анхаарч ажиллахыг нэр дэвшигчид захилаа. Мөн УИХ-ын гишүүн Д.Тэрбишдагва Оюутолгой төслийн хөрөнгө оруулалтын гэрээг шалгах ажлын багтай хамтран ажиллах, ЖДҮХС-гийн зээлийн хэргийг шийдвэрлэхэд анхаарахыг захилаа.
Дундговь аймагт энэ сарын 09-10-ны өдрүүдэд зохион байгуулах Гамшгаас хамгаалах команд штабын сургуулийн бэлтгэл ажлыг хангуулахаар ОБEГ-ын дэд дарга, хурандаа Б.Ууганбаяраар ахлуулсан ажлын хэсэг тус аймагт ажиллаж байна. Ажлын хэсгийн бүрэлдэхүүн өнөөдөр гамшгаалах хамгаалах менежмент, гамшгийн үеийн орон нутгийн удирдлагын харилцан ажиллагаа, гамшгийн эрсдэлийн үнэлгээний арга зүй, мал, амьтны гоц халдварт өвчин, монгол орны газар хөдлөлтийн байдал зэрэг сэдвээр танхимын сургалт зохион байгууллаа.
Өчигдрийн Улсын Дээд Шүүхийн шүүгчдийн зөвлөгөөнөөр Ерөнхий шүүгчээр Х.Батсүрэнг нэр дэвшүүлэх саналд олонх нэгдэж саналаа Ерөнхийлөгчид хүргүүлжээ. Харин ЕТГ-аас нэр дэвшигчийг ашиг сонирхлын зөрчилтэй эсэхийг шалгуулах хүсэлтээ Авлигатай тэмцэх газарт илгээсэн байна.
Улсын хэмжээнд энэ сарын эхний байдлаар нийслэл болон 33 суманд нийт 48 удаагийн ой, хээрийн гал түймэр гарч урьдчилсан байдлаар нийт 239.2 мянган га талбай түймэрт өртөөд байна. Тодруулбал, Улаанбаатар хот, Булган, Дорнод, Дорноговь, Дархан-Уул, Сэлэнгэ, Сүхбаатар, Төв, Увс, Хөвсгөл, Хэнтий аймгийн 33 сумын 21.9 мянган га ой, 217.2 мянган га хээрийн талбай түймэрт өртсөн байна. Унтраагаагүй хаясан тамхи, машин техникийн яндангаас үсэрсэн оч, бүрэн унтраалгүй ил задгай хаясан үнс, нурам зэргээс шалтгаалан ой, тал хээрийн түймэр үүдэн гарч байгаа тул, иргэдийн анхааралтай байхыг анхаарууллаа. Ой хээрийн түймрээс урьдчилан сэргийлэх ажлыг эрчимжүүлэх зорилгоор цаашид Улсын хил дамнан гарч буй ой, хээрийн түймэр, ялангуяа хоёр хөршөөс орж ирсэн түймрийн хурд их, эрчим өндөртэй, ихээхэн талбайг хамарсан түймэр олон тохиолдож байгаа тул урьдчилан сэргийлэх, хамгаалах, унтраахад ихээхэн хүн хүч, техник хэрэгсэл шаардагдах болсныг холбогдох албаныхан дурдаад цаашид авч хэрэгжүүлэх зарим арга хэмжээний талаар мэдээллээ.
Нийслэлийн мэргэжлийн хяналтын газраас эм биобэлдмэлийн хяналтын төлөвлөгөөт хяналт шалгалт хийж байна. Энэ хүрээнд “Нууц увидас” улaмжлалт анагаах ухааны эмнэлэгт хяналт шалгалт хийгдлээ. Шалгалтаар тус эмнэлэг стандартын жорын маягт дээр жор бичдэггүй, эмийн нэр, хүчинтэй хугацаа, хадгалах хугацаа, нөхцөл тодорхойгүй эмээр үйлчилдэг зэрэг зөрчлийг илрүүлэн шалган шийдвэрлэж байна.